មាន​មតិ​មួយ​ចំនួន​តែង​លើក​ឡើង​ច្រំ​ដែល​ថា​ទូរសព្ទ​ Android ​​តែង​ចម្លង​មុខងារ​ពិសេស និង ការ​រចនា​រូបរាង​ពី​ iPhone របស់​ Apple រហូត​ដល់​កើត​មាន​សង្រ្គាម​ពាក្យ​សម្ដី​រវាង​អ្នក​ប្រើ​ប្រាស់​ទូរសព្ទ​ទាំង​ពីរ​ប្រភេទ​នេះ​ទៀត​ផង។ ថ្ងៃ​នេះ​មក​ស្វែង​យល់​ទាំង​អស់​គ្នា​ថា​មុខងារ​ពិសេសៗ​មួយ​ចំនួន​ដូច​ជា​ទ្រនាប់​ស្កេន​ខ្ចៅ​ដៃ​​​ មាន​ប្រើ​លើ​ទូរសព្ទ​ណា​មុន​គេ៖​

-​មុខងារ​​ស្កេន​ខ្ចៅ​ដៃ​ដើម្បី​ដោះ​សោ

ទូរសព្ទ​ដំបូង​គេ​ដែល​ប្រើ​ទ្រនាប់​ស្កេន​ខ្ចៅ​ដៃ​គឺ Toshiba G500 ដែល​ប្រកាស​ចេញ​នៅ​ខែ​កុម្ភៈ​ ឆ្នាំ​ ២០០៧។ ទ្រនាប់​ស្កេន​ខ្ចៅ​ដៃ​របស់​ទូរសព្ទ​នេះ​ស្ថិត​នៅ​ផ្នែក​ខាង​ក្រោយ​នៃ​អេក្រង់​ដែល​ហូត​បាន​របស់​វា ដោយ​ប្រើ​សម្រាប់​បង្កើន​កម្រិត​សុវត្ថិភាព​នៃ​ទូរសព្ទ។

ដោយ​ឡែក​ចំពោះ​ស្មាតហ្វូន​ដែល​មាន​ទ្រនាប់​ស្កេន​ខ្ចៅ​ដៃ​ដំបូង​គេ​វិញ​គឺ​ Motorola ATRIX ដែល​មាន​បំពាក់​នៅ​លើ​ប៊ូតុង​ Power។ ចំណែក​ឯ​ iPhone វិញ​ទើប​មាន​មុខងារ​នេះ​កាល​ពី​ឆ្នាំ​ ២០១៣ ប៉ុណ្ណោះ​ ចំពោះ​ម៉ូដែល iPhone 5s។​​​ ​

-អេក្រង់​ Touch Screen

ទូរសព្ទ​មាន​អេក្រង់​អាច​ Touch បាន​ដំបូង​គេ​គឺ​ IBM Simon ដែល​​ផលិត​ឡើង​ដោយ​ក្រុមហ៊ុន​ IBM នា​ឆ្នាំ​ ១៩៩២។ ទូរសព្ទ​នេះ​ក៏​ត្រូវ​បាន​គេ​ចាត់​ទុក​ថា​ជា​ស្មាតហ្វូន​ដំបូង​ផង​ដែរ។

-កាមេរ៉ា​ថត​រូប​ខាង​មុខ

Motorola A835 ជា​ទូរសព្ទ​មាន​ថត​រូប​ខាង​មុខ​ដំបូង​គេ​ដែល​ចេញ​អំឡុង​ឆ្នាំ​ ២០០៣ ប៉ុន្តែ​ទំនោរ​នៃ​ការ​ថត​រូប​ដោយ​ប្រើ​កាមេរ៉ា​ពេល​នោះ​មិន​ទទួល​បាន​ការ​ពេញ​និយម​ខ្លាំង​ប៉ុន្មាន​ឡើយ។ ត្រកូល​ iPhone ទើប​តែ​មាន​កាមេរ៉ា​ថត​រូប​ខាង​មុខ នៅ​ឆ្នាំ​ ២០១០ តែ​ប៉ុណ្ណោះ​ ជា​មួយ​ម៉ូដែល​ iPhone 4។

-កាមេរ៉ា​ភ្លោះ

​ប្រព័ន្ធ​កាមេរ៉ា​ភ្លោះ​ទើប​តែ​ល្បី​ខ្លាំង​​ពេល​ Apple យក​ទៅ​បំពាក់​លើ iPhone 7 Plus ប៉ុន្តែ​ប្រព័ន្ធ​កាមេរ៉ា​នេះ​មាន​ប្រើ​​តាំង​ពី​ខែ​មេសា​ ឆ្នាំ​ ២០០៧ មក​ម្ល៉េះ​​ ដោយ​បាន​បំពាក់​លើ​ទូរសព្ទ Samsung ម៉ូដែល​ SCH-B710។ ​

​-ជំនួយ​ការ​សិប្បនិម្មិត

​IBM Simon ដែល​ចេញ​នៅ​ឆ្នាំ​ ១៩៩២ ក៏​ជា​ស្មាតហ្វូន​ដំបូង​គេ​ដែល​មាន​ជំនួយ​ការ​សិប្បនិម្មិត​ដ៏​ឆ្លាត​វៃ​ដែរ ​ហើយ​ជំនួយ​ការ​សិប្បនិម្មិត​សម័យ​ថ្មី​ដំបូង​គេ​ដែល​​ដំឡើង​​លើ​ស្មាតហ្វូន​គឺ​ Siri ​ដែល​ជា​មុខងារ​មួយ​លើ​ iPhone 4s៕

​ ​​

ប្រភព៖ Dailymail | Cnet | engadget | Wikipedia   ប្រែ​សម្រួល៖ សុខហេង