ប្រាសាទសំបូរព្រៃគុក អាចក្លាយជាវិញ្ញាសាប្រឡងបាក់ឌុបឆ្នាំ ២០១៧

2017-07-10 05:39:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្លែងនៅក្នុងសន្និសីទសារព័ត៌មានស្ដីពីការប្រឡងបាក់ឌុបក្នុងឆ្នាំ ២០១៧ ឯកឧត្ដម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងថា បេក្ខជនត្រៀមប្រឡងបាក់ឌុបឆ្នាំនេះគួរស្រាវជ្រាវទាក់ទងនឹងប្រាសាទសំបូរព្រៃគុកឱ្យបានស៊ីជម្រៅ ព្រោះអាចក្លាយជាវិញ្ញាសាក្នុងពេលប្រឡងខាងមុខនេះ។

ឯកឧត្ដម បានបន្តទៀតថា ចំពោះសំណួរចេញនៅត្រង់ចំណុចណា គឺមិនអាចបង្ហើបបានទេ ប៉ុន្តែសិស្សថ្នាក់ទី ១២ទាំងអស់ មិនមែនដឹងតែអ្វីដែលមានបច្ចុប្បន្ននោះទេ ពោលគឺត្រូវសិក្សាឱ្យបានច្រើនពីប្រាសាទនេះ ក្រៅពីបានចូលជាសម្បត្តិបេតិកភណ្ឌពិភពលោក នៅថ្ងៃទី ០៨ ខែកក្កដា ឆ្នាំ២០១៧នេះ។ ដោយឡែកថានឹងចេញ ១០០%ឬក៏អត់នោះ ឯកឧត្ដម លើកឡើងថា អាស្រ័យលើគណៈកម្មការរៀបចំវិញ្ញាសា ប៉ុន្តែយកល្អសិស្សថ្នាក់ទី ១២ទាំងអស់គួរសិក្សាឱ្យបានស៊ីជម្រៅ ទៅលើប្រជាស្ថិតិសាស្ត្រក្នុងការកសាង។

គួរបញ្ជាក់ថា ចំពោះវិញ្ញាសាប្រឡងបាក់ឌុបក្នុងឆ្នាំ ២០១៧នេះគឺមាន ៧មុខវិជ្ជាសំខាន់ៗ ដូចកាលពីឆ្នាំមុនដែរ ទាំងថ្នាក់វិទ្យាសាស្ត្រពិត និងវិទ្យាសាស្ត្រសង្គម។ ក្នុងនោះថ្នាក់វិទ្យាសស្រ្តគឺផ្ដោតទៅលើ ៤មុខវិជ្ជាសំខាន់ៗរួមមាន គណិតវិទ្យា គីមីវិទ្យា រូបវិទ្យា ជីវវិទ្យា។ ចំពោះថ្នាក់សង្គម គឺផ្ដោតទៅលើ អក្សរសាស្រ្តខ្មែរ ពលរដ្ឋ ភូមិ ប្រវត្តិ ជាដើម។

ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា សម័យប្រឡង ៖ ២១ សីហា ២០១៧ នឹងប្រព្រឹត្តទៅរយៈពេល ២ថ្ងៃ (ថ្ងៃទី២១ និងថ្ងៃទី២២ ខែសីហា) រួមមានបេក្ខជនទាំងអស់សរុបចំនួន ១០៣ ១១២ នាក់ និងមានមណ្ឌលប្រឡងចំនួន ១៧៨ មណ្ឌល ចែកចេញជា ៤ ១៥៥ បន្ទប់ ទូទាំងប្រទេស។ចំពោះការប្រកាសលទ្ធផលនៅធ្វើនៅរសៀលថ្ងៃទី១២ ខែកញ្ញា ឆ្នាំ២០១៧ សម្រាប់មណ្ឌលរាជធានីភ្នំពេញ និងខេត្តកណ្ដាល។ ចំណែកនៅថ្ងៃទី១៣ ខែកញ្ញា ឆ្នាំ២០១៧ សម្រាប់មណ្ឌលប្រឡងនៅខេត្តផ្សេងៗទៀត៕

អត្ថបទ៖ វឌ្ឍនៈ