លក្ខណៈពិសេស និងកន្លែងអាថ៌កំបាំង នៃព្រលានយន្តហោះ ទាំង៩ អ្នកធ្វើដំណើរ គួរតែដឹង!

2017-07-12 03:17:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រលានយន្តហោះ គឺជាទីកន្លែងដំបូងគេបង្អស់ ដែលអ្នកមើលឃើញ នៅពេលទៅដល់ប្រទេសថ្មីមួយ។ ព្រលានយន្តហោះនាសម័យទំនើបនេះ មិនត្រឹមតែជួយអ្នកឲ្យធ្វើដំណើរពី ទីតាំងមួយទៅទីតាំងមួយទៀតប៉ុណ្ណោះទេ ប៉ុន្តែពួកវាថែមទាំងផ្ដល់នូវការកម្សាន្ត ដែលមានតម្លៃធូរថ្លៃ ឬឥតគិតថ្លៃសម្រាប់អ្នកដំណើរ ទៀតផង។

នៅក្នុងថ្ងៃនេះ យើងនឹងណែនាំប្រិយមិត្តទាំងអស់គ្នា ឲ្យបានដឹងពីអាថ៌កំបាំង ក៏ដូចជាលក្ខណៈពិសេសដ៏មានប្រយោជណ៍មួយចំនួន នៅឯព្រលានយន្តហោះល្បីៗ ទាំង ៩ នៅជុំវិញពិភពលោក។

#១ ព្រលានយន្តហោះ Hong Kong International Airport ស្ថិតក្នុងទីក្រុងហុងកុង

ព្រលានយន្តហោះមួយនេះ មានការតាំងពិព័រណ៍បណ្ដោះអាសន្នឥតគិតថ្លៃ ដែលប្រព្រឹត្តិទៅតាមពេលវេលាផ្សេងៗគ្នា និងផ្ដល់ជូននូវដំណើរទេសចរណ៍អន្តរកម្មសម្រាប់កុមារ និងមនុស្សពេញវ័យទៀតផង។ ប៉ុន្តែលក្ខណៈពិសេសសំខាន់គឺ រោងកុន UA IMAZ Theatre ដែលមានអេក្រង់ធំបំផុត នៅក្នុងទីក្រុងហុងកុង ហើយមានកៅអីចំនួន ៣៥០ ដោយចាក់បញ្ចាំងទាំងរឿង ប្រភេទ 2D និង 3D។ ឯតម្លៃសំបុត្រប្រហែល ១០ ដុល្លារអាមេរិកប៉ុណ្ណោះ។

#២ ព្រលានយន្តហោះ Kloten Airport ស្ថិតក្នុងទីក្រុង Zurich នៃប្រទេសស្វីស

វាគឺជាព្រលានយន្តហោះដ៏មមាញឹកបំផុតមួយនៅទ្វីបអឺរ៉ុប ហើយវាផ្ដល់ឲ្យអ្នកដំណើរនូវឱកាសដើម្បីមើលឃើញ ការធ្វើដំណើរតាមអាកាសទាំងអស់ ពីមុំមួយនៃព្រលានយន្តហោះ។ មគ្គុទ្ទេសក៍របស់ព្រលានយន្តហោះខាងលើ នឹងនាំអ្នកទៅមើលគ្រប់បរិវេណទាំងអស់ ប៉ុន្តែមគ្គុទ្ទេសក៍ដែលមានបទពិសោធន៍ នឹងនាំអ្នកទៅកន្លែងអាថ៌កំបាំង ហើយប្រាប់អ្នកអំពីរបៀបដែល ស្វីស គ្រប់គ្រងអាជីវកម្មដ៏ធំបែបនេះ។ ចំពោះតម្លៃនៃដំណើរទស្សនកិច្ចបែបនេះ គឺ ១០ ដុល្លារ ដោយមានការបញ្ចុះតម្លៃ សម្រាប់ដំណើរទស្សនកិច្ចជាក្រុម និងមិនគិតថ្លៃចំពោះកុមារឡើយ។

#៣ ព្រលានយន្តហោះ Changi International Airport ស្ថិតក្នុងប្រទេសសិង្ហបុរី

វាស្ថិតនៅក្នុងបញ្ជីនៃព្រលានយន្តហោះល្អបំផុតនៅលើពិភពលោក។ អ្នកអាចមើលឃើញលក្ខណៈពិសេសរបស់វា ដូចជា សួនច្បារ ផ្កាឈូករ័ត្ន ដើមដំបងយក្ស និងសួនច្បារផ្កាអ័រគីដេ ក៏ដូចជាសត្វត្រីចម្លែក និង សួនមេអំបៅ ផងដែរ។ នៅលើដំបូល មានអាងហែលទឹកមួយ និងកន្លែងងូតទឹក ដែលផ្ដល់ទិដ្ឋភាពដ៏អស្ចារ្យ។ មិនតែប៉ុណ្ណោះ មានស្ថានីយចំនួន ២ មានរោងកុនដែលចាក់បញ្ចាំងរឿងដោយឥតគិតថ្លៃ ទៀតផង។

#៤ ព្រលានយន្តហោះ Incheon International Airport ស្ថិតក្នុងទីក្រុងសេអ៊ូល នៃប្រទេសកូរ៉េខាងត្បូង

