Galaxy C10 រំពឹង​ថា​នឹង​បង្ហាញ​វត្តមាន​នៅ​​អំឡុង​ត្រីមាស​ទី​ ៣ ​នៃ​ឆ្នាំ​ ២០១៧ នេះ​ ហើយ​វា​នឹង​ជា​ត្រកូល​ Galaxy ដំបូង​គេ​​ដែល​មាន​បំពាក់​​ប្រព័ន្ធ​កាមេរ៉ា​ភ្លោះ។

វិបសាយ​ Asia Business Daily ​បាន​​ឲ្យ​ដឹង​ថា​​ក្រុមហ៊ុន​ Samsung ​ប្រទេស​ចិន​បាន​តេស្ត​​​ម៉ាស៊ីន​ Galaxy C10 រួច​ទៅ​ហើយ ដោយ​វា​មាន​បំពាក់​នូវ​បន្ទះ​ឈីប​ Snapdragon 660 អម​ដោយ​ RAM ទំហំ​ 6 GB។ ប្រភព​ដដែល​លើក​ឡើង​ថា​​ប្រសិន​បើ​បន្ទះ​ឈីប​ Snapdragon 660 មាន​មិន​គ្រប់​គ្រាន់​តាម​តម្រូវ​ការ​ទេ នោះ​គេ​អាច​នឹង​ប្រើ​បន្ទះ​ឈីប​ Exynos 7872 ផលិត​ដោយ​ Samsung ផ្ទាល់។

ចចាមអារ៉ាម​មួយ​ចំនួន​លើក​ឡើង​ថា​​ប្រព័ន្ធ​កាមេរ៉ា​ភ្លោះ​របស់​ Galaxy C10 នឹង​​មាន​ជា​ប្រភេទ​​ឡេន​​ Wide-Angle បូក​ជា​មួយ​នឹង​ឡេន​ប្រភេទ Telephoto ដូច​នៅ​លើ​ iPhone 7 Plus។ ប៉ុន្តែ​មក​ទល់​ពេល​នេះ​មិន​ទាន់​មាន​ភស្តុតាង​បញ្ជាក់​ពី​ចចាមអារ៉ាម​នេះ​ឡើយ។ ដោយ​ឡែក​អេក្រង់​វិញ​ជា​ប្រភេទ Full HD ដែល​មាន​ទំហំ​ ៦ អ៊ីញ, អង្គ​ផ្ទុក​ទិន្នន័យ​មាន​ទំហំ​ 64 GB ឬ 128 GB និង មាន​ថ្ម​ដែល​មិន​អាច​ដោះ​ចេញ​បាន​ទំហំ​ 4000 mAh។

ចំពោះ​តម្លៃ​វិញ​នឹង​មាន​ចាប់​ពី​ ៣ ៤៩៩ យ័ន (ប្រហែល​ ៥១៥ ដុល្លារ) សម្រាប់​ប្រភេទ​អង្គ​ផ្ទុក​ទិន្នន័យ​មាន​ទំហំ​ 64 GB ហើយ​នឹង​មាន​លក់​ផ្ដាច់​មុខ​លើ​ទីផ្សារ​ប្រទេស​ចិន៕​​​​​

ចុចអាន៖

• ទើប​តែ​ដឹង​ថា Sticker កូន​ឆ្កែ​ពណ៌​ស​ មាន​រឿង​ទាក់ទង​ជាមួយ​ស្ថាបនិក Facebook

• តិច​អត់​ដឹង​មុខងារ​ថ្មី​លើ iOS 11 អាច​លើក​ទទួល​ការ​ Call ​ចូល​ដោយ​ស្វ័យប្រវត្តិ

• ស្ពត​ពាណិជ្ជកម្ម iPad Pro ​ថ្មី ដុត​អ្នក​ឱ្យ​លែង​ចង់​ប្រើ​កុំព្យូទ័រ [វីដេអូ]

ប្រភព៖ GSMarena   ប្រែ​សម្រួល៖ សុខហេង