តាមពិត ប្រពន្ធមេដឹកនាំកូរ៉េខាងជើង គីម ជុងអ៊ុន គឺអតីតតារាចម្រៀងល្បីមួយរូប

2017-05-03 08:46:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មានជុំវិញគ្រួសាររបស់មេដឹកនាំផ្ដាច់ការរបស់កូរ៉េខាងជើង តែងស្ថិតក្នុងអាថ៌កំបាំង និងត្រូវបានលាក់ពីភ្នែកមហាជន ។ ចំពោះប្រវត្តិរបស់ភរិយាលោក ត្រូវបានបង្ហាញតែបន្តិចប៉ុណ្ណោះ មិនទូលំទូលាយឡើយ។

ប៉ុន្តែទោះជាមានលាក់លៀមយ៉ាងណាក៏ដោយ ក៏រឿងរ៉ាវជាប់ពាក់ព័ន្ធនឹង ភរិយារបស់លោក Kim Jong-Un លោកស្រី Ri Sol-Ju ត្រូវបានទម្លាយឲ្យដឹងដែរ។

យ៉ាងណាមិញ Ri Sol-Ju កើតថ្ងៃទី ២៨ ខែកញ្ញា ឆ្នាំ ១៩៨៩ នៅប្រទេសកូរ៉េខាងជើង ។ កាលពីថ្ងៃទី ២៥ ខែកក្កដា ឆ្នាំ ២០១២ លោកស្រីត្រូវបានប្រកាសជាសាធារណៈថាជាភរិយារបស់ លោក Kim Jong Un ។

ដោយឡែកបកទៅអតីតកាល មុនក្លាយជាស្ត្រីទី ១ របស់ប្រទេសកូរ៉េខាងជើង Ri Sol-Ju បានបញ្ចប់ការសិក្សានៅសាលា Geumsung 2 Middle School ក្នុងទីក្រុង Pyongyang និងបន្តការសិក្សានៅប្រទេសចិន ផ្នែកចម្រៀង និងតន្ត្រី ។ ក្រោយមកលោកស្រី ក៏បានក្លាយជាអ្នកចម្រៀងក្នុងក្រុមតន្ត្រីដ៏ល្បីមួយប្រចាំប្រទេសឈ្មោះថា "Pochonbo Electronic Ensemble”។

វិបសាយព័ត៌មាន JoongAng Ilbo និងសារព័ត៌មានមួយចំនួនបាននិយាយថា Ri Sol-Ju ជាតារាចម្រៀង ក្នុងក្រុមតន្រ្តី Unhasu Orchestra ដែលធ្លាប់បានទៅសម្ដែងនៅបរទេសជាច្រើនដង។

ជាក់ស្ដែងកាលពីឆ្នាំ ២០០៥ អតីតអ្នកចម្រៀងរូបនេះ ធ្លាប់បាន ធ្វើដំណើរទៅកាន់ប្រទេសកូរ៉េខាងត្បូង ដើម្បីចូលរួមព្រឹត្តិការណ៍ប្រកួតកីឡាប្រចាំតំបន់អាស៊ី ក្នុងនាមជាសមាជិកក្នុងក្រុមអបអរប្រចាំកូរ៉េខាងជើង ហើយក៏បានច្រៀងនៅឯពហុកីឡដ្ឋានបាល់បោះក្នុងទីក្រុង Incheon ផងដែរ។

ក្រៅពីនេះ Ri ក៏បានបង្ហាញខ្លួនក្នុងកម្មវិធីតន្ត្រីមួយក្នុងខែតុលា ២០១០ ត្រូវនឹងខួបទី៦៥នៃការបង្កើតគណបក្សពលករ និងបន្តបន្ទាប់ទៀត នាងក៏បានចូលរួមច្រៀងក្នុងកម្មវិធីអបអរបុណ្យចូលឆ្នាំថ្មី ២០១១ កូរ៉េខាងជើងទៀតផង។

រូបភាពពេលសម្ដែងនៅប្រទេសកូរ៉េខាងត្បូង ក្នុងឆ្នាំ ២០០៥

ក្រោយរៀបការជាមួយលោក Kim Jong Un ក្នុងឆ្នាំ ២០០៩ លោកស្រី ក៏នៅតែបន្តការងារជាអ្នកចម្រៀងដដែលក្នុងក្រុមតន្ត្រី Unhasu Orchestra ។ ការសម្ដែងចុងក្រោយរបស់ស្រ្តីទី ១របស់កូរ៉េខាងជើងរូបនេះ គឺនៅចំថ្ងៃបុណ្យចូលឆ្នាំ ថ្ងៃទី ១៧ ខែកុម្ភៈ ឆ្នាំ ២០១១។

ទោះជាយ៉ាងណាក្ដី ខាងមន្រ្តីរាជការក្នុងប្រទេសកូរ៉េខាងជើង នៅតែព្យាយាមបំបាត់នូវព័ត៌មានទាក់ទងនឹងប្រវត្តិជាតារាចម្រៀង របស់លោកស្រីទាំងអស់ ប៉ុន្តែនៅតែមិនអាចកំបាំងពីភ្នែកមហាជន ជាពិសេសសារព័ត៌មាននានាបានឡើយ៕

ប្រភព៖ Wikipedia | rendezvous-inmyblog.blogspot ប្រែសម្រួល៖ យី សុធារី