ហេតុផល ៦ យ៉ាងមនុស្សស្រីគួរពិចារណាឱ្យច្បាស់មុនចង់យកប្ដីចិត្តឯង

2017-04-06 01:04:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ការជ្រើសរើសគូស្រករ គឺជារឿងសំខាន់បំផុតក្នុងជីវិតមនុស្សម្នាក់ៗ ហើយការសម្រេចសម្រេចចិត្តជ្រើសរើសនរណាម្នាក់ដើររួមផ្លូវជីវិតកាន់តែសំខាន់ទៀត។ ការសម្រេចចិត្តជ្រើសរើសគូស្រករក្នុងសង្គមបច្ចុប្បន្នកូនស្រីមានសិទ្ធក្នុងការជ្រើសរើសដោយខ្លួនឯង មិនមែនសម័យកាលនំមិនធំជាងនាឡិទៀតទេ។ ដូច្នេះប្រសិនបើកូនស្រីសម្រេចចិត្តជ្រើសរើសគូស្រករដោយខ្លួនឯងទាំងស្រុងអាចមានឥទ្ធិពលអ្វីខ្លះ?

១. អារម្មណ៍ស្រឡាញ់ខ្លាំងឃើញអ្វីក៏ល្អ

តាមការលើកឡើងរបស់អ្នកស្រី វី សុធារី ទើបតែរៀបការហើយថ្មីៗ បាននិយាយថា ហេតុផលមួយដែលមិនគួរយកប្ដីតាមចិត្តខ្លួនឯងទាំងស្រុងនោះ ព្រោះនៅពេលដែលស្រឡាញ់មនុស្សម្នាក់ងប់ងុលខ្លាំងឃើញអ្វីក៏ល្អ ដូចពាក្យ គេនិយាយថា "ឃ្លានឆ្ងាញ់ស្រឡាញ់ល្អ"។

ស្រ្តីទើបតែចូលរោងការហើយថ្មីៗនេះ លើកឡើងថា មុនសម្រេចចិត្តរៀបការជាមួយបុរសណាម្នាក់ មិនគួរមើលឃើញតែចំណុចល្អរហូតលែងមើលឃើញចំណុចអវិជ្ជមាននោះទេ លុះរៀបការហើយរស់នៅមិនចុះសម្រុងគ្នា។ ដូច្នេះគួរតែផ្ដល់ឱកាសឱ្យគ្រួសារជាអ្នកជួយប្រឹក្សាយោបល់ និងសិក្សាពីបុរសម្នាក់នោះផង ក៏មិនមានជាបញ្ហាអ្វីដែរ ប្រសិនបើម្នាក់នោះពិតជាមនុស្សល្អមែន។

២. ពេលមានបញ្ហាមិនសូវហ៊ានរត់រកឪពុកម្ដាយ

អ្នកស្រី វី សុធារី ដដែលបន្តទៀតថា ជាធម្មតាចំពោះមនុស្សស្រីដែលហ៊ានសម្រេចចិត្តយកប្ដី តាមចិត្តខ្លួនឯង គឺប្រាកដជាជាជឿជាក់ខ្លាំងលើការសម្រេចចិត្តរបស់ខ្លួន។ ដូច្នេះហើយក្នុងនាមជាកូនស្រីក៏ត្រូវតែពិភាក្សាជាមួយឪពុកម្ដាយឱ្យច្បាស់លាស់ដែរ ពីព្រោះទៅថ្ងៃក្រោយប្រសិនបើមាបញ្ហាអីមានគ្រួសារផ្ដល់កម្លាំងចិត្ត និងជួយដោះស្រាយ។ ប៉ុន្តែផ្ទុយមកវិញចំពោះកូនស្រីដែលជម្នះតែចិត្តខ្លួនឯង ពេលមានបញ្ហាអ្វីជាមួយស្វាមីមិនសូវហ៊ានរត់មករកឪពុកម្ដាយនោះទេ ទោះបីជាឪពុកម្ដាយមិនមានបញ្ហាអ្វីក៏ដោយ។

