Sabay នឹងចាត់ការតាមផ្លូវច្បាប់ចំពោះ វិបសាយមួយចំនួនដែលប្រើប្រាស់ Logo និង ព័ត៌មាន Sabay ពុំមានការអនុញ្ញាត

2017-05-28 08:40:41
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយរយៈចុងក្រោយនេះ Sabay បានកត់សម្គាល់ឃើញថា បណ្ដាញសារព័ត៌មានមួយចំនួនជាពិសេសគេហទំព័រ បានយកព័ត៌មាន ដូចជា រូបភាព វីដេអូ អត្ថបទ និង បានប្រើប្រាស់ Logo របស់ក្រុមហ៊ុន Sabay យកទៅប្រើប្រាស់ពុំមានការអនុញ្ញាត ដែលធ្វើឲ្យសាធារណៈជនមានការយល់ច្រឡំ មកលើវិបសាយ Sabay។ ទង្វើនេះគឺជាការរំលោភច្បាប់ កម្មសិទ្ធិបញ្ញាផង និង រំលោភលើច្បាប់ស្ដីពី "ម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់" ចុះថ្ងៃទី ០៧ ខែកុម្ភៈ ឆ្នាំ ២០០២ផង។

ដូច្នេះ Sabay ជាក្រុមហ៊ុនDigital ទំនើប និងជាបណ្ដាញសារព័ត៌មានអនឡាញសំបូរបែបឈានមុខគេនៅប្រទេសកម្ពុជា នឹងចាត់វិធានការតាមផ្លូវច្បាប់ចំពោះបុគ្គល ឬ អង្គភាពណា ដែលបានយកផលិតផលរបស់ Sabay មិនមានការអនុញ្ញាត ដូចជា អត្ថបទ រូបភាព វីដេអូ ជាដើម។ មួយទៀត បណ្ដាញសារព័ត៌មានអនឡាញមួយចំនួនដែលបានប្រើប្រាស់ឈ្មោះ រូបភាព Logo Sabay ឬ យកឈ្មោះ Sabay ទាំងអក្សរ ឬអានជាសូរសៀងស្រដៀងនឹងក្រុមហ៊ុន Sabay ដែលធ្វើឲ្យសាធារណជនមានការភ័ន្តច្រឡំ Sabay នឹងចាត់ការតាមផ្លូវច្បាប់ ព្រោះគេហទំព័រ Sabay បានចុះបញ្ជីនៅក្រសួងព័ត៌មានត្រឹមត្រូវ និង ក្រុមហ៊ុន Sabay បានចុះបញ្ជីនៅក្រសួងពាណិជ្ជកម្ម រួមទាំង ពាណិជ្ជនាមផង។

ចាប់ពីពេលនេះ សូមសាធារណជនឈប់មានការភ័ន្តច្រឡំ ហើយគេហទំព័ររបស់ Sabay ដែលត្រឹមត្រូវ គឺមានតែមួយគត់ តាមរយៈអាសយដ្ឋាន www.news.sabay.com.kh។ ដូច្នេះបើគេហទំព័រ បណ្ដាញសារព័ត៌មានណាដែលមានអាសយដ្ឋានស្រដៀងគ្នានេះ Sabay សូមច្រាន នឹងចាត់វិធានការតាមផ្លូវច្បាប់ដោយផ្អែកលើច្បាប់ កម្មសិទ្ធិបញ្ញា និង "ម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់"។

វិបសាយមួយនេះបានប្រើប្រាស់ឈ្មោះ និង Logo ស្រដៀងនឹងក្រុមហ៊ុន Sabay ហើយបានផ្សព្វផ្សាយព័ត៌មានមួយចំនួនដែលធ្វើឲ្យសាធារណជនមានការភ័ន្តច្រឡំ