ជាស្ដ្រីកំដរភ្ញៀវ មានការលំបាកខុសពីកិច្ចការ របស់នារី ដទៃទៀត

2017-06-13 04:19:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថិតនៅក្រោមពន្លឺភ្លើងពណ៌ផ្ទៃមុខលម្អរបន្ថែមដោយក្រេមម្សៅយ៉ាងស្រស់ផូរផង់ រួមទាំងឈុតសំលៀក បំពាក់បង្ហាញនូវភាពសិចស៊ីដ៏ជាទីពេញភ្នែកពីសំណាក់បុរសៗ កញ្ញា ឌីណា និងមិត្តនារីដទៃទៀតកំពុងតែអង្គុយតម្រៀបគ្នាជាជួរនៅពីមុខហាង ខារ៉ាអូខេដើម្បីរង់ចាំភ្ញៀវមកជ្រើសរើសយកទៅអង្គុយកំដរច្រៀងរាំ ផឹកស៊ីយ៉ាងសប្បាយក្អាក្អាយ។

ជានារីកំដរភ្ញៀវច្រៀងរាំ ផឹកស៊ី គឺត្រូវផ្ដល់ភាពសប្បាយ រីករាយជូនភ្ញៀវដែល ដែលមើលទៅហាក់ដូចជានារីដែលមិនចេះខ្វល់ខ្វាយ និងមានទុក្ខព្រួយអ្វីនៅក្នុងខ្លួនសោះឡើយ។ នេះជាសម្ដីរបស់កញ្ញា ឌីណា អាយុ ២៤ឆ្នាំ ជានារីបម្រើសេវាកម្សាន្តនៅក្នុងហាងខារ៉ាអូខេមួយកន្លែងនៅម្ដុំផ្លូវបឹងត្របែក ។

ដឹងតារាប្រុសៗចូលខារ៉ាអូខេឲ្យលុយធីបនាងៗប៉ុន្មានអត់?

កញ្ញាបានបន្ដថា ជាស្ត្រីកំដរភ្ញៀវមានការលំបាកខុសពីកិច្ចការរបស់នារីដទៃទៀត ដែលពួកគាត់មានសមត្ថភាព និងមានចំណេះដឹងខ្ពស់អាចរកបានការងារល្អៗ ហើយពួកគាត់មានភាពរីករាយ និងសប្បាយចិត្តនឹងការងារដែលគាត់កំពុងធ្វើ បើទោះបីជាការងារពួកគាត់មានការលំបាកខ្លះ តែពួកគាត់អាចមានពេលវេលា និងថ្ងៃសម្រាកគ្រប់គ្រាន់។

សម្រាប់ការងារនារីកំដរភ្ញៀវនៅក្នុងហាងខារ៉ាអូខេវិញត្រូវបាន ឌីណា និយាយថា ខ្ញុំជួបផលលំបាកជាច្រើន ។ រៀងរាល់ថ្ងៃភ្ញៀវតែងតែបង្ខំឲ្យខ្ញុំញ៉ាំគ្រឿងស្រវឹងច្រើន បើខ្ញុំមិនញុំាគេនឹងខឹងហើយប្រាប់មេការឲ្យដូរខ្ញុំចេញ នឹងត្រូវមេការស្តីឲ្យទៀត។ កញ្ញាបន្តថា ពេលខ្លះខ្ញុំត្រូវបានភ្ញៀវលូកលាន់បំពាន់លើរូបកាយ ហើយខ្ញុំបានបដិសេធមិនឲ្យលូកលាន់ដោយខ្ញុំប្រកែក គេក៏ឲ្យខ្ញុំចេញពីបន្ទប់ និងមិនឲ្យលុយធីបនោះទេ៕

កញ្ញាបានបន្ដទៀតថា ដោយការងារនេះត្រូវទទួលទានគ្រឿងស្រវឹងច្រើនពីមួយថ្ងៃទៅមួយថ្ងៃ ដែលមានថ្ងៃខ្លះខ្ញុំធ្លាក់ខ្លួនឈឺ ហើយធ្វើទុក្ខខ្លាំងជាងគេគឺក្រពះ ដែលធ្វើឲ្យខ្ញុំមិនអាចទៅធ្វើការរួច មិនបានលុយធីប ហើយថែមទាំងត្រូវថៅកែហាងកាត់ប្រាក់ខែមួយថ្ងៃ៥ដុល្លារទៀត ។

ដោយខ្លាចត្រូវថៅកែហាងកាត់ប្រាក់ខែ នឹងអត់បានលុយធីបផង កញ្ញា ឌីណា ប្រាប់ថា ពេលខ្លះគឺខ្ញុំត្រូវបង្ខំចិត្តទៅធ្វើការទាំងឈឺ បើមិនទៅគឺអត់មានលុយសម្រាប់ចាយប្រចាំថ្ងៃទេ ព្រោះ ប្រាក់ខែ ១១០ ដុល្លារក្នុងមួយខែ ជាចំនួនមិនគ្រប់គ្រាន់សម្រាប់ចិញ្ចឹមជីវិត និងថ្លៃផ្ទះ ថ្លៃទឹកភ្លើងនោះទេ ពីព្រោះខ្ញុំត្រូវចំណាយយ៉ាងហោច ១៥ ០០០ រៀលសម្រាប់ម្ហូប និងការផាត់មុខ ធ្វើសក់ជារៀងរាល់ថ្ងៃ៕

អត្ថបទ៖ ហេង នាង (CCJ)