វេជ្ជបណ្ឌិតឥណ្ឌាឈ្លោះគ្នាបែកផ្សែង ពេលកំពុងវះកាត់អ្នកជំងឺសម្រាលកូន

2017-08-31 02:18:45
ចំនួនមតិ 0 | ចំនួនចែករំលែក 0

ចន្លោះមិនឃើញ

វេជ្ជបណ្ឌិតឥណ្ឌា ២រូប ត្រូវបានបញ្ឈប់ពីការងារបណ្ដោះអាសន្ន បន្ទាប់ពីវីដេអូឈ្លោះប្រកែកតឹងសរសៃកដាក់គ្នា ពេលកំពុងវះកាត់ឆ្លងទន្លេអ្នកជំងឺស្ត្រីម្នាក់ ត្រូវបានផ្សព្វផ្សាយព្រោងព្រាត។

វីដេអូបង្ហាញពីហេតុការណ៍នេះ បានកើតឡើងនៅមន្ទីរពេទ្យ Umaid ភាគខាងជើងរដ្ឋ Rajasthan ត្រូវបានគេចែកចាយពាសពេញអ៊ីនធឺណិត និងបង្កឲ្យមានការខឹងសម្បារពីមហាជនយ៉ាងខ្លាំង។ បុគ្គលិកមន្ទីរពេទ្យជាន់ខ្ពស់ម្នាក់ប្រាប់អ្នកយកព័ត៌មានថា ស្ត្រី និងកូនមិនមានគ្រោះថ្នាក់អ្វីឡើយ។

វេជ្ជបណ្ឌិតលោកស្រី Ranjana Desai ជាប្រធានមន្ទីរពេទ្យ Umaid ទីក្រុង Jodhpur ថ្លែងថា ទង្វើនេះពិតជាមិនត្រឹមត្រូវទេ។ តាមរយៈវីដេអូបង្ហោះលើអនឡាញ វេជ្ជបណ្ឌិតទាំងពីរនេះ ត្រូវបានគេឮប្រមាថ និងឈ្លោះប្រកែកគ្នាខ្លាំងៗជាភាសាហិណ្ឌូថា តើអ្នកជំងឺបានហូបអាហារមុនពេលវះកាត់ ឬយ៉ាងណា។

លោកស្រីបន្តថា វេជ្ជបណ្ឌិតទាំង ២រូប មិនត្រូវបានព្យួរការងារជាផ្លូវការទេ ប៉ុន្តែឲ្យពួកគេផ្អាកកិច្ចការទាំងអស់នៅមន្ទីរពេទ្យ ខណៈដំណើរការស៊ើបអង្កេតផ្ទៃក្នុងកំពុងបន្ត។ លើសពីនេះ មន្ទីរពេទ្យក៏កំពុងប្រមូលសេចក្ដីថ្លែងការណ៍ពីបុគ្គលិកផ្សេងៗដើម្បីរកឲ្យឃើញថា អ្នកណាជាអ្នកថតវីដេអូ និងលេចធ្លាយលើអនឡាញតាមរបៀបណា៕