ត្បិតពិការភ្នែក តែយុវតី ដាណែត ចេះឧបករណ៍ភ្លេងពិណពាទ្យស្ទើរគ្រប់មុខ
- 2017-09-11 05:45:23
- ចំនួនមតិ 0 | ចំនួនចែករំលែក 0
ត្បិតពិការភ្នែក តែយុវតី ដាណែត ចេះឧបករណ៍ភ្លេងពិណពាទ្យស្ទើរគ្រប់មុខ
ចន្លោះមិនឃើញ
ជាក្មេងស្រីពិការភ្នែកអាចមើលឃើញព្រាលៗ កញ្ញា គង់ ដាណែត មិនត្រឹមតែចេះលេងពិណប៉ុណ្ណោះទេ ថែមទាំងចេះឧបករណ៍ភ្លេងពិណពាទ្យស្ទើរគ្រប់ឧបករណ៍។
មានស្រុកកំណើត និងរស់នៅខេត្តបាត់ដំបង ដាណែត បានមកចូលរួមលេងភ្លេងក្នុងកម្មវិធីបិទមហោស្រពតន្ត្រី និងចម្រៀងកុមារឆ្នាំ២០១៧កាលពីពេលថ្មីៗនេះ នាងបានលេងឧបករណ៍ពិណដែលជាឧបករណ៍កម្រមានអ្នកចេះ ជូនភ្ញៀវកិត្តិយសដែលបានចូលរួម ក្នុងនាមជាតន្ត្រីករកិត្តិយស។
មិនមែនមានតែឧបករណ៍ពិណទេ ដែល ដាណែត ចេះ តែក៏មានឧបករណ៍រនាតឯក រនាតធុង គងតូច គងធំ និងមានឧបករណ៍មួយចំនួនទៀតដែលប្អូនអាចលេងបាន។ យុវតីរូបនេះទទួលបានការបណ្ដុះបណ្ដាលភ្លេងពីអង្គការគ្រួសារថ្មី បច្ចុប្បន្ននាងរៀនថ្នាក់ទី១១។
ស្ថិតក្នុងគ្រួសារកសិករ ក្មេងស្រីវ័យ១៩ឆ្នាំរូបនេះ ត្រូវរៀន៨ម៉ោងក្នុង១ថ្ងៃ នៅសាលារដ្ឋ៤ម៉ោង និងនៅក្នុងអង្គការ៤ម៉ោង។ ប្អូនស្រីរៀនភ្លេងរយៈពេល២ឆ្នាំ អាចចេញលេងភ្លេងក្នុងកម្មវិធីផ្សេងៗបាន ចំណែកប្រាក់ដែលទទួលបានប្រមាណ៤ម៉ីនរៀលក្នុងមួយរោង។
“ខ្ញុំអាចលេងឧបករណ៍ភ្លេងពិណពាទ្យបានជិតគ្រប់ ដកតែស្គរចេញទេ ហើយឧបករណ៍ដែលខ្ញុំចាប់បានច្រើនជាងគេគឺរនាត។ ខ្ញុំចេញទៅលេងភ្លេងក្នុងកម្មវិធីបានច្រើនមានពិធីបុណ្យ ពិធីការ និយាយទៅកម្មវិធីអីក៏ដោយឱ្យតែត្រូវការភ្លេង ខ្ញុំលេងបានទាំងអស់”។
ដាណែត ចេះលេងឧបករណ៍ភ្លេងខ្មែរតាំងពីអាយុ១០ឆ្នាំម្ល៉េះ ត្បិតនាងចេះឧបករណ៍ភ្លេងបានយ៉ាងច្រើន និងអាចយកចំណេះនេះចិញ្ចឹមខ្លួនបានក៏ដោយ តែបំណងប្រាថ្នាធំរបស់នាងបែរជាចង់ធ្វើជាគ្រូបង្រៀនអក្សរសាស្ត្រខ្មែរនៅថ្នាក់អនុវិទ្យាល័យទៅវិញ។ “ថ្ងៃអនាគតខ្ញុំចង់ធ្វើជាគ្រូបង្រៀនភាសាខ្មែរ ខ្ញុំចង់បង្រៀនកូនខ្មែរឱ្យមានចំណេះដឹងទើបពួកគេមិនតែលតោល។ ហេតុផលមិនច្រើនទេ ខ្ញុំស្រលាញ់ការងារនេះ និងចង់ពង្រឹងអក្សរសាស្ត្រជាតិទៅដល់កូនខ្មែរ និងចង់ឱ្យពួកគេមានចំណេះដឹងក្នុងខ្លួនដើម្បីអាចជួយជាតិបាន"។
ដាណែត បានមករៀនភ្លេងនៅក្នុងអង្គការគ្រួសារថ្មី នៅខេត្តកំពង់ចាមតាំងពីអាយុ៨ឆ្នាំ រហូតដល់បច្ចុប្បន្ន។ ពេលកំពុងសិក្សាថ្នាក់វិទ្យាល័យនាងបានចេញទៅលេងភ្លេងក្នុងកម្មវិធីតូចធំជាច្រើន ដោយបានថវិកាបន្តិចបន្តួចសម្រាប់ផ្គត់ផ្គង់ការសិក្សាប្រចាំថ្ងៃ។