Real Madrid បាន​គ្រង​ជើង​ឯក​ La Liga ជា​លើក​ទី​៣៣​ក្នុង​ប្រវត្តិ​សាស្ត្រ​របស់​ខ្លួន​ក្រោយ​យក​ឈ្នះ Malaga ក្នុង​លទ្ធផល​ ២-០។

ការ​ប្រកួត​នៅ​ទឹកដី La Rosaleda កាល​ពី​យប់​មិញ ចាប់​ផ្ដើម​លេង​បាន​តែ​២​នាទី Isco បញ្ជូន​បាល់​យ៉ាង​ល្អ​ឲ្យ Ronaldo ញាក់​ដាច់​អ្នក​ចាំ​ទី​ហើយ​ស៊ុត​នាំ​មុខ ១-០។ នៅ​នាទី​ ទី​២០​ ខ្សែ​ប្រយុទ្ធ​ Ramírez មាន​ឱកាស​ទាត់​បាល់​ Free Kick ចូល​មុំ​កៅសិប​តែ Navas លោត​ទះ​ចេញ​បាន​សម្រេច។ លុះ​ដល់​នាទី​៣៣ Ronaldo បាន​ស៊ុត​មួយ​ជើង​ទៀត​ តែ​ត្រូវ​ជួយ​សង្គ្រោះ​ដោយ​អ្នក​ចាំទី។

ក្នុង​វគ្គ​ទី​ពីរ Benzema បាន​បន្ថែម​គ្រាប់​ទី​២ នៅ​នាទី ៥៥ ក្រោយ​ការ​លើក​បាល់​​ជ្រុង​របស់​ Kroos។ លទ្ធផល​នេះ​មិន​មាន​ការ​ប្រែប្រួល​ទេ។ ចប់​ការ​ប្រកួត​ Real Madrid បាន​យក​ឈ្នះ Malaga ២-០ ហើយ​ក្លាយ​ជា​ជើង​ឯក​ La Liga រដូវ​កាល​នេះ។

នេះ​គឺ​ជា​ការ​ឈ្នះ​ជើង​ឯក​លីគ​កំពូល​អេស្ប៉ាញ​​ជា​លើក​ដំបូង​របស់​ក្រុម​រហស្សនាម​ថា​ ស្ដេច​.ស ក្នុង​រយៈ​ពេល​៥​ឆ្នាំ​ បន្ទាប់​ពី​ពួក​គេ​ធ្លាប់​ឈ្នះ​ចុង​ក្រោយ​បំផុត​កាល​ពី​ឆ្នាំ​២០១២ ហើយ​វា​ក៏​លើក​ដំបូង​ផង​ដែរ​ក្រោម​ការ​ដឹកនាំ​របស់​លោក Zinedine Zidane៕

ប្រភព៖ theguardian   ប្រែ​សម្រួល៖ វីរ័ត្ន