អេហ្ស៊ីបរកឃើញម៉ាំមី ៣៥០០ឆ្នាំចំនួន៨ គួរឲ្យភ្ញាក់ផ្អើល

2017-04-19 03:46:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមមន្ត្រីអេហ្ស៊ីបបានគាស់កកាយរកឃើញម៉ាំមីចំនួន ៨ស្រោបថ្មលាប ១០ពណ៌ និងរូបចម្លាក់តូចៗជាច្រើនផ្សេងទៀតក្នុងផ្នូរអាយុកាលជាង ៣៥០០ឆ្នាំនៅទីក្រុង Luxor។ នេះបើតាមក្រសួងផ្នែកវត្ថុបុរាណបានប្រកាសឲ្យដឹងនៅថ្ងៃអង្គារទី ១៨មេសា។

បេសកកម្មបុរាណវិទូអេហ្ស៊ីបនេះ បានរកឃើញមឈូសចំនួន ១០ ម៉ាំមីចំនួន ៨ ក្នុងតំបន់ Draa Abul Nagaa នៅភាគខាងត្បូងប្រទេស ក្នុងនោះមឈូសធំជាងគេមានរាងអក្សរធី (T) ដែលគេជឿថាជារបស់ចៅក្រមប្រចាំក្រុងឈ្មោះ Userhat សម័យអាណាចក្រថ្មី និងជាប្រភេទផ្នូរអភិជនតាំងពីឆ្នាំ ១៥០០ ដល់ ១០០០មុនគ.ស។

ពេលធ្វើកំណាយគេបានរើកម្ទេចកំទីចេញយ៉ាងថ្នមៗប្រមាណ ៤៥០ និងឃើញរូបចម្លាក់ម៉ាំមីតូចៗធ្វើពីដីឥដ្ឋ ឈើប្រមាណ ១០០០ ព្រមទាំងឆ្នាំងដីឥដ្ឋជាច្រើនទៀត។

លោក Waziri ប្រធានដឹកនាំបេសកកម្មរុករកវត្ថុបុរាណបញ្ជាក់ថា មានផ្នូរមួយក្នុងចំណោមផ្នូររកឃើញទាំង ១០ មានផ្ទុករូបចម្លាក់រៀបរាប់ពីរាជវង្សក្សត្រផ្សេងៗគួរឲ្យចាប់អារម្មណ៍។

ក្រសួងខាងលើសង្ឃឹមយ៉ាងមុតមាំថា ការរកឃើញថ្មីនេះនឹងជួយស្រោចស្រង់វិស័យទេសចរណ៍ឡើងវិញ ក្រោយទទួលរងផលប៉ះពាល់ដោយសារវិបត្តិនយោបាយក្នុងឆ្នាំ ២០១១ និងការវាយប្រហាររបស់ក្រុមរដ្ឋឥស្លាម (ISIL)ជាបន្តបន្ទាប់៕