កូនប្រុសកាត់តរូបម្ដាយ ដើរលេងជុំវិញពិភពលោក កំពុងល្បីនៅថៃ

2017-08-11 05:03:10
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅទិវាមាតាពិភពលោកនៅសប្ដាហ៍នេះ បុរសជនជាតិថៃម្នាក់ បានកាត់តរូបម្ដាយដោយប្រើប្រាស់កម្មវិធី Photoshop នាំម្ដាយជរារបស់ខ្លួនទៅកាន់តំបន់ទេសចរណ៍ល្បីៗនៅជុំវិញពិភពលោក ដើម្បីដាស់តឿនមនុស្សគ្រប់គ្នាឲ្យនាំម្ដាយដើរលេង អំឡុងពេលពួកគេមានលទ្ធភាព។

កូនប្រុសកំពុងល្បីនៅតាមបណ្ដាញសង្គម សារព័ត៌មាន រហូតដល់ទូរទស្សន៍ថៃរូបនេះ មានគណនីហ្វេសប៊ុកឈ្មោះ Chub Nokkaew បានបង្ហោះរូបថតជាង ១០សន្លឹក ដោយមានអ្នកចែករំលែកបន្តគ្នាជាង ៥ពាន់ដង និងទទួលបានការស្រលាញ់ ចូលចិត្តរាប់ម៉ឺននាក់។ ជាក់ស្ដែង វាហាក់ដូចជាយឺតបន្តិចសម្រាប់គ្រប់គ្នាក្នុងការធ្វើដំណើរជាមួយម្ដាយនាទិវាមាតាពិភពលោកដែលនឹងប្រារព្ធធ្វើនៅថ្ងៃទី ១២សីហា។

កូនប្រុសខាងលើរៀបរាប់ថា ម្ដាយរបស់ខ្លួនអាយុ ៨៥ឆ្នាំ ហើយកាលនៅមានកម្លាំងគាត់រវល់ខ្លាំងណាស់ក្នុងរបរចិញ្ចឹមជីវិត។

“ទិវាមាតាពិភពលោកខិតជិតមកដល់ហើយ។ ខ្ញុំតែងតែឃើញគេបង្ហោះរូបថតនាំម្ដាយរបស់គេដើរកម្សាន្ត ហើយខ្ញុំមានចិត្តច្រណែន ព្រោះខ្ញុំមិនដែលបាននាំម្ដាយទៅលេងបរទេសឡើយ។ នៅពេលកំពុងធ្វើការ ខ្ញុំមិនមានប្រាក់ច្រើនទេ ហើយមានលទ្ធភាពត្រឹមនាំម្ដាយទៅលេងនៅវត្តប៉ុណ្ណោះ។ ថ្ងៃនេះខ្ញុំមានគ្រប់យ៉ាង ប៉ុន្តែវាហួសពេលបន្តិច ព្រោះម្ដាយខ្ញុំអាយុ ៨៥ឆ្នាំទៅហើយ។ គាត់មិនអាចមើលឃើញ ស្ដាប់ឮច្បាស់ និងពិបាកដើរ ដូច្នេះខ្ញុំមិនអាចនាំគាត់ទៅកន្លែងឆ្ងាយៗបានឡើយ។ នៅពេលខ្ញុំធ្វើដំណើរទៅបរទេស ខ្ញុំតែងតែនឹកឃើញដល់ម្ដាយរបស់ខ្ញុំ។ ខ្ញុំសោកស្ដាយព្រោះមិនមានរូបគាត់ទៅជាមួយ ដូច្នេះខ្ញុំបានត្រឹមកាត់តរូបគាត់ជាមួយរូបថតខ្ញុំតែប៉ុណ្ណោះ"។ កូនប្រុសសរសេរបញ្ជាក់៕

សូមទស្សនារូបថតដោយមានការបញ្ជាក់ទីតាំងនៅជ្រុងខាងក្រោម និងខាងស្ដាំនៃរូបថតនីមួយៗ៖