សុនខពិការជាច្រើនក្បាល កែប្រែវាសនាថ្មី ដោយសារគូស្នេហ៍ចិត្តធម៌ច្នៃរទេះរុញឲ្យ

2017-06-08 10:19:45
ចំនួនមតិ 0 | ចំនួនចែករំលែក 0

ចន្លោះមិនឃើញ

សុនខពិការជាច្រើនក្បាលនៅកោះតៃវ៉ាន់ បានទទួលឱកាសដើរម្ដងទៀតហើយ ដោយសារតែរទេះរុញកង់បួនដែលបង្កើតឡើងដោយអ្នកស្រលាញ់សត្វមួយរូប។

លោក Pan Chieh អាយុ ៤០ឆ្នាំជាជាងម៉ាស៊ីន បានលះបង់កម្លាំងកាយចិត្តផលិតរទេះរុញកង់បួនសម្រាប់សត្វ បន្ទាប់ពីមិត្តភ័ក្ដិរបស់គាត់ម្នាក់ជួយសង្គ្រោះសុនខរបួសមួយក្បាល តែរកទិញរទេះរុញបែរជាមានតម្លៃថ្លៃ។

លោក Pan រៀបរាប់ថា "សុនខពិការដំបូងគេ ខ្ញុំបានជួយសង្គ្រោះទាំងស្រុងដោយប្រើប្រាស់រទេះរុញច្នៃពីឈើ ហើយធ្វើឲ្យខ្ញុំកាន់តែមានទំនុកចិត្ត"។ ក្រោយមកបុរសចិត្តធម៌បានច្នៃចេញពីបំពង់ដែកព្រោះវាមានតម្លៃតែ ៣០ដុល្លារប៉ុណ្ណោះ គឺថោកជាងតម្លៃរទេះរុញលើទីផ្សារប្រមាណ ១ ភាគ ៣។

នៅរៀងរាល់ថ្ងៃចុងសប្ដាហ៍ លោក និងមិត្តស្រីបានបបួលគ្នាច្នៃរទេះរុញ ទុកសម្រាប់ឲ្យសុនខនានានៅទូទាំងកោះតៃវ៉ាន់ និងជាធម្មតាពួកគាត់តែងតែប្រគល់ជូនមិនគិតថ្លៃ ពេលដឹងថា សុនខពិការគឺជាសុនខអនាថា។

មានសុនខ និងឆ្មាជាច្រើនក្បាល បានប្រឈមនឹងគ្រោះថ្នាក់ដោយសាររថយន្តបុក ឬជាប់អន្ទាក់របស់គេ។ បើតាមតួលេខអង្គការ The Animal Protection Information បានបង្ហាញថា សុនខអនាថានៅតៃវ៉ាន់មានប្រមាណជិត ១៣ម៉ឺនក្បាល កាលពីចុងឆ្នាំ ២០១៥៕