កំពូល​អ្នក​មាន​បំផុត​១៥​នាក់​កំពុង​រស់​នៅ​ទី​ក្រុង​ឌូប៉ៃ

  • 2017-06-19 05:06:23
  • ចំនួនមតិ

ចន្លោះមិនឃើញ

ឌូប៉ៃ​ជា​ទី​ក្រុង​ទំនើប​ទាន់​សម័យ​​ដែល​ពោរពេញ​ដោយ​អ្នក​មាន​ទ្រព្យ​ធន​កំពុង​រស់​នៅ​​។ ​ពេល​​នេះ​សូម​បង្ហាញ​មុខ​កំពូល​អ្នក​មាន​​បំផុត​ទាំង​១៥​រូប​ដែល​កំពុង​រស់​នៅ​ក្នុង​ទី​ក្រុង​ស៊ីវិល័យ​​នៃ​ប្រទេស​អារ៉ាប់រួម។

១ លោក​ Mohamed Alabbar

លោក​មាន​ក្រុម​ហ៊ុន​អចលន​ទ្រព្យ​​ឈ្មោះ​ Emaar Properties បន្ទាប់​ពី​បាន​ជាប់​កំណត់​ត្រា​ពិភព​លោក​ក្រោយ​ពេល​សាង​សង់​អគារ Burj al Khalifa ដែល​ជា​អគារ​ខ្ពស់​ជាង​គេ​បំផុត​​លើ​លោក។ លោក​មាន​ទ្រព្យ​​ប្រមាណ​​៧៦​លាន​ដុល្លារ​អាមេរិក។

២ លោក​ Dhahi Khalfan Tammin

លោក​ជា​​មុខ​ដឹក​នាំ​កង​សន្តិសុខ​ជាតិ​​ General Security ប្រចាំ​ Emirate of Dubai និង​​ធ្លាប់​ជា​​អគ្គស្នងការ​នគរ​បាល​ឌូប៉ៃ​ ព្រម​ទាំង​ការងារ​ជា​ច្រើន​ទៀត។ លោក​មាន​ទ្រព្យ​សម្បត្តិ​​៨១​លាន​ដុល្លារ​អាមេរិក។

៣ លោក​ស្រី Sheikha Lubna Al Qasimi

លោក​ស្រី​បាន​ក្លាយ​ជា​ស្ត្រី​​អារ៉ាប់​ទី​មួយ​​ដែល​កាន់​តំណែង​រដ្ឋ​មន្ត្រី​ទី​ស្តីការ​គណៈ​រដ្ឋ​មន្ត្រី​ និង​ជា​រដ្ឋ​មន្ត្រី​កិច្ច​សហប្រតិបត្តិការណ៍​អន្តរជាតិ និង​ការ​អភិវឌ្ឍ។ ជាប់​ឈ្មោះ​ជា​ស្ត្រី​​មាន​ឥទ្ធិពល​​លើ​លោក​ លោក​ស្រី​មាន​ទ្រព្យ​សម្បត្តិ​៩០​លាន​ដុល្លារ​អាមេរិក។

៤ លោក​ Azad Moopen

លោក​ Moopen ជា​អតីត​គ្រូ​បង្រៀន​នៅ​​ប្រទេស​ឥណ្ឌា​ ប៉ុន្តែ​បាន​បោះ​បង់​ចោល​អាជីព​បង្រៀន​ និង​បើក​គ្លីនិក​មួយ​​នៅ​ទី​ក្រុង​​ឌូប៉ៃ​កាល​ពី​ឆ្នាំ​១៩៨៧។ ឥឡូវ​លោក​មាន​មន្ទីរ​ពេទ្យ​សម្ព័ន្ធ​ធំ​មួយ​​នៅ​ឌូប៉ៃ​ និង​សាខា​ជា​ច្រើន​ទៀត។ គ្រូ​ពេទ្យ​ជន​ជាតិ​ឥណ្ឌា​រូប​នេះ​មាន​ទ្រព្យ​សម្បត្តិ​១.០៣​ពាន់​លាន​ដុល្លារ​អាមេរិក។

៥ លោក​ Joy Alukkas

បុរស​ជំនួយ​ផ្នែក​គ្រឿង​អលង្ការ​នេះ​ជា​ជន​ជាតិ​ឥណ្ឌា ប៉ុន្តែ​ជា​​កំពូល​អ្នក​មាន​នៅ​ឌូប៉ៃ​ម្នាក់​ដែរ។ លោក​ត្រូវ​បាន​គេ​ដឹង​ថា មាន​ទ្រព្យ​សម្បត្តិ​​ចំនួន​១.៧២​ពាន់​លាន​ដុល្លារ​អាមេរិក។

