រកឃើញមូលហេតុគួរឲ្យភ្ញាក់ផ្អើល ដែលស្រ្តីចិនបុរាណ ពត់ប្រអប់ជើងបែបនេះ

2017-05-27 03:23:41
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងប្រទេសចិន ស្ត្រីបានពត់ប្រអប់ជើងរបស់ពួកគេ ដើម្បីទទួលបានជើងរាងផ្កាឈូក (Golden Lotus Feet) ដោយជឿជាក់ថា វានឹងធ្វើឲ្យស្ត្រីកាន់តែគួរឲ្យស្រលាញ់ និងត្រូវបុរសៗចង់បាន។ ទោះជាយ៉ាងណា ការស្រាវជ្រាវថ្មីមួយ បានបង្ហាញថា វាអាចនឹងមិនមែនជាមូលហេតុ ដែលស្រ្តីបុរាណចិន ស៊ូទ្រាំការអនុវត្តដ៏ឈឺចាប់នេះឡើយ។

លោក Lauren Bossen សហនិពន្ធសៀវភៅ «Bound feet, Young hands» បាននិយាយថា គំនិតនៃការពត់ប្រអប់ជើង ដែលត្រូវគេមើលឃើញថា ជាវិធីមួយដើម្បីផ្គាប់ចិត្តមនុស្សប្រុស គឺជាការយល់ច្រឡំយ៉ាងទូលំទូលាយមួយ។ នេះបើយោងតាមសារព័ត៌មាន CNN។

នៅក្នុងឆ្នាំ ២០១៥ សារព័ត៌មានចិន SCMP បានឲ្យដឹងថា ការពត់ប្រអប់ជើងបែបនេះ ត្រូវបានគេជឿជាក់ថា ដើម្បីធ្វើឲ្យសាច់ដុំត្រគាកតឹងខុសពីធម្មតា ព្រោះវាបង្ខំឲ្យស្ត្រីទាំងនោះ ដើរក្នុងលក្ខណៈរៀបឫកពា ដែលនាំឲ្យមានការគិតថា វាធ្វើឲ្យសាច់ដុំទ្វារមាសតឹង និងផ្ដល់នូវការពេញចិត្តដល់បុរស ចំពោះរឿងផ្លូវភេទ។

ប៉ុន្តែ លោក Bossen បានអះអាងថា ការពត់ប្រអប់ជើងបែបនេះ កើតមានឡើងដោយសារតែ ការចូលរួមចំណែកសេដ្ឋកិច្ច។ វាគឺជាដំណើរការដ៏ឈឺចាប់ ដែលកំណត់ការចល័ត ឬផ្លាស់ទីរបស់ស្ត្រី ហើយវាបានក្លាយជាវិធីមួយ ដើម្បីធ្វើឲ្យប្រាកដថា ស្ត្រីដែលត្រូវបានពត់ប្រអប់ជើង អង្គុយ និងធ្វើការ ដូចជា ប៉ាក់ខោអាវ សំពត់ សំណាញ់ កន្ទេល និង ស្បែកជើង ជាដើម។

ជាមួយគ្នានេះដែរ លោក Bossen បានធ្វើការសម្ភាសន៍ស្ត្រីវ័យចំណាស់ ប្រមាណជា ១ ៨០០ នាក់ នៅតាមទីជនបទនៃប្រទេសចិន ដើម្បីជីកកកាយកាន់តែជ្រៅ ទៅក្នុងប្រពៃណីបុរាណដ៏ល្បីល្បាញមួយនេះ។

ស្ត្រីបុរាណម្នាក់ដែលត្រូវលោក Bossen សម្ភាសន៍ បាននិយាយថា «ម្ដាយរបស់ខ្ញុំ បានពត់ប្រអប់ជើងរបស់ខ្ញុំ នៅពេលខ្ញុំមានអាយុប្រហែល ១០ ឆ្នាំ។ នៅអាយុប្រហែល ១០ ឆ្នាំ ខ្ញុំបានចាប់ផ្ដើមបង្វិលកប្បាស។ រាល់ពេលដែលគាត់ (ម្តាយ) បានពត់ជើងរបស់ខ្ញុំ វាពិតជាឈឺណាស់ រហូតដល់ខ្ញុំយំ»៕

ប្រភព៖ CNN | Scmp | nextshark ប្រែសម្រួល៖ សេង ឡុង