ក្របខ័ណ្ឌ Premier League រដូវ​កាល​២០១៧-១៨ សប្ដាហ៍​ដំបូង​បាន​​ចាប់​ផ្ដើម​ឡើង​យ៉ាង​អស្ចារ្យ ធ្វើ​ឲ្យ​អ្នក​ទស្សនា​មិន​ខក​​បំណង ជាពិសេស​ក៏​បញ្ចេញ​សមត្ថភាព​​ល្អ​ៗ​កីឡាករ​ថ្លៃ​ៗ ដែល​ក្លឹប​នីមួយ​ៗ​បាន​ទិញ​ចូល។ ឥលូវ​នាំ​ប្រិយមិត្ត​ចាប់​អារម្មណ៍ តើ​សប្ដាហ៍​ដំបូង​មាន​រឿង​​អ្វី​ពិសេស​ខ្លះ?

១. Chelsea ម្ចាស់​ជើង​ឯង​ចាញ់​ក្រុម​ក្បែរ​បាត​តារាង​ឆ្នាំ​មុន

ក្នុង​សប្ដាហ៍​ទី​មួយ​ដ៏​ខកចិត្ត Chelsea បាន​រង​បរាជ័យ​​យ៉ាង​អាម៉ាស់​ក្នុង​ផ្ទះ​ខ្លួន​ឯង ដោយ​សារ​ក្រុម​​លេខ​១៦​ឆ្នាំ​មុន​ Burnley​ ៣-២។ អ្វី​មិន​គួរ​ឲ្យ​ជឿ​ត្រឹម​វគ្គ​ទី​មួយ Burnley បាន​រក​បាន​៣​គ្រាប់​​ផុយ​ៗ ក្រោយ​ Gary Cahill ទទួល​បាន​កាត​ក្រហម។ តែ​លុះ​ដល់​វគ្គ​ទី​២ ទើប​ក្រុម​លោក Antonio Conte រក​បាន​២​គ្រាប់​សង​វិញ។ លទ្ធផល​នេះ​​ធ្វើ​ឲ្យ Chelsea ស្ថិត​នៅ​លេខ​១៤​ក្នុង​តារាង​នា​សប្ដាហ៍​ទី​១។

២. កីឡាករ​៣​​រូប​បាន​កាត​ក្រហម

ការ​ប្រកួត​រវាង Chelsea ទល់​នឹងBurnley​ មាន​កីឡាករ​២​​រូប​ទទួល​បាន​​កាត់​ក្រហម ក្នុង​នោះ​ Gary Cahill បាន​​នៅ​នាទី១៤ និង Cesc Fabregas បាន​កាត​លឿង​២​ដង​​នាទី​១៦​និង​៨១។ Jonjo Shelvey ក៏​បាន​កាត​ក្រហម​ដូច​គ្នា​នាទី​៣៨ ក្នុង​ជំនួប​រវាង Newcastle United និង Tottenham Hotspur។​ ចំពោះ​កាត​លឿង​វិញ​មាន​ទៅ​ដល់​៣៤​កាត។

៣.​ ខ្សែ​ប្រយុទ្ធ​ចំណូល​ថ្មី​របស់​ក្រុម​ខ្លាំង​ៗ​រក​​បាន​គ្រាប់​គ្រប់​គ្នា

• Alexandre Lacazette ​កីឡាករ​ផ្ទេរ​បំបែក​កំណត់ត្រា​ក្លឹប​រក​បាន​១​គ្រាប់​​នៅ​នាទី​ទី​២ ជួយ Arsenal ឈ្នះ Leicester ៤-៣

• Mohamed Salah បំប៉ោង​សំណាង​១​គ្រាប់​ ជួយ Liverpool ស្មើ Watford ៣-៣

-ទោះ​​ប្ដូរ​ចូល​ក្នុង​នាម​ជា​កីឡាករ​បម្រុង​ តែ Morata​ ដែល​ផ្ទេរ​ពី Real Madrid ក្នុង​តម្លៃ​៧០​លាន​ផោន​​បាន​ទាត់​បញ្ចូល​ទី​១​​គ្រាប់ និង​បញ្ជូន​១​គ្រាប់ ប៉ុន្តែ​នៅ​តែ​មិន​អាច​ជួយ Chelsea។

-Wayne Rooney ទម្លាយ​សំណាញ់​​១​គ្រាប់​ទី​នាទី​​៤៥ ដែល​ជា​គ្រាប់​ទី​១៩៩​នៅ Premier League ជួយ Everton ឈ្នះ​ ១-០​លើ​ក្រុម​ Stoke City ទទួល​បាន​៣​ពិន្ទុ។

-Romelu Lukaku បាន​បញ្ចេញ​សមត្ថភាព​យ៉ាង​អស្ចារ្យ ដោយ​រក​បាន​២​គ្រាប់ នាំ​បិសាចក្រហម​ឈ្នះ ៤-០ លើ​ក្រុម West Ham ឡើង​លើ​កំពូល​តារាង​បណ្ដោះអាសន្ន។ ​

​​៤. Alexandre Lacazette គឺ​ជា​កីឡាករ​​ដែល​រក​បាន​គ្រាប់​បាល់​ដំបូង​នៅ Premier League រដូវ​កាល​២០១៧-១៨៕​

​

​​​

អត្ថបទ៖ ហេង សុធារិទ្ធិ