៦ លោក​ Sunny Varkey

លោក​បើក​ក្រុម​ហ៊ុន​វិនីយោគ​អប់រំ GEMS Education ​ដែល​ជា​ស្ថាប័ន​គ្រប់​គ្រង​លើ​ជំនួយ​អប់រំ​ជា​ច្រើន​សាលា​រៀន​​នៅ​ជុំ​វិញ​ពិភព​លោក។ លោក​ត្រូវ​បាន​គេ​ដឹង​ថា មាន​ទ្រព្យ​សម្បត្តិ​២​ពាន់​លាន​ដុល្លារ​អាមេរិក។

៧ លោក Saif Al Ghurair

លោក​ជា​សមាជិក​នៅ​សភា​ពាណិជ្ជកម្ម​ និង​ក្រុម​​ប្រឹក្សា​ភិបាល​ឧស្សាហកម្ម​ឌូប៉ៃ​ ព្រម​ទាំង​ក្រុម​ប្រឹក្សា​​នាយក​ប្រតិបត្តិ​ឌូប៉ៃ។ លោក​​ត្រូវ​បាន​គេ​ដឹង​ថា មាន​ទ្រព្យ​សម្បត្តិ​២.១​ពាន់​លាន​ដុល្លារ​អាមេរិក។

៨​ លោក​ B.R. Shetty

លោក​ B.R Shetty ជា​អ្នក​ជំនួញ​មក​ពី​ប្រទេស​ឥណ្ឌា​ទៅ​ឌូ​ប៉ៃ​​តាំង​ពី​ឆ្នាំ​១៩៧២។ តាម​ពិត​លោក​ជា​អ្នក​​ជំនួញ​ផ្នែក​លក់​ឱសថ​ ប៉ុន្តែ​ទទួល​បាន​ជោគជ័យ​សម្បើម​ណាស់​ដែល​បាន​ក្លាយ​ជា​កំពូល​អ្នក​មាន​នៅ​ឌូប៉ៃ។ លោក​មាន​ទ្រព្យ​​សម្បត្តិ​ ៣.២​ពាន់លាន​ដុល្លារ​អាមេរិក។

៩​ លោក​ Hussain Sajwani

លោក​​ជា​ស្ថាបនិក​ក្រុម​​ហ៊ុន​អចលន​ទ្រព្យ​ Damac Properties ដែល​បាន​បង្កើត​តាំង​ពី​ឆ្នាំ​២០០២។ បន្ទាប់​មក​លោក​បាន​ពង្រីក​ការ​វិនីយោគ​ជា​ច្រើន​កន្លែង​នៅ​ឌូប៉ៃ​ដែល​នៅ​ពេល​​នេះ​មាន​ទ្រព្យ​សម្បត្តិ​ក្នុង​ដៃ​៣.៤​ពាន់​លាន​ដុល្លារ​អាមរិក។

១០ លោក​ Ravi Pillai

តាម​ពិត​លោក​ជា​កូន​អ្នក​ស្រែ​ចម្ការ​​ដែល​បាន​រក​ស៊ី​ជោគជ័យ​​ផ្នែក​ក្រុម​ហ៊ុន​សាង​សង់​ដែល​មាន​ឈ្មោះ​ RP Group of Companies។ លោក​មាន​ទ្រព្យ​សម្បត្តិ​៣.៦​ពាន់​លាន​ដុល្លារ​អាមេរិក។

១១ លោក​Abdulla Al Futtaim

លោក​ជា​ម្ចាស់​​​ក្រុម​ហ៊ុន​ Al Futtaim Group ដែល​ចែក​ចាយ​រថយន្ត​ហុងដា​ និង​តូយូតា​នៅ​​ប្រទេស​អារ៉ាប់រួម។ លោក​មាន​ក្រុម​​ហ៊ុន​ធានារ៉ាប់រង់​ដ៏​ធំ​ និង​ក្រុម​ហ៊ុន​ផ្សេង​ៗ​មួយ​ចំនួន​ទៀត​ដូច​ជា​​ Cairo Festival City និង​ Dubai Festival City ជា​ដើម។ លោក​មាន​ទ្រព្យ​សម្បត្តិ​៤.១ពាន់​លាន​ដុល្លារ​អាមេរិក។​

