ទំនាក់ទំនងអ្វីនៅពីក្រោយ Angelina និង អ៊ឹង លួង មុនព្រមធ្វើរឿង "មុនដំបូងខ្មែរក្រហមសម្លាប់ប៉ារបស់ខ្ញុំ"?
- 2017-02-23 06:53:23
- ចំនួនមតិ 0 | ចំនួនចែករំលែក 0
ទំនាក់ទំនងអ្វីនៅពីក្រោយ Angelina និង អ៊ឹង លួង មុនព្រមធ្វើរឿង "មុនដំបូងខ្មែរក្រហមសម្លាប់ប៉ារបស់ខ្ញុំ"?
ចន្លោះមិនឃើញ
រឿង "មុនដំបូងខ្មែរក្រហមសម្លាប់ប៉ារបស់ខ្ញុំ" ជារឿងដែលប្រែសម្រួលចេញពីការចងចាំដ៏ឈឺចាប់មួយរបស់កុមារីអ៊ឹង លួង ដែលបានរួចរស់រានមានជីវិតពីរបបខ្មែរក្រហមឆ្នាំ ១៩៧៥ ដល់ ១៩៧៩។ គ្រប់យ៉ាងនៅក្នុងរឿងសុទ្ធតែឆ្លុះបង្ហាញពី ការជួបប្រទះ របស់ប្រជាពលរដ្ឋខ្មែរកាលសម័យនោះទាំងអស់ ប៉ុន្តែប្រិយមិត្តមានឆ្ងល់ទេថា ហេតុអីអ្នកស្រី Angelina Jolie ធ្វើរឿង "មុនដំបូងខ្មែរក្រហមសម្លាប់ប៉ារបស់ខ្ញុំ" ឲ្យអ្នកស្រី អ៊ឹង លួង? ហើយតើអ្នកទាំងពីរមានទំនាក់ទំនងអ្វីនឹងគ្នា?
ជាការពិតណាស់ អ្នកទាំងពីរសុទ្ធតែអះអាងថាពិតជាមានទំនាក់ទំនងជិតស្និទ្ធនឹងគ្នាមែន មិនត្រឹមតែប៉ុណ្ណោះ សូម្បីកូនចិញ្ចឹមរបស់អ្នកស្រី Angelina Jolie គឺ Maddox នោះ ក៏អ្នកស្រី អ៊ឹង លួង ជាអ្នកណែនាំឲ្យយកទៅ ចិញ្ចឹម ព្រមទាំងធ្លាប់បានជួយមើលការខុសត្រូវកូនៗរបស់តារាហូលីវូដរូបនេះដែរ។
អ្នកនិពន្ធរឿង "មុនដំបូងខ្មែរក្រហមសម្លាប់ប៉ារបស់ខ្ញុំ" អ៊ឹង លួង បានផ្ដល់បទសម្ភាសន៍ពិសេសជាមួយក្រុមការងារSabay កាលពីថ្ងៃសន្និសីទនៅខេត្តសៀមរាបថាអ្នកស្រី និង Angelina ជាមិត្តភក្តិជិតស្និទ្ធនឹងគ្នា។
ពីដំបូងឡើយមុននឹងរឿងនេះធ្លាក់ដល់ដៃ Angelina អ្នកនិពន្ធ អ៊ឹង លួង ប្រាប់ថាដំបូងឡើយ កាលអ្នកស្រី Angelina Jolie មកធ្វើកុនមួយនៅស្រុកខ្មែរ គាប់ជួនអ្នកស្រី អ៊ឹង លួង មកធ្វើការនៅស្រុកខ្មែរដែរ ក៏បានផ្ញើសៀវភៅដែលខ្លួនបានសរសេរឡើងពី ការចងចាំអំពីរបបខ្មែរក្រហមទៅ តារាស្រីហូលីវូដចិត្តធម៌នេះមើល។ យ៉ាងណាក៏ដោយ អ្នកនិពន្ធ អ៊ឹង លួង មិនប្រាកដថា សៀវភៅមួយនេះពិតជាបានទៅដល់ដៃ Angelina ដែរឬយ៉ាងណា? ជាសំណាងល្អតារាហូលីវូដ Angelina បានអាន ហើយថែមពេញចិត្ត នឹងចង់ជួបម្ចាស់សំណេរ អ៊ឹង លួង ទៀតផង។
