កីឡាករ ហ្វីលីក មានជំនឿចិត្តរឹតតែខ្លាំងបន្ទាប់ពីហាត់នៅប្រទេសថៃរួច

2017-08-17 07:07:42
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករជម្រើសជាតិប្រដាល់សកលកម្ពុជា ហ្វីលីក ថាខ្លួនរឹតតែមានជំនឿចិត្តខ្ពស់ថានឹងឈ្នះមេដាយនៅស៊ីហ្គេម ឆ្នាំ ២០១៧ នៅប្រទេសម៉ាឡេស៊ី នាប៉ុន្មានថ្ងៃខាងមុខនេះ។

កីឡាករ ហ្វីលីក(Felix) បានឲ្យដឹងថា ការហ្វឹកហាត់មួយរយៈពេលនៅឯប្រទេសថៃនេះ គឺល្អមែនទែន គេបានហ្វឹកហាត់រួមគ្នាជាមួយកីឡាករថៃ និងឡាវ ហើយទទួលបានបទពិសោធបន្ថែមជាច្រើនមិនត្រឹមតែប៉ុណ្ណោះ គេក៏បានប្រកួតសមជាមួយពួកគេបានដល់ទៅ៦ថែមទៀត។ ការហ្វឹកហាត់នៅប្រទេសថៃ គឺគេហាត់ខ្លាំងជាងនៅកម្ពុជា។

អ្នកប្រដាល់វ័យ៣១ឆ្នាំរូបនេះបន្តថា បើនិយាយពីតិចនិកប្រកួតនៅ គឺគេមានរួចជាស្រេចហើយ ការហ្វឹកហាត់នៅថៃបន្ថែមនេះ គឺខ្លួនចង់ផ្ដោតខ្លាំងលើចិត្តសាស្ត្រពេលបន្ថែម ព្រោះនៅកម្ពុជាគេមិនមានដៃដើម្បីហាត់សម ឬប្រកួតសាកល្បងនោះឡើយ។ កាលណាមិនបានប្រកួតសមឬគ្មានដៃគូនោះចិត្តសាស្ត្រពេលប្រកួតមានកម្រិតទាប។ ការដែលទៅហាត់នៅថៃ ហើយបានប្រកួតជាមួយថៃ និងឡាវពេលកំពុងហ្វឹកហាត់នេះ វាធ្វើឲ្យគេមានការរីកចម្រើនខាងចិត្តសាស្ត្រ និងមានទំនុកចិត្តខ្លាំងថែមទៀតឆ្ពោះទៅយកមេដាយនៅស៊ីហ្គេម។ តាមរយៈការហ្វឹកហាត់នៅកម្ពុជាផង នៅថៃផងនោះ គេកីឡាករ ហ្វីលីក បេ្ដជ្ញាយកមេដាយជូនកម្ពុជាឲ្យបាននៅពេលខាងមុខនេះ។

សម្រាប់ប្រភេទកីឡាប្រដាល់សកល នឹងត្រូវចេញដំណើរទៅប្រទេសម៉ាឡេស៊ី នៅថ្ងៃទី១៨ ខែសីហា ឆ្នាំ២០១៧ នេះ។ កីឡាករ និងប្រតិភូទាំងអស់ដែលត្រូវចេញទៅមាន ៨នាក់ ក្នុងនោះប្រធានសហព័ន្ធ ឆឹង យ៉ាវយ៉េន លោកគ្រូ វ៉ែន សុផល លោកគ្រូ Rolando Castellano កីឡាករ ហ្វីលីក ផល សោភ័ណ្ឌ ពេជ្រ ម្ទេសខ្មាំង ហង្ស រ៉ាម៉ន និង សាន តុលា៕

អត្ថបទ៖ នួន ស៊ីណា