បាញ់ថ្នាំក្រហាយភ្នែកដាក់អ្នកលក់ ដោយសារខឹងមិនលក់ស្រាឲ្យ (មានវីដេអូ)

2017-08-30 12:41:26
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងទីក្រុង Pattaya ប្រទេសថៃ បុរសវ័យកណ្ដាលម្នាក់ កាលពីពេលថ្មីៗនេះ ត្រូវបានចាប់ខ្លួន បន្ទាប់ពីបាញ់ថ្នាំក្រហាយភ្នែកទៅកាន់អ្នកគិតលុយ ក្នុងហាងលក់ដូរមួយកន្លែង ពីព្រោះខឹងពួកគេរឿងមិនព្រមលក់ស្រាឲ្យក្នុងម៉ោងដែលច្បាប់ហាមមិនឲ្យលក់គ្រឿងស្រវឹង។

បើតាមសំដីបុគ្គលិកហាងនោះ បានឲ្យដឹងថា បុរសដៃដល់បានដើរចូលទៅក្នុងហាងដើម្បីទិញស្រា ប៉ុន្តែត្រូវបានអ្នកលក់បដិសេធមិនព្រមលក់ឲ្យ ដោយសារជននេះបានមកទិញស្រា ក្នុងចន្លោះម៉ោងដែលច្បាប់ហាមមិនឲ្យលក់គ្រឿងស្រវឹង។ ខឹងរឿងមិនលក់ឲ្យពេក ជនដៃដល់រូបនេះ បានយកកំប៉ុងថ្នាំក្រហាយភ្នែកមួយ រួចធ្វើការបាញ់សំដៅទៅកាន់អ្នកគិតលុយពីរនាក់ បន្ទាប់មកបុរសរូបនេះបានចូលទៅរើយកបារី និងស្រាមួយចំនួន រួចក៏ដើរចេញបាត់ទៅ។

ក្រោយមកប៉ូលិសបានចាប់ខ្លួន ជនដៃដល់រូបនេះ នៅទីតាំងច្រកមួយកន្លែងនៅជិតហាងដែលជននេះធ្វើសកម្មភាពបាញ់ថ្នាំក្រហាយភ្នែកទៅកាន់អ្នកលក់។ ប៉ូលិសបានឃុំខ្លួនបុរសម្នាក់នេះ ដើម្បីធ្វើការស៊ើបអង្កេតបន្ថែម។ បើតាមសេចក្ដីរាយការណ៍ បុរសនេះស្ថិតក្នុងស្ថានភាពស្រវឹងយ៉ាងខ្លាំងរហូតដល់មិនអាចឆ្លើយសំណួរដែលប៉ូលិសបានសួរបាន។

គួរកត់សម្គាល់ផងដែរថា ក្នុងច្បាប់ថៃសព្វថ្ងៃ អ្នកលក់ត្រូវបានហាមឃាត់មិនឲ្យលក់គ្រឿងស្រវឹងទៅកាន់អ្នកទិញក្នុងចន្លោះពីពេលពាក់កណ្ដាលអធ្រាត្រ រហូតដល់ម៉ោង ១១ថ្ងៃត្រង់ និងចន្លោះពីម៉ោង ២ ដល់ ៥ រសៀល៕

ទស្សនាវីដេអូ៖