អ្នក​ចែក​រំលែក​ព័ត៌មាន​លេច​ធ្លាយ​ដ៏​គួរ​ឲ្យ​ទុក​ចិត្ត OnLeaks បាន​សហការ​​ជា​មួយ​បណ្ដាញ​អនឡាញ​ 91Mobiles ដើម្បី​បញ្ចេញ​នូវ​រូបភាព​ Render និង វីដេអូ​ពី​រាង Galaxy Note 8 ថ្មី។

មើល​តាម​រូបភាព Galaxy Note 8 មាន​អេក្រង់​ដែល​មាន​ស៊ុម​ស្ដើង​ដូច Galaxy S8 ដែរ ប៉ុន្តែ​វា​ហាក់​មាន​កម្រាស់​ក្រាស​ជាង​ព្រោះ​មាន​បំពាក់​ប៊ិច S-Pen និង មាន​រាង​ខាង​ក្រោយ​ជ្រុងៗ​ទៀត​ផង។ អ្វី​ដែល​គួរ​ឲ្យ​ចាប់​អារម្មណ៍​ជាង​នេះ​គឺ​ការ​បំពាក់​កាមេរ៉ា​ភ្លោះ​បែប​បញ្ឈរ និង ទ្រនាប់​ស្កេន​ក្រយៅ​ដៃ​ដែល​ដាក់​ក្បែរ​នឹង​ភ្លើង​ LED ដូច​ជា Galaxy S8 ដែរ។

យោង​តាម 91Mobiles ឲ្យ​ដឹង​ថា Galaxy Note 8 មាន​កម្រាស់​ ៩,៥ ម.ម បើ​គិត​ទាំង​កម្រាស់​កាមេរ៉ា​ភ្លោះ​ដែល​លៀន​ចេញ​ទៀត​នោះ។ ចំណែក​អេក្រង់​វិញ​មាន​ទំហំ ៦,៣ អ៊ីញ, បន្ទះ​ឈីប Snapdragon 835, RAM 6 GB និង ថ្ម​ទំហំ ៣៣០០ mAh។

មិន​អាច​បញ្ជាក់​បាន​ទេ​​ថា​រូបភាព​ខាង​លើ​នេះ​នឹង​ជា​រូបរាង​ផ្លូវ​ការ​របស់ Galaxy Note 8 ឬ យ៉ាងណា​នោះ ដូច​នេះ​ចុង​ក្រោយ​មាន​តែ​រង់​ចាំ​ការ​ប្រកាស​ចេញ​ជា​ផ្លូវ​ការ​ដែល​អាច​នឹង​ធ្វើ​ឡើង​នៅ​ចុង​ខែ​សីហា​ខាង​មុខ​តែ​ប៉ុណ្ណោះ៕​​

ប្រភព៖ Sammobile   ប្រែ​សម្រួល៖ សុខហេង