គួរឲ្យអាណិតណាស់! ពិការជើងទាំងគូ តែខំតស៊ូមើលថែគ្រួសារ ជាង៤០ឆ្នាំ

2017-04-29 04:53:15
ចំនួនមតិ 0 | ចំនួនចែករំលែក 0

ចន្លោះមិនឃើញ

កសិករវ័យចំណាស់ម្នាក់ មានឈ្មោះថា Xi Tiangen ទទួលបានការកោតសរសើរយ៉ាងខ្លាំង ពីអ្នកនិយមប្រើប្រាស់បណ្ដាញអ៊ីនធឺណិត នៅទូទាំងប្រទេសចិន ចំពោះការខិតខំតស៊ូមើលថែគ្រួសាររបស់លោក អស់រយៈពេលជាង៤០ឆ្នាំ បើទោះបីជាពិការជើងទាំងគូក្តី។

បន្ទាប់ពីបាត់បង់ជើងទាំង២ នៅក្នុងគ្រោះថ្នាក់ដ៏រន្ធត់មួយ កាលពីអាយុ១៩ឆ្នាំ លោក Xi ក៏ចាប់ផ្ដើមរៀនប្រើដៃទាំងគូ ធ្វើការនៅកសិដ្ឋានរបស់គ្រួសារលោក ស្ថិតនៅក្នុងខេត្ត Henan។ ប៉ុន្តែ រឿងគ្រប់យ៉ាង ប្រែក្លាយកាន់តែយ៉ាប់យ៉ឺនសម្រាប់ លោក Xi នៅក្នុងឆ្នាំ១៩៨៦ នៅពេលដែលឪពុកលោក បានលាចាកលោកផុតទៅ បន្សល់ទុកលោក Xi ឲ្យមើលថែម្ដាយចាស់ជរា និងបងប្រុសពិការ តែម្នាក់ឯង។

ក្រៅពីការងារកសិកម្ម លោក Xi បច្ចុប្បន្នមានអាយុ ៦០ឆ្នាំ ក៏ធ្វើការងារផ្ទះជាច្រើន ដូចជា បោកគក់ និង ចម្អិនអាហារសម្រាប់ក្រុមគ្រួសាររបស់លោកផងដែរ។ មិនតែប៉ុណ្ណោះ លោក Xi បានបន្តមើលថែសាច់ញាតិ ២នាក់ទៀត រហូតដល់ម្ដាយរបស់លោកបានស្លាប់ ក្នុងឆ្នាំ ២០០៦ និងបងប្រុសស្លាប់ ក្នុងឆ្នាំ២០១៥។

ក្រោយមកលោក Xi បានទៅរស់នៅឯផ្ទះបងប្អូនជីដូនមួយរបស់លោក ប៉ុន្តែមិនទុកដៃទាំង២ឲ្យនៅទំនេរឡើយ ដោយបន្តធ្វើការងារកសិកម្មទៀត។

បច្ចុប្បន្ន បន្ទាប់ពីរឿងរ៉ាវរបស់លោក Xi ត្រូវបានលេចឮ សប្បុរសជនក្នុងតំបន់មួយចំនួន បានចាប់ផ្ដើមបរិច្ចាគប្រាក់ឧបត្ថម្ភបន្តិចបន្តួច ប្រមាណជា ២០ដុល្លារក្នុងមួយខែ ទៅដល់លោក Xi ៕