កូរ៉េខាងជើងពិចារណាគម្រោងបាញ់តំបន់មួយរបស់អាមេរិក ក្រោយដូណាល់ ត្រាំ គំរាម

2017-08-09 03:06:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសកូរ៉េខាងជើងកំពុងពិចារណាវាយប្រហារទៅដល់ទឹកដីអាមេរិកតំបន់ Guam គឺនៅតែប៉ុន្មានម៉ោងបន្ទាប់ពីប្រធានាធិបតី ដូណាល់ ត្រាំ គំរាមទីក្រុងព្យុងយ៉ាង ជាមួយភ្លើងសង្គ្រាមកំហឹង។

ភ្នាក់ងារសារព័ត៌មានផ្លូវការរបស់កូរ៉េខាងជើងបានផ្សាយថា ក្រុងព្យុងយ៉ាងកំពុងពិចារណាគម្រោងបាញ់រ៉ុកកែតធន់មធ្យមទៅវែងដាក់តំបន់ Guam ដែលជាមូលដ្ឋានយន្តហោះទម្លាក់គ្រាប់បែកយុទ្ធសាស្ត្រអាមេរិកស្ថិតក្នុងមហាសមុទ្រប៉ាស៊ីហ្វិក។ ការឆ្លងឆ្លើយវោហារសាសន៍រវាងប្រទេសទាំងពីរបានកើតឡើងយ៉ាងក្ដៅគគុក។

ថ្មីៗនេះ អង្គការសហប្រជាជាតិបានយល់ព្រមដាក់ទណ្ឌកម្មសេដ្ឋកិច្ចបន្ថែមប្រឆាំងកូរ៉េខាងជើង។ ចំណែក ប្រសាសន៍របស់ប្រធានាធិបតី ដូណាល់ ត្រាំ ពេលនេះ គឺកើតឡើងក្រោយប្រព័ន្ធផ្សព្វផ្សាយមួយរាយការណ៍ថា កូរ៉េខាងជើងបានផលិតក្បាលគ្រាប់នុយក្លេអ៊ែរតូចសមល្មមសម្រាប់បំពាក់នៅក្នុងមីស៊ីលរបស់ខ្លួន។ ការវិវឌ្ឍមួយនេះ ត្រូវបានគេចាត់ទុកថា ជាឧបសគ្គចុងក្រោយគេរបស់កូរ៉េខាងជើងដែលរដ្ឋពោរពេញទៅដោយនុយក្លេអ៊ែរ។

ភ្នាក់សារព័ត៌មានរដ្ឋកូរ៉េខាងជើង KCNA បានផ្សាយនៅព្រឹកថ្ងៃពុធនេះថា "យោធារបស់ខ្លួនកំពុងត្រួតពិនិត្យយ៉ាងប្រុងប្រយ័ត្នលើគម្រោងប្រតិបត្តិការបាញ់ដាក់តំបន់ Guam ដោយប្រើរ៉ុកកែតប្រភេទ Hwasong-12 ធន់មធ្យមទៅវែង"។

ការថ្លែងដ៏ក្ដៅគគុករវាងអាមេរិក និងកូរ៉េខាងជើង បន្ទាប់ពីក្រុងព្យុងយ៉ាងបានតេស្ដមីស៊ីលអន្តរទ្វីបកាលពីខែកក្កដា ដោយអះអាងថា អាចបាញ់ដល់អាមេរិកដីគោក។

លោក ដូណាល់ ត្រាំ បានមានប្រសាសន៍ប្រាប់អ្នកយកព័ត៌មានចេញពីកន្លែងវាយកូនគោល Bedminster Golf Club នៅរដ្ឋ New Jersey នៅថ្ងៃអង្គារម្សិលមិញថា "កូរ៉េខាងជើងយកល្អកុំគំរាមកំហែងណាមួយដាក់អាមេរិក។ ពួកគេនឹងប្រឈមជាមួយភ្លើងសង្គ្រាមកំហឹងដែលពិភពលោកមិនធ្លាប់បានឃើញជាមិនខាន"៕