បង្កងធម្មជាតិតាកែវ ចាប់មានបណ្ដើរៗហើយ

2017-08-29 03:08:38
ចំនួនមតិ 0 | ចំនួនចែករំលែក 0

ចន្លោះមិនឃើញ

បង្កងធម្មជាតិឆ្នាំនេះ ចាប់ផ្ដើមមានតាំងពីពាក់កណ្ដាលខែ សីហាមកម្ល៉េះ ដែលឆ្នាំនេះខុសពីឆ្នាំមុនៗ ប៉ុន្តែមិនទាន់សំបូរខ្លាំងនៅឡើយទេ។ នេះតាមការឲ្យដឹងរបស់ម្ចាស់ទីតាំងលក់បង្កងស្រី អូននៅខាងកើតមន្ទីរពាណិជកម្មផ្សារណាត់ខេត្តតាកែវ។

ម្ចាស់ទីតាំងលក់បង្កងខាងលើប្រាប់ថា ក្នុងខែដំបូងនេះបង្កងធម្មជាតិមានមែន តែមិនទាន់សំបូរខ្លាំងទេហើយបង្កងក៏នៅតូចៗដែរ គឺប្រហែលជាជាង២០បង្កងទើបបាន១គីឡូក្រាម។ ខែនេះបង្កងធម្មជាតិមិនទាន់ធំពេញសាច់ទេនេះ គឺចាប់ពីខែវិច្ឆិកា ដល់ខែ មករាឯណោះ ទើបបង្កងធំៗល្អ។

«វាតូចមែន ប៉ុន្តែមានរសជាតិឆ្ងាញ់មានតម្លៃត្រឹមតែ ២២ដុល្លារក្នុង១គីឡូក្រាម ខណៈបង្កងទន្លេមានតម្លៃតែ១៨ដុល្លារ។» ស្រីអូននិយាយ។

ដោយឡែកម្ចាស់លក់បង្កងម្នាក់ទៀតយីហោម៉ាក់ចង្រិតនៅខាងលិចកំពង់ទូកផ្សារណាត់បានឲ្យដឹង ថា «បង្កងធម្មជាតិឆ្នាំនេះរំពឹងថាសំបូរជាងឆ្នាំកន្លងទៅព្រោះអំណោយផលដោយសារទឹកបឹង ទន្លេអាចឡើងធំជាងឆ្នាំមុនៗជាក់ស្ដែងគឺចាប់ពីឥឡូវនេះទៅម៉ូយបង្កងនៅតាមស្រុកបូរីជលសារ ស្រុកអង្គរបុរី ដែលដាក់ព្រួលរបាំងនៅក្នុងបឹងបានបង្កងមកលក់អោយខ្ញុំបណ្ដើរៗគ្រាន់តែថា ដើមដៃអញ្ចឹងបង្កងនៅតូចៗបន្តិច។»

ប្រភពខាងលើបញ្ជាក់ថា បង្កងធម្មជាតិនេះសំដៅលើបង្កង ដែលនេសាទបានពីក្នុងបឹងដោយឧបករណ៍នេសាទផ្សេងៗដូចជា របាំង ព្រួល ដាក់លប ដាក់សាយឺនជាដើម ឯបង្កងទន្លេជាបង្កងដែលគេចិញ្ចឹមបែបធម្មជាតិនៅក្នុងអាងទន្លេ ប៉ុន្តែមានរសជាតិប្រហាក់ ប្រហែលគ្នាដែរ៕