១២ លោក​ Micky Jagtiani

លោក​ Jagtiani ដែល​​ជា​អ្នក​ជំនួញ​លក់​រាយ​​ឈាន​មុខ​​ម្នាក់​នៅ​មជ្ឈិមបូព៌ា​ធ្លាប់​ជា​អ្នក​រត់​តាក់ស៊ី​នៅ​អង់គ្លេស។ លោក​រសាត់​ទៅ​ដល់​ប្រទេស​បារ៉ែន​​ដោយ​​បាន​បើក​​ហាង​​កូន​ក្មេង​មួយ​នៅ​ឆ្នាំ​១៩៧៣។ បន្ទាប់​មក​លោក​បាន​បង្កើត​ Landmark Group ដែល​មាន​ទី​ស្នាក់​ការ​កណ្តាល​នៅ​ទី​ក្រុង​ឌូប៉ៃ។ លោក​​បាន​ពង្រីក​សាខា​​ជាង​២​ពាន់​​កន្លែង​នៅ​​ឥណ្ឌា​ អាហ្វ្រិក​​ និង​មជ្ឈឹមបូព៌ា​ ហើយ​កើប​លុយ​​ប្រចាំ​ឆ្នាំ​៦​ពាន់​លាន​ដុល្លារ​អាមេរិក។ លោក​មាន​ទ្រព្យ​សម្បត្តិ​ ៤.៥​ពាន់​លាន​ដុល្លារ​អាមេរិក។

១៣ លោក​  M.A. Yusuff Ali

រហស្សនាម​ស្តេច​​លក់​រាយ​នៅ​មជ្ឈិមបូព៌ា លោក​ Yusuff Alli កើប​លុយ​ពី​ជាង​៧.៤​ពាន់​លាន​ដុល្លារ​អាមេរិក​ពី​គ្រុប​អាជីវកម្ម​ LuLu Group របស់​លោក។ លោក​​បាន​បើក​​ហាង​ប្រមាណ​១៣៣​នៅ​ម៉ាឡេស៊ី​ ឥណ្ឌូណេស៊ី អេហ្ស៊ីប ឥណ្ឌា​ និង​កន្លែង​ផ្សេង​ទៀត។ លោក​មាន​ទ្រព្យ​សម្បត្តិ​ ៥​​ពាន់​លាន​ដុល្លារ​អាមេរិក។

១៤ លោក​ Abdulla bin Ahmad Al Ghurair

លោក​បាន​​បង្កើត​​ធនាគារ​ Mashreqbank កាល​ពី​ឆ្នាំ​១៩៦៧​​ដែល​ក្រោយ​មក​ក្លាយ​ជា​ធនាគារ​ឈាន​មុខ​គេ​មួយ​នៅ​​អារ៉ាប់រួម។ ប្រតិបត្តិការ​ធនាគារ​របស់​លោក​បាន​គ្រប់​ដណ្ដប់​លើ​សេវាកម្ម​ជា​ច្រើន​ដូច​ជា​អចលន​ទ្រព្យ​ សំណង់ សាងសង់​ និង​ម្ហូប​អាហារ​ជា​ដើម។ លោក​មាន​ទ្រព្យ​សម្បត្តិ​ ៧​​ពាន់​លាន​ដុល្លារ​អាមេរិក

១៥ លោក Majid Al Futtaim

សហគ្រិន​សំបូរ​ទ្រព្យ​រូប​នេះ​បាន​​បង្កើត​​ក្រុម​ហ៊ុន​ Majid Al Futtaim Group កាល​ពី​ឆ្នាំ​១៩៩២​ បន្ទាប់​ពី​បំបែក​ខ្លួន​ចេញ​ពី​បង​ប្រុស។ ​លោក​មាន​សម្ព័ន្ធ​ក្រុម​ហ៊ុន​ប្រមាណ​១៥​នៅ​ទី​ផ្សារ​អន្តរជាតិ​ដែល​មាន​បុគ្គលិក​ជាង​៣​​ម៉ឺន​នាក់​ដូច​ជា​នៅ​អាស៊ី​កណ្តាល អាហ្វ្រិក​ខាង​ជើង​ និង​មជ្ឈិមបូព៌ា​ជា​ដើម។ លោក​មាន​ទ្រព្យ​សម្បត្តិ​ ១០.៩​​ពាន់​លាន​ដុល្លារ​អាមេរិក៕


ប្រភព៖ Therichest ប្រែ​សម្រួល៖ ជាន ចាន់រ៉ា