ទូរសព្ទឡើងកម្ដៅខ្លាំង គួរធ្វើដូចម្ដេច?

2017-06-17 08:22:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងការប្រើប្រាស់ទូរសព្ទប្រចាំថ្ងៃ អ្នកប្រើប្រាស់គ្រប់រូបជៀសមិនផុតនោះទេចំពោះបញ្ហាទូរសព្ទឡើងកម្ដៅ ដោយសារតែកត្តាមួយចំនួន។ វាក៏អាចធ្វើឲ្យគុណភាពថ្មទូរសព្ទថមថយផងដែរ។ ដូច្នេះ ដើម្បីការពារទូរសព្ទពីការឡើងកម្ដៅ អ្នកគួរតែ៖

ផ្អាកប្រើមួយសន្ទុះសិន

ដាក់ទូរសព្ទរបស់អ្នកចុះប៉ុន្មាននាទី ដោយគ្រាន់តែបញ្ឈប់រាល់សកម្មភាពនានា ដែលបង្កឲ្យទូរសព្ទឡើងកម្ដៅ។ ការធ្វើដូច្នេះ ជួយឲ្យដំណើរការភ្លើងនៅខាងក្នុងទូរសព្ទត្រូវបញ្ឈប់ ដែលនាំឲ្យកម្ដៅធ្លាក់ចុះវិញ។

ប្រើប្រាស់នៅក្នុងម្លប់

មិនត្រូវប្រើប្រាស់នៅក្រោមពន្លឺព្រះអាទិត្យក្ដៅខ្លាំងនោះទេ។ ស្មាតហ្វូនអាចបិទដោយស្វ័យប្រវត្តិ ក្នុងករណីដែលកម្ដៅនៅខាងក្នុង ឡើងដល់ចំណុចអាសន្ន។

បិទកម្មវិធីហ្គេមផ្សេងៗ

ការបើកកម្មវិធីហ្គេមច្រើនក្នុងពេលតែមួយ ទាមទារថាមពលថ្មកាន់តែខ្លាំង ហើយនៅពេលទូរសព្ទធ្វើការកាន់តែខ្លាំង វានឹងឡើងកម្ដៅ។ វាប្រៀបដូចជា Laptop ដែលដំណើរការកម្មវិធីធំច្រើនមុខ កង្ហារខាងក្នុងនឹងរោទ៍កាន់តែខ្លាំង ដើម្បីបាញ់ខ្យល់បញ្ចុះកម្ដៅ។

ដោះស្រោមទូរសព្ទចេញ

ស្រោមទូរសព្ទ ឬ Case មួយចំនួនអាចស្រូបយកកម្ដៅ ដែលភាយចេញពីទូរសព្ទ។ ដូច្នេះ អ្នកគួរតែដោះវាចេញ រាល់ពេលចេញទៅខាងក្រៅ ឬ នៅពេលដែលមានកម្ដៅថ្ងៃក្ដៅខ្លាំង។ ប៉ុន្តែប្រសិនបើអ្នកមិនចង់អនុវត្តតាមវិធីនេះ អ្នកគួរតែទិញស្រោមទូរសព្ទណា ដែលមិនស្រូបកម្ដៅ ឬចម្លងកម្ដៅពីទូរសព្ទ។

បន្ថយពន្លឺ

ការបើកពន្លឺ (Brightness) ខ្ពស់ពេក ធ្វើឲ្យទូរសព្ទកាន់តែទាមទារថាមពលថ្មខ្លាំង ដូចជាការបើកកម្មវិធីច្រើនក្នុងពេលតែមួយដែរ៕