វាគឺជាព្រលានយន្តហោះដ៏កម្រមួយនៅលើពិភពលោក ដែលផ្តល់ជូននូវការកម្សាន្តជាច្រើនប្រភេទសម្រាប់អ្នកដំណើរ។ អ្នកដំណើរអាចស្គាល់ពីវប្បធម៌ក្នុងតំបន់ ទោះបីជាពួកគេមិនធ្លាប់ចូលទស្សនាប្រទេសកូរ៉េខាងត្បូងក៏ដោយ។ លើសពីនេះទៅទៀត ក៏មានសិប្បកម្មបែបប្រពៃណី ដែលអាចឲ្យអ្នកដំណើររៀនតាម , តន្ត្រីក្នុងស្រុក សម្រាប់អ្នកដំណើរស្ដាប់កម្សាន្ត និង ពិធីបុណ្យប្រពៃណីរបស់ជនជាតិកូរ៉េ ទៀតផង។ អ្វីដែលរឹតតែពិសេសនោះគឺ វាមានទីលានជិះស្គីទឹកកក សម្រាប់អ្នកដំណើរទាំងអស់តែម្ដង។ អ្វីដែលបានរៀបរាប់ខាងលើនេះ សុទ្ធសឹងតែឥតគិតថ្លៃទាំងអស់។

#៥ ព្រលានយន្តហោះ Schiphol Airport ស្ថិតក្នុងរាជធានី Amsterdam នៃប្រទេសហូឡង់

នៅទីនោះ អ្នកដំណើរដែលចូលចិត្តអានសៀវភៅ អាចរីករាយជាមួយនឹងបណ្ណាល័យ ដែលមានសៀវភៅរាប់ពាន់ក្បាល និងសាលសម្រាប់អានសៀវភៅ យ៉ាងកក់ក្ដៅទៀតផង។

#៦ ព្រលានយន្តហោះ Taiwan Taoyuan International Airport ស្ថិតនៅកោះតៃវ៉ាន់

ក្រៅពីសេវាកម្មស្តង់ដារ ព្រលានយន្តហោះធំបំផុតនៅតៃវ៉ាន់នេះ ផ្ដល់ជូនអ្នកដំណើរនូវអ្វីដែលពិតជាពិសេស។ វាមានថ្នាក់រៀនខុសពីធម្មតា សម្រាប់ភ្ញៀវទេសចរ ដូចជាការរៀនសរសេរអក្សរផ្ចង់ និងភ្លក់រសជាតិអាហារក្នុងស្រុក ជាដើម។ ប៉ុន្តែ លក្ខណៈពិសេសនៃព្រលានយន្តហោះ ដែលអាចទាក់ទាញក្មេងៗមកពីជុំវិញពិភពលោកនោះគឺ មជ្ឈមណ្ឌល Hello Kitty។

#៧ ព្រលានយន្តហោះ Franz Josef Strauss Airport ស្ថិតក្នុងទីក្រុង Munich នៃប្រទេសអាល្លឺម៉ង់

ប្រសិនបើអ្នកមានពេលទំនេរប៉ុន្មានម៉ោង នៅឯព្រលានយន្តហោះខាងលើ អ្នកប្រាកដជាត្រូវទៅភោជនីយដ្ឋាន Airbrau ដែលស្ថិតនៅក្នុងព្រលានយន្តហោះផ្ទាល់តែម្ដង។ វាមិនត្រឹមតែជាកន្លែងទទួលទានអាហារ និងស្រាបៀប៉ុណ្ណោះទេ តែវាក៏ផ្ដល់ឲ្យអ្នកដំណើរនូវដំណើរទស្សនកិច្ចផងដែរ។ សូម្បីតែក្មេងជំទង់ ក៏អនុញ្ញាតឲ្យចូលដែរ ទោះបីជាពួកគេមិនភ្លក់រសជាតិស្រាបៀអាល្លឺម៉ង់ ដែលមានឈ្មោះល្បីល្បាញដ៏ដោយ។ ចំណែកឯតម្លៃ គឺត្រឹមតែ ៨ ទៅ ១០ ដុល្លារអាមេរិកប៉ុណ្ណោះ។

#៨ ព្រលានយន្តហោះ Vancouver International Airport ស្ថិតក្នុងខេត្ត British Columbia នៃប្រទេសកាណាដា

នៅទីនោះ អ្នកដំណើរអាចមើលឃើញស្នាដៃសិល្បៈ ដែលបានបំផុសគំនិតដោយវប្បធម៌របស់ប្រជាជាតិដំបូង (First Nations)។ អ្វីដែលគួរឲ្យចាប់អារម្មណ៍បំផុតនោះគឺ ទូកចែវប្រវែង ១១ ម៉ែត្ររបស់ពួកគេ។

#៩ ព្រលានយន្តហោះ Dubai International Airport ស្ថិតក្នុងទីក្រុងឌូបៃ នៃប្រទេសអារ៉ាប់រួម

លក្ខណៈពិសេសនៅទីនោះគឺ ប្រហែលជាចំនួនហាងលក់ទំនិញជាច្រើនកន្លែង ដែលឈរលើផ្ទៃដីទំហំ ១៥ ០០០ ម៉ែត្រការ៉េ។ វាជាឋានសួគ៌របស់អ្នកចូលចិត្តដើរទិញទំនិញ។ ទោះបីជាអ្នកមិនទិញអ្វីក៏ដោយ តែអ្នកនៅតែអាចចូលទៅក្នុងពិភពនៃប្រណីតភាពអារ៉ាប់ និងស្គាល់អ្នកស្រុកនៅទីនោះ។ ប្រសិនបើអ្នកមានលុយ ពី ២៧ ទៅ ១៣៨ ដុល្លារអាមេរិក អ្នកអាចសាកល្បងផ្សងសំណាង ដោយចូលរួមលេងឆ្នោត ដើម្បីមានឱកាសឈ្នះរង្វាន់ម៉ូតូ ឬ រថយន្តស្ព័រមួយគ្រឿង ទៀតផង៕