Zidane ដាក់មួយឃ្លា អ្នកគាំទ្រ Real បុកពោះមិនស្ទើរ

2017-07-27 14:33:28
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូបង្វឹក Real Madrid បានបញ្ជាក់ថាអ្វីៗក៏អាចកើតឡើងបានដែរក្នុងរដូវកាលដោះដូរកីឡាករនេះ ដែលធ្វើឲ្យមានមន្ទិលសង្ស័យថាកីឡាករមួយចំនួនអាចនឹងចាកចេញពីក្លឹបជើងឯកអឺរ៉ុប ដែលក្នុងនោះរួមបញ្ចូលទាំងកីឡាករប្រយុទ្ធមុតស្រួចទាំងបីប្រចាំក្លឹបគឺ BBC ដែលមានកីឡាករប្រយុទ្ធឆ្វេង Cristiano Ronaldo, ប្រយុទ្ធកណ្ដាល Karim Benzema និងប្រយុទ្ធស្ដាំ Gareth Bale។

បុរសសញ្ជាតិបារាំងវ័យ ៤៥ ឆ្នាំរូបនេះក្រោយពេលចាញ់ការប្រកួតមិត្តភាពក្នុងលទ្ធផល ៤-១ ជាមួយក្លឹបផ្ទៃមេឃ Manchester City បាននិយាយថា "ខ្ញុំសង្ឃឹមថា BBC នឹងនៅតែបន្តលេងឲ្យក្លឹបជើងឯកអឺរ៉ុបមួយនេះបន្តទៅទៀត។ ខ្ញុំសង្ឃឹមថា កីឡាករដទៃទៀតក៏នឹងមិនចាកចេញពីក្លឹបនៅក្នុងរដូវកាលនេះផងដែរ"។

លោកបានបន្ថែមទៀតថា "ប៉ុន្តែអ្វីៗក៏អាចកើតឡើងបានដែររហូតដល់ថ្ងៃទី៣១ ខែសីហា (ថ្ងៃបិទបញ្ចប់នៃរដូវកាលដោះដូរកីឡាករ)"។ ពាក្យមួយឃ្លាចុងក្រោយនេះ ផ្ទុះឲ្យមានភាពមិនច្បាស់លាស់នៃអនាគតរបស់កីឡាករមួយចំនួនជាពិសេសគឺ BBC ដោយមានពាក្យចចាមអារាមថាក្លឹបជើងឯកអេស្ប៉ាញមួយនេះកំពុងតាមទិញយ៉ាងប្រកិតនៃកីឡាករសញ្ជាតិបារាំង Kylian Mbappeរបស់ ក្លឹបជើងឯកបារាំងMonaco ខណៈពេលកីឡាករសញ្ជាតិវែល Gareth Bale បើតាម Bleacher Report អាចនឹងចាកចេញទៅក្លឹបបិសាចក្រហម Manchester United។

គួរបញ្ជាក់ផងដែរថា កាលពីរដូវកាលមុន BBC បានរកគ្រាប់បាល់បានសរុប ៧០គ្រាប់ និងបញ្ជូនឲ្យមិត្តរួមក្រុមស៊ុតបញ្ចូលទីបានសរុប ២១ដង។

តើអនាគត BBC នឹងទៅជាយ៉ាងណា? ចាំមើលទាំងអស់គ្នា?

ប្រភព៖ michelacosta ប្រែសម្រួល ៖ ហ៊ីម រស្មី