ចំណុចមួយដែលផលិតករដទៃតែងតែរិះគន់ តែ ចាន់ណា រ៉ូណាន់ នៅតែបន្តធ្វើ (វីដេអូ)

2017-06-29 04:46:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតករវ័យក្មេង រ៉ូណាន់ ចាន់ណា ប្រាប់ Sabay ថាទោះបីជាភាពយន្តរបស់លោកទទួលបានជោគជ័យប៉ុណ្ណាក៏លោកនៅទទួលបានបានការរិះគន់ជាច្រើន ហើយក្នុងនោះក៏មានការរិះគន់ពីអ្នកដឹកនាំរៀមច្បងដែរ ដែលពួកគេរិះគន់លើរឿងតែមួយដូចគ្នា គឺការតែងមុខតួស្អាតៗឲ្យទៅជាខ្មោចអាក្រក់ៗ។

ថ្វីត្បិតលោកដឹងថា ការយកតួឯកស្រីទៅតុបតែងជាតយខ្មោចអាក្រក់ ចំណាយពេលយូរ និងថវិកាច្រើនក្ដី តែអ្នកដឹកនាំរឿងប្រចាំផលិតកម្ម "ឥន្ទ្រានិម្មិត" រូបនេះបញ្ជាក់ថា៖ "ខ្ញុំមិនខ្វល់ទេសម្រាប់រឿងនេះ ព្រោះខ្ញុំមានគោលដៅរបស់ខ្ញុំ ហើយសម្រាប់ខ្ញុំវាជាចំណុចពិសេស និងទាក់ទាញមួយដែលបង្ហាញថាតួស្រីទាំងនោះមានការអត់ធ្មត់ខ្ពស់"។

លោកបន្តថា លោកបានសិក្សាពីរឿងហូលីវូដជាច្រើនដែលគេ ក៏ធ្វើបែបនេះដូចគ្នា គឺតុបតែងតួសម្ដែងរបស់គេឲ្យមើលមិនស្គាល់តែម្ដង ពេលផ្លាស់ប្ដូររូបរាងទៅជាខ្មោច ហើយលោកជឿជាក់ថា លោកមិនអាចបោកប្រាស់គេដោយប្រើតួជំនួសបានទេ ព្រោះសម្រាប់មនុស្សម្នាក់ៗមានចំណុចពិសេសមួយគឺភ្នែក។

អ្នកដឹកនាំរឿង "កំណត់ហេតុនាងនាថ" បន្តថា៖ "ទោះបីមុខជាមើលលែងស្គាល់ ក៏ខ្ញុំជឿជាក់ថាចំណុចមួយដែលគេអាចចំណាំតួនបានគឺភ្នែក ដូច្នេះហើយខ្ញុំនឹងប្រើវាជាចំណុចទាក់ទាញប្រិយមិត្ត ឲ្យឃើញតួដដែលតែមានអារម្មណ៍២ផ្សេងគ្នា"៕

អត្ថបទ៖ សុខណា