៣. ខាងប្រុសងាយនឹងបន្ទាបតម្លៃ

មកដល់ចំណុច នេះកញ្ញា សុជាតា និស្សិតជំនាញ International Business បានលើកឡើងថា នៅពេលដែលមានបញ្ហាក្នុងគ្រួសារ អាចជាជម្លោះទាស់ទែងពីរនាក់ស្វាមី ភាគីខាងប្ដីប្រាកដជាមិនញញើត ឬក្រែងចិត្តចំពោះភាគីខាងប្រពន្ធទេ ព្រោះអាចមានចិត្តមួយគិតថា នារីម្នាក់ហ្នឹងជាអ្នកសម្រេចចិត្តរួមរស់ជាមួយខ្លួនដោយខ្លួនឯង។ ដូច្នេះហើយយកល្អគួរតែ កុំជម្នះតែចិត្តខ្លួនឯងពេក ព្រោះបញ្ហាទាំងអស់នេះសុទ្ធតែអាចកើតឡើងបានជៀសមិនផុតទេ ក្នុងជីវិតប្ដីប្រពន្ធ។

៤. ប្រវត្តិសាវតារ

ត្រង់នេះមានន័យថា ចាស់ៗអាចដឹងរឿងប្រវត្តិសាវតារពីគ្រួសារខាងប្រុសច្រើន តាមរយៈការស្គាល់ ការរាប់អានរវាងចាស់ទុំ និងចាស់ទុំ។ ដូច្នេះឪពុកម្ដាយអាចដឹងពីប្រវត្តិសាវតារច្រើន ពីមនុស្សក្នុងសង្គមផងដែរ។ ហេតុផលនេះហើយ ទោះជាបច្ចុប្បន្នកូនស្រីអាចមានសិទ្ធក្នុងជ្រើសរើសគូស្រករយ៉ាងណាក៏ដោយ ក៏ចំណុចនេះមិនគួរធ្វេសប្រហែសដែរ ជម្រើសល្អបំផុតទុកឱ្យចាស់ៗជាអ្នកស៊ើបប្រវត្តិគ្រួសារភាគខាងប្រុសផង។ សុជាតា លើកឡើងបន្ថែមទៀត។

៥. ទំនាក់ទំនងគ្រួសារទាំងពីរមិនទាន់ស៊ីជម្រៅ

ពេលខ្លះការសម្រេចចិត្តរៀបការភ្លាមៗក្នុងរយៈពេលខ្លីពេក គឺមិនទាន់ធ្វើឱ្យទំនាក់ទំនងរវាងគ្រួសារទាំងពីរមានភាពល្អប្រសើរនោះទេ។ ដូច្នេះហើយគួរទុកពេលឱ្យគ្រួសារទាំងពីរមានទំនាក់ទំនងល្អប្រសើរសិន ព្រោះបើមានបញ្ហាអីទៅថ្ងៃក្រោយងាយស្រួលដោះស្រាយគ្នា។ ហេតុផលនេះហើយទើបកូនស្រីមិនគួរសម្រេចចិត្តភ្លាមបង្ខំឱ្យឪពុកម្ដាយកំណត់ថ្ងៃរៀបការនោះទេ។ នេះជាការលើកឡើងរបស់កញ្ញា ផល ធីតា និស្សិតឆ្នាំទី៤នៃសាកលវិទ្យាល័យបញ្ញាសាស្ត្រកម្ពុជា។

៦. ហាក់មើលរំលងការសម្រេចចិត្តឪពុកម្ដាយ

ចំណុចចុងក្រោយនេះ ពិតជាសំខាន់ខ្លាំងណាស់ ចំពោះកូនស្រីក្នុងការបំពេញតួនាទីជាកូនស្រី និងបំពេញមុខមាត់ជូនឪពុកម្ដាយ។ ឪពុកម្ដាយដែលស្រឡាញ់កូនខ្លាំងទោះបីកូនទាមទារអ្វីក៏យល់ព្រម សូម្បីរឿងជ្រើសរើសគូស្រករក៏ដោយ។ ដូច្នេះហើយបើសិនជាការសម្រេចចិត្តទាំងស្រុង ដោយខ្លួនឯងពេក ហាក់មើលរំលង និងមិនផ្ដល់ឱកាសឱ្យឪពុកម្ដាយយ៉ាងដូច្នោះដែរ។ ធីតា បន្ថែម៕

អត្ថបទ៖ វឌ្ឍនៈ