៤កន្លែង ជាតំបន់កម្សាន្តល្បីបំផុតប្រចាំ ខេត្តកំពង់ធំ

2017-05-16 03:10:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ខេត្តកំពង់ធំ មានទីតាំងនៅចំណុចកណ្ដាលប្រទេសកម្ពុជា ហើយកំពង់ធំ ជាខេត្តមួយក្នុងចំណោមខេត្តប្រាំ ដែលព័ទ្ធជុំវិញទន្លេសាប និង សម្បូរទៅដោយទីតាំងប្រវត្តិសាស្ត្រ ដូចជាប្រាសាទដែលបន្សល់ទុកមុន សម័យអង្គរ។ និយាយអំពីតំបន់កម្សាន្តវិញ គឺមាន ៤ កន្លែង ដែលភ្ញៀវទេសចរកម្រនឹងរំលងឲ្យតែបានដល់ខេត្តនេះ៖

១. ប្រាសាទសំបូរព្រៃគុហ៍៖ ភ្ញៀវទេសចរទាំងឡាយដែលបានទៅខេត្តកំពង់ធំ គឺកម្រនឹងរំលងរមណីយដ្ឋានប្រវត្តិសាស្ត្រ ប្រាសាទសំបូរព្រៃគុហ៍។ ប្រាសាទនេះ គឺជាជារាជធានីសម័យបុរាណមួយដែលមានប្រាសាទថ្មដុតប្រមាណជាពីររយនៅក្នុងខេត្តនេះ។ ទីក្រុងនេះបានកសាងឡើងអំឡុងរជ្ជកាលព្រះបាទឦសានវរ្ម័ន នៅពេលដែលទ្រង់ផ្សះផ្សាបានដោយជោគជ័យរវាងចេនឡាគោក និងបូរណភាពទឹកដីខ្មែរដីទឹក នៃចេនឡាទឹក។ សំបូរព្រៃគុហ៍ជារាជធានីខ្មែរជាច្រើនសតវត្ស។

២. រមណីយដ្ឋានភ្នំសន្ទុក៖ ភ្នំសន្ទុកត្រូវបានគេចាត់ទុកថា ជារមណីយដ្ឋានធម្មជាតិផង និង ប្រវត្តិសាស្ត្រផង ដែលល្បីល្បាញនៅក្នុងខេត្តកំពង់ធំ។ រមណីយដ្ឋាននេះ មានចម្ងាយប្រមាណជា ១៧គីឡូម៉ែត្រ ពីទីរួមខេត្ត ស្ថិតនៅក្នុងភូមិកកោះ ឃុំកកោះ ស្រុកសន្ទុក។ នៅលើភ្នំនេះមានរូប ពុទ្ធបដិមា, ប្រាសាទតេជោក្រហមក, ចម្លាក់សុដន់ក្រមុំ និងមេម៉ាយ អមរណ្ដៅអណ្ដូងតាប្រេង, ប្រាសាទថ្មអណ្ដែត, កន្លែងបោះកាក់ផ្សង និង ហ្វូងស្វា រាប់រាយក្បាល ជាទីចាប់អារម្មណ៍របស់ភ្ញៀវទេសចរណ៍ ដែលបានឡើងទៅលេងភ្នំមួយនេះ។

ចម្លាក់សុដន់ក្រមុំ និង មេម៉ាយ អមរណ្ដៅអណ្ដូងតាប្រេង

ប្រាសាទតេជោក្រហមក

ថ្មអណ្ដែត

កន្លែងបោះកាក់ផ្សង

៣. រមណីយដ្ឋានព្រៃប្រស់៖ ព្រៃប្រស់ជាកន្លែងលំហែកាយមួយ ដែលមានចម្ងាយពីក្រុងកំពង់ធំ ១៦គីឡូម៉ែត្រ។ កន្លែងនេះ ភាគច្រើនភ្ញៀវតែងតែឈប់សម្រាកញ៉ាំអាហារ ហើយថ្ងៃចុងសប្ដាហ៍ក៏មានអ្នកទៅអង្គុយលេងច្រើនដែរ ត្បិតអីវាមានខ្យល់អាកាសបរិសុទ្ធ និងទេសភាពស្អាតណាស់។

៤. រមណីយដ្ឋានបឹងសំរឹទ្ធិ៖ បឹងសំរឹទ្ធិ គឺជារមណីយដ្ឋានដែលទើបតែបង្កើតឡើងទេ ប៉ុន្តែកំពុងតែទាក់ចិត្តភ្ញៀវខ្លាំងមែនទែន ព្រោះកន្លែងនេះមានការកម្សាន្តច្រើន ហើយផ្ទៃដីដល់ទៅ ៤៧ហិកតារឯណោះ។ មិនត្រឹមតែជាកន្លែងសម្រាប់កម្សាន្តធម្មតាទេ បឹងសំរឹទ្ធិក៏ជាទីពេញនិយមសម្រាប់អ្នកទៅថត Pre-Wedding ផងដែរ។