អារ៉ាប់រួម គ្រោងសណ្ដោងផ្ទាំងទឹកកកនៅអាកទិច មកច្នៃជាទឹកផឹក

2017-05-05 04:56:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសអារ៉ាប់រួមគ្រោងសណ្ដោងផ្ទាំងទឹកកកពីតំបន់ប៉ូលអាកទិចមកឆ្នេរសមុទ្ររបស់ខ្លួន ដើម្បីច្នៃទៅជាទឹកស្អាតសម្រាប់ទទួលទាន។

គម្រោងរបស់ក្រុមហ៊ុន The National Advisor Bureau Limited នឹងផ្ដល់ប្រភពទឹកស្អាតថ្មីមួយទៀតនៅក្នុងតំបន់ដោយសណ្ដោងអូសផ្ទាំងទឹកកកពីអាកទិចមកកាន់ឆ្នេរសមុទ្រ Fujairah អារ៉ាប់រួម។

នាយកគ្រប់គ្រងក្រុមហ៊ុនខាងលើលោក Al Shehi អះអាងថា ផ្ទាំងទឹកកកជាមធ្យមមានទឹកជាង ២០ពាន់លានហ្កាឡុង ឬប្រមាណ ៧៥ពាន់លានលីត្រដែលអាចផ្គត់ផ្គង់មនុស្សបាន ១លាននាក់រយៈពេល ៥ឆ្នាំ។

លោកបន្ថែមថា ផ្ទាំងទឹកកកទាំងនោះនឹងអាចជួយបង្កើត Micro-Climates ក្នុងតំបន់រួចនាំទឹកភ្លៀងឲ្យធ្លាក់មកទៀតផង។ ផ្ទាំងទឹកកកនេះ គឺមិនងាយរលាយពេលត្រូវកម្ដៅថ្ងៃដូចទឹកកកធម្មតាទេ វាត្រូវការពេលវេលាយូរក្នុងការរលាយ និងអាចស្ថិតនៅក្រោមទឹកបានយូរ។

ប្រភពដដែលបន្តថា ក្រុមហ៊ុនរបស់លោកព្យាករណ៍ថា គេនឹងត្រូវការពេលប្រមាណ ១ឆ្នាំដើម្បីនាំផ្ទាំងទឹកកកមកដល់ប្រទេសអារ៉ាប់រួម ហើយគម្រោងនឹងចាប់ផ្ដើមនៅចាប់ផ្ដើមដើមឆ្នាំ ២០១៨ ខាងមុខហើយ។ លើសពីនេះប្រសិនបើផ្ទាំងទឹកកកនាំមកដល់មាត់ឆ្នេរ នោះវានឹងទាក់ទាញអ្នកទេសចរថែមទៀតផង៕