កុមារីអាយុ៦ឆ្នាំ ក្លាយជាគ្រូពេទ្យជួយសង្គ្រោះ ថែមទាំងនិយាយគួរឲ្យស្ងើច

2017-03-07 01:51:02
ចំនួនមតិ 0 | ចំនួនចែករំលែក 0

ចន្លោះមិនឃើញ

កុមារីអាយុទើបតែ៦ឆ្នាំម្នាក់ បានធ្វើឲ្យមហាជនជាច្រើនចាប់អារម្មណ៍តាមរយៈការជួយសង្គ្រោះអ្នកជំងឺជាមនុស្សធំៗជាមួយឪពុកម្ដាយ។

កុមារីនេះមានឈ្មោះ កាទូន ជាកូនរបស់អ្នកបើករថយន្តជួយសង្គ្រោះ និងម្ដាយជាគ្រូពេទ្យមធ្យម។ នាងចាប់ផ្ដើមជួយសង្គ្រោះចាប់តាំងពីអាយុនៅ ២ឆ្នាំមកម្ល៉េះ។ កាទូន រស់នៅខេត្តណាក់ខន រាជសីម៉ា ប្រទេសថៃ ត្រូវបានគេឃើញដើរជួយអ្នកជំងឺជាមួយឪពុកម្ដាយទាំងមិនរារែក និងឃើញរូបភាពហូរឈាម ខ្លះរហូតដល់អ្នកជំងឺស្លាប់នៅមុខក៏មាន តែនាងមិនរាថយឡើយ។

បើតាមប្រភពពីឪពុករបស់ កាទូន បង្ហើបឲ្យដឹងថា "នាងចាប់ផ្ដើមដើរជួយសង្គ្រោះជាមួយពួកយើងជាការងារស្ម័គ្រចិត្តតាំងពីអាយុ២ឆ្នាំ នាងដើរតាមយើង ហើយចែកអាហារដល់ជនរងគ្រោះទឹកជំនន់ផង។ នាងពេញចិត្តនឹងជួយអ្នកដទៃ ដោយមិនដែលត្អូញត្អែរទេ។"

ដ្បិតតែ កាទូន មិនទាន់ដឹងថា ទង្វើបែបនេះជាសកម្មភាពដ៏មានតម្លៃក្ដី នាងនៅតែជួយអ្នករបួសជានិច្ច។ កាទូន និយាយថា "ខ្ញុំចាំមិនបានថា នៅពេលណាខ្ញុំចាប់ផ្ដើមសកម្មភាពបែបនេះ ប៉ុន្តែខ្ញុំចាំឪពុកម្ដាយខ្ញុំតែងតែយកខ្ញុំទៅជាមួយជានិច្ច បង្រៀនខ្ញុំរបៀបព្យាបាលរបួស និងបញ្ជូនខ្ញុំឲ្យទៅជាមួយគ្រូស្ម័គ្រចិត្តផង។ បន្ទាប់មកខ្ញុំដឹង និងចាប់ផ្ដើមរៀនជួយអ្នកដទៃ។"

កាទូនបន្ត "មនុស្សជាច្រើនហាក់ចូលចិត្តខ្ញុំណាស់។ ពួកគេបបួលខ្ញុំថតជាមួយ និងឲ្យប្រាក់បន្តិចបន្តួចទិញនំញ៉ាំក៏មាន តែខ្ញុំយកប្រាក់ទាំងនោះជូនអ្នកក្រ និងមនុស្សចាស់បន្តទៀត។"

អ្វីដែលគួរឲ្យស្ងើចសរសើរ គឺនាងមិនដែលភ័យខ្លាចពេលឃើញឈាម សាកសព ឬខ្មោចឡើយ។ គេសួរថាហេតុអ្វីមិនខ្លាច នាងឆ្លើយទាំងជ្រួញចិញ្ចើមថា "ខ្ញុំមិនខ្លាចខ្មោចទេ យើងមិនដែលឃើញផ្ទាល់ភ្នែកសូម្បីតែម្ដង តែខ្ញុំបានឃើញសាកសពតាំងពីនៅតូច និងស៊ាំទៅហើយ។ ប៉ាខ្ញុំប្រាប់ថា យើងមិនត្រូវខ្លាចទេព្រោះយើងមកទីនេះ គឺដើម្បីជួយពួកគេ៕"