ផ្លូវល្បឿនលឿនពីភ្នំពេញទៅបាវិត គ្រោងចំណាយថវិកាប្រមាណ ៣ពាន់លានដុល្លារ

2017-05-05 13:33:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្លូវល្បឿនលឿនពីភ្នំពេញទៅបាវិត ដែលគ្រោងនឹងសាងសង់ក្នុងពេលឆាប់ៗខាងមុខនេះ ត្រូវចំណាយថវិកាប្រមាណ ៣ពាន់លានដុល្លារសហរដ្ឋអាមេរិក។ នេះបើតាមការឱ្យពី ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនថ្លែងនៅក្នុងពិធីជំនួបទ្វេភាគីជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA)។

ឯកឧត្ដម ស៊ុន ចាន់ថុល ក៏បានឱ្យដឹងទៀតថា ក្រៅពីនោះនៅមាន គម្រោងជួសជុល និងស្ដារស្ពានជ្រោយចង្វា នឹងចាប់ផ្ដើមបន្ទាប់បោះឆ្នោតរួច។ គម្រោងបើកការដ្ឋានពង្រីកផ្លូវជាតិលេខ៥ ពី២គន្លងទៅ៤គន្លង ចាប់ពីបាត់ដំបង ទៅស៊ីសាផុន ដែលកំពុងតែដំណើរការហើយ ប៉ុន្តែគ្រាន់តែមិនទាន់បើកជាផ្លូវការតែប៉ុណ្ណោះ ហើយក៏ផ្លូវល្បឿនលឿនដ៏សំខាន់មួយរបស់អាស៊ានក្នុងប្រទេសកម្ពុជា ដើម្បីដឹកទំនិញរវាងប្រទេស ថៃ និង វៀតណាម។

ក្រៅពីគម្រោងសំខាន់ៗ ដែលជប៉ុនបានឯកភាពផ្ដល់មកឱ្យកម្ពុជាហើយនោះ នៅមានគម្រោងសាងសង់កំពង់ផែទឹកជ្រៅមួយទៀត ដែលមានជម្រៅ ១៤ម៉ែត្រកន្លះ ហើយក៏មានការស្នើសុំ ឱ្យមានប្រព័ន្ធស្វ័យប្រវត្តិកម្មទៅលើការដឹកជញ្ជូនផ្លូវទឹក ព្រោះនៅពេលកប៉ាល់ចូលមកកម្ពុជាម្ដងៗត្រូវចំណាយពេលវេលាយូរ។

ចំពោះ ការចំណាយដំណាក់កាលដំបូងនេះរហូតទៅដល់ ៨០០លានដុល្លារអាមេរិក បូកបន្ថែមការចំណាយទៅលើផ្លូវល្បឿនលឿនពីភ្នំពេញទៅបាវិត រហូត៣ពាន់លានដុល្លារទៀត។ ចំណែកថវិកាទាំងនេះ គឺជាជំនួយឥតសំណងរបស់ជប៉ុនខ្លះ និងកម្ចីដែលមានអត្រាការប្រាក់ទាប ប៉ុន្តែថវិកាទាំងនេះស្ថិតនៅដំណាក់កាលពិភាក្សាបន្តទៀត៕

អត្ថបទ៖ វឌ្ឍនៈ