មូលហេតុនៃការកកើតអង្គបុរាណ១០០១អង្គ នៅទូទាំងខេត្តតាកែវ

2017-07-10 02:24:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ទួលអង្គបុរាណកើតមានឡើងស្ទើរគ្រប់ទីកន្លែងពាសពេញទឹកដី នៃខេត្តតាកែវ ទីកន្លែងកំណើតនៃប្រទេសកម្ពុជា។ អង្គបុរាណទាំងអស់នោះ គឺមានអាយុកាលរាប់រយឆ្នាំមកហើយ ដោយប្រជាជនជាទូទៅមិនបានដឹងច្បាស់ទេថាមូលហេតុអ្វីបានជាទឹកដីនៃខេត្តតាកែវសម្បូរទៅដោយទួលអង្គបុរាណបែបនេះ។

បើតាមសៀវភៅប្រជុំរឿងព្រេងខ្មែរភាគ៥ និងការនិទានរបស់លោកតា ទេព រឿន អាចារ្យវត្តប្រាសាទស្រះកែវ បានដំណាលស្របគ្នាថា មានស្ដេចមួយអង្គព្រះនាមព្រះបាទបាយ៉ង់ ដែលមានមហេសីព្រះនាម ព្រះនាងសក់ក្រអូប ដែលប្រកបដោយរូបឆោមលោមពណ៌ដូចទេពធីតា សាយក្លិនក្រអូបចេញពីព្រះកាយចម្ងាយ១យោជន៍ ល្បីដល់ស្ដេចក្រុងសៀម (ថៃ)។

លោកតា ទេព រឿន ដែលចាស់ទុំ រៀបរាប់រឿងព្រេង

ស្ដេចសៀមក៏លើកពលសេនាមកតាមចាប់ ធ្វើឱ្យស្ដេចបាយ៉ង់ និងមហេសី ភៀសព្រះកាយទៅដល់ទីតាំងប្រាសាទបាយ៉ង់កោក្នុងទឹកដីស្រុកគីរីវង់ ខេត្តតាកែវបច្ចុប្បន្ន។ ទៅដល់ទីនោះបានសេចក្ដីសុខព្រះអង្គក៏កោសក់លាបំណន់ទើបជាប់ងារព្រះបាទបាយ៉ង់កោរហូតមក។ នៅទីនោះព្រះនាងសក់ក្រអូបប្រសូតបានបុត្រាមួយព្រះអង្គដាក់ព្រះនាមថា ព្រះបាទដៃខ្លី។

ប៉ុន្មានឆ្នាំក្រោយមកស្ដេចសៀមស៊ើបដឹងក៏ប្រើល្បិចនាំល្ខោនយកមកលេង រហូតអ្នកស្រុកជឿទុកចិត្ត និងចុងក្រោយឈានដល់អាចចាប់យកព្រះនាងសក់ក្រអូបទៅបាន។ ងាកទៅព្រះបាទដៃខ្លីវិញ ក្រោយធំដឹងក្ដីពេញវ័យ ក៏ចេះតែទទូចសួររកព្រះមាតា រហូតព្រះបិតាដាច់ចិត្តប្រាប់ការពិតថាត្រូវពួកសៀមចាប់យកទៅបាត់។ ព្រះអង្គក៏សុំរាជាអនុញ្ញាតទៅដណ្ដើមព្រះមាតាមកវិញ។

ទៅដល់ស្រុកសៀមពិតជាបានជួបនឹងព្រះមាតាមែន ប៉ុន្តែដោយការបែកគ្នាតាំងពីនៅកុមារភាព ធ្វើឱ្យមិនស្គាល់គ្នា។ ដោយសារតែព្រះនាងសក់ក្រអូបនៅមានសម្រស់ស្រស់ស្អាត រីឯព្រះបាទដៃខ្លីមានរាងសង្ហារមាំមួនផង ចំណងមេត្រីស្នេហាប្រុស ស្រីក៏កើតមានឡើង ឈានដល់ការរួមរស់ជាមួយគ្នា និងបាននាំយកព្រះនាងមកកាន់ព្រះនគរវិញ។

មកដល់នគរព្រះបិតាប្រាប់ថា នេះហើយជាមាតារបស់បុត្រ ហេតុនេះធ្វើឱ្យព្រះបាទដៃខ្លីភ័យញាប់ញ័រជាខ្លាំង បើទោះបីជាបិតាមិនយកទោសពៃក្ដី។ ដោយខ្លាចបុត្រធ្លាក់ទៅក្នុងអបាយភូមិ ព្រះអង្គបានប្រជុំក្រុមបុរោហិត ហើយសម្រេចឱ្យបុត្រា(ព្រះបាទដៃខ្លី)ជីកស្រះកសាងទួលអង្គចំនួន ១ ០០១អង្គ ដើម្បីរំដោះកម្មពៀរ ដែលខុសឆ្គងលើម្ដាយដោយមិនដឹងខ្លួន។ ដូច្នេះហើយ ទើបទឹកដីនៃខេត្តតាកែវសម្បូរទៅដោយអង្គបុរាណស្ទើរគ្រប់ភូមិស្រុក រហូតដល់បច្ចុប្បន្ន៕