អ្នកណាថាថ្នាក់ IT គ្មានស្រីស្អាត! កន្និដ្ឋា ស្រីស្អាតពីបាត់ដំបងចាប់ជំនាញ IT ជម្នះទស្សនៈជុំវិញ

2017-06-14 02:11:15
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមថ្នាក់ IT នានា រមែងឃើញមានសិស្សប្រុសភាគច្រើន ហើយសិស្សស្រីមានត្រឹមតែ ២ ទៅ ៣ នាក់ប៉ុណ្ណោះក្នុងមួយថ្នាក់។

កញ្ញា ឆាយ កែវកន្និដ្ឋា ស្ថិតនៅក្នុងសិស្សស្រីតិចតួចនោះហើយដែលកំពុងចាប់ជំនាញព័ត៌មានវិទ្យានៅសាកលវិទ្យាល័យបាត់ដំបង។

យុវតីស្រស់សោភាកូនអ្នកបាត់ដំបងរូបនេះប្រាប់ Sabay ថា កត្តាដែលជំរុញឱ្យកញ្ញាចាប់សិក្សាលើជំនាញមាន ៣ ចំណុចធំៗ។

ចំណូលចិត្តតាំងពីតូច ព្រោះកញ្ញាយល់ថាតែបច្ចេកវិទ្យារុញឲ្យមានការបង្កើតគំហើញថ្មីជួយដល់សង្គម។ កញ្ញាផ្ទាល់ធ្លាប់ស្រមៃថានឹងផ្ដល់ភាពរីករាយក៏ដូចជាភាពងាយស្រួលទៅកាន់មនុស្សជុំវិញខ្លួន។
ដើម្បីជម្នះនឹងផ្នត់គំនិតសង្គម ដែលទស្សនៈមួយលើកឡើង ស្ត្រីបង្វិលជើងចង្ក្រានមិនជុំ ដែលកញ្ញាចង់រៀនឲ្យបានខ្ពង់ខ្ពស់ដូចមនុស្សប្រុសដែរ។
ទីផ្សារការងារបច្ចេកវិទ្យាមានភាពធំទូលាយ ជាកត្តាជំរុញឲ្យកញ្ញាសិក្សាជំនាញនេះ ព្រោះគិតថាអាចនឹងរកការងារបានស្រួល។

ទាក់ទងនឹងការសិក្សា កញ្ញាដឹងថាជំនាញព័ត៌មានវិទ្យាទាមទារឱ្យមានការចងចាំខ្ពស់ ហើយត្រូវអនុវត្តលំហាត់ដដែលៗ។ យុវវតីវ័យ ១៧ ឆ្នាំបន្តថា ការជ្រើសរើសជំនាញនេះសិក្សាក៏មានការជំទាស់ពីក្រុមគ្រួសារដែរ ព្រោះពួកគាត់គិតថាជំនាញនេះតម្រូវឱ្យមានការចំណាយពេលសិក្សាច្រើន និងត្រូវខិតខំខ្ពស់។ ប៉ុន្តែនាងបានព្យាយាមពន្យល់ទៅកាន់ក្រុមគ្រួសារ រហូតក្រោយពេលប្រលងបាក់ឌុបជាប់ រួចពួកគាត់ក៏យល់ព្រមតាមការសម្រេចចិត្តរបស់កញ្ញាតែម្តងទៅ។

និយាយពីគោលដៅខាងមុខ កន្និដ្ឋាចង់ចាប់យកដំណែងជាអ្នកសរសេរកម្មវិធី (Programmer) និងអ្នករចនាក្រាហ្វិក (Graphic Designer) ក៏ដូចចង់ក្លាយជាស្ត្រីម្នាក់ដែលជួយជំរុញវិស័យបច្ចេកវិទ្យាឱ្យមានការរីកចម្រើនព្រោះវាជាផ្នែកមួយនៃភាពងាយស្រួលក្នុងការរស់នៅរបស់មនុស្ស។

ចុងក្រោយកញ្ញាបានផ្ញើសារមួយទៅកាន់ក្មេងស្រីគ្រប់រូប កុំដោយសារតែគំនាបសង្គមនិងអ្នកនៅជុំវិញខ្លួនបោះបង់ក្ដីស្រមៃ ព្រោះយើងជាអ្នកគូសវាសវាដោយខ្លួនឯង។ ក្រៅពីនោះ មនុស្សស្រីនិងមនុស្សប្រុស មានសិទ្ធិស្មើគ្នា ម្ល៉ោះហើយអ្វីដែលមនុស្សប្រុសអាចធ្វើបាន មនុស្សស្រីក៏នឹងធ្វើបានដូចគ្នា។

អត្ថបទ៖ កៅ រក្សា