អ៊ឹង លួង សរសើរទឹកចិត្តពោរពេញទៅដោយក្តីស្រលាញ់ដែល Angelina មានសម្រាប់ប្រទេសខ្មែរ ក៏ដូចជាជនជាតិខ្មែរ ថាពិតជាកម្ររកបានណាស់។ "ខ្ញុំនៅស្រុកខ្មែរ ក៏ផ្ញើសៀវភៅឲ្យ Angelina មើល ក៏ខលរកខ្ញុំ គាប់ជួននៅស្រុកខ្មែរ ក៏រកគ្នាតែម្តង។ គាត់ស្រលាញ់ស្រុកខ្មែរ គាត់មានបេះដូងស្រលាញ់ខ្មែរ ទាំង ភាសា កូនក្មេង ម្ហូប ដីស្រុកខ្មែរ គាត់ពេញចិត្តទាំងអស់ ខ្ញុំដើរជាមួយគាត់ពិតជាសប្បាយ"។ អ៊ឹង លួង បន្ថែម។
ក្រោយពីបានអានរឿងរបស់ អ៊ឹង លួង ចប់ Angelina សន្យាថានឹងថតភាពយន្តមួយនេះឲ្យ អ៊ឹង លួង ក៏ដូចជាប្រជាពលរដ្ឋខ្មែរ ប៉ុន្តែអ្នកនិពន្ធដដែលរូបនេះថា ត្រូវចំណាយពេលចាំជិត២ឆ្នាំ ដោយសាររវល់កិច្ចការជាច្រើនរហូតដល់ឆ្នាំ ២០១៤ ទើបតារាស្រីហូលីវូដ ចាប់ផ្តើមរៀបគម្រោងថត។
រយៈពេលជាងជិត២០ឆ្នាំ រវាងទំនាក់ទំនងមិត្តជិតស្និទ្ធរបស់អ្នកទាំងពីរ សូម្បីតែ Angelina មានបំណងចង់បានកូនចិញ្ចឹម Maddox នៅស្រុកខ្មែរ ក៏មានការរួមចំណែកពីអ្នកស្រី អ៊ឹង លួង ដែរ។ កាលឆ្នាំ ២០០០ Angelina បានសួរទៅ អ៊ឹង លួង ថា បើសិនជាអ្នកស្រី ចង់យកកូនខ្មែរតៅចិញ្ចឹម គិតយ៉ាងណា? មិនបដិសេធ អ៊ឹង លួង ថែមទាំងសប្បាយចិត្ត និងបាននាំ ទៅកន្លែងដែល Maddox រស់នៅទៀតផង។
រីឯតារាសម្តែងលំដាប់ A អាមេរិក Angelina Jolie ក៏អះអាងដូច អ៊ឹង លួង ដែរ អ្នកទាំងពីរគឺជាមិត្តល្អហើយបានស្គាល់គ្នាជិត២០ឆ្នាំហើយ។ Angelina បន្តឲ្យដឹងតាមរយៈវីដេអូ Trailer ដែលបានបង្ហោះលើPage First They Killed My Father ទៀតថា អានសៀវភៅរបស់អ្នកស្រី អ៊ឹង លួង ហើយ ធ្វើឲ្យ អ្នកស្រីកាន់តែយល់ និងដឹងច្បាស់អំពីប្រទេសកម្ពុជា។ អាចនិយាយបានថាអ្នកស្រី ដូចជាកំពុងតែផលិតខ្សែភាពយន្តមួយនេះនៅកម្ពុជាដូច្នោះដែរ ហើយវាជាចំណែកមួយសម្រាប់គ្រួសារអ្នកស្រី សម្រាប់ប្រទេសកម្ពុជា ជាពិសេសសម្រាប់ Maddox ដែរ។
ជាក់ស្តែងតាមរយៈភាពយន្តមួយនេះ Angelina Jolie ថា ពួកគេអាចរៀនសូត្រថាគេជាអ្នកណា ហើយបានស្គាល់ពីជាតិសាសន៍របស់គេ៕
ស្តាប់វីដេអូសម្ភាសន៍ពិសេសរវាងក្រុមការងារ Sabay ជាមួយ អ្នកស្រី អ៊ឹង លួង៖