ប្រយ័ត្ន! អាហារសល់ខ្លះអាចបង្កគ្រោះថ្នាក់ដល់ស្លាប់បើរក្សាទុកមិនត្រឹមត្រូវ

2017-09-12 06:57:13
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីនៃក្រសួងសុខាភិបាល បានអំពាវនាវដលល់ប្រជាពលរដ្ឋដែលរក្សាអាហារទុកក្នុងកម្ដៅធម្មតាលើសពី២ម៉ោងហើយ មិនគួរបរិភោគបន្តនោះទេ ព្រោះថាអាចបង្កគ្រោះថ្នាក់ដល់អាយុជីវិត។

នៅព្រឹកមិញនេះ វេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធជម្ងឺឆ្លង ថ្លែងក្នុងសិក្ខាសាលាស្ដីពីការបង្ការការបំពុលចំណីអាហារ និងការពុលស្រាក្នុងកំឡុងពេលពិធីបុណ្យភ្ជំបិណ្ឌ ថាប្រជាពលរដ្ឋ កុំរក្សាទុកអាហារដែលសល់ក្នុងកម្ដៅធម្មតាចាប់ពីពីរម៉ោងឡើងហើយមិនត្រូវយកមកកម្ដៅបរិភោគវិញនោះទេ ព្រោះថាអាហារមួយចំនួនវានឹងខូចគុណភាពនៅពេលចុះត្រជាក់។

លោកលើកជាឧទាហរណ៍ថា ម្ហូបដែលគេនិយមក្នុងពេលមានពិធីបុណ្យធំៗ តួយ៉ាង ម្ហូបចាប់ឆាយ (សម្លចាប់ឆាយ) ដែលភាគច្រើន គេបញ្ចូលម្ហូបដែលនៅសល់ និងបន្លែផ្សេងៗរួមគ្នាទុក ហើយពេលវាចុះត្រជាក់យូរម៉ោងហើយក៏នៅមានប្រជាពលរដ្ឋខ្លះ បន្តយកវាទៅកម្ដៅទៀត ដែលត្រង់ចំណុចនេះលោកថាវាពិតជាគ្រោះថ្នាក់ណាស់។

លោក លី សូវ៉ាន់ ណែនាំថា បើចង់រក្សាម្ហូបទាំងនោះទុកក្នុងប្រព័ន្ធត្រជាក់ត្រូវរក្សាក្នុងសីតុណ្ហភាពទាបជាង៥អង្សាសេ និងបើដាក់ក្នុងឧបករណ៍កម្តៅត្រូវរក្សាឲ្យលើសពីសីតុណ្ហភាព៦០អង្សាសេ។ លោកថាសីតុណ្ហភាពពី៥ទៅ៦០អង្សាសេជាសីតុណ្ហភាពគ្រោះថ្នាក់។

វេជ្ជបណ្ឌិត លី សូវ៉ាន់ បន្ថែមថា គ្រោះថ្នាក់នៃការពុលចំណីអាហារភាគច្រើនបណ្ដាលមកពីការរៀបចំមិនមានអនាម័យល្អ ទាំងក្នុងចំណីអាហារ ការទុកដាក់ និងការចែកចាយ មិនបានល្អ។

ចំណែកការពុលស្រាវិញ លោកថាកើតចេញការពិសាស្រាដែលផលិត ឬបិត គ្មានលក្ខណៈបច្ចេកទេសត្រឹមត្រូវ ដែលអាចគ្រោះថ្នាក់ធ្ងន់ធ្ងរ និងអាចវិវិត្តទៅស្លាប់បាន។

មន្ត្រីក្រសួងសុខាភិបាលរូបបនេះ បានរំឭកដល់ប្រជាពលរដ្ឋ បើមានរោគសញ្ញាបន្ទាប់ពីញ៉ាំអាហារ ឬពិសាស្រារួច ដូចជា ក្អួតចង្អោរ រាគ រមួល ឈឺក្បាល ឈឺពោះ វិលមុខ ងងឹតភ្នែក សន្លប់ ប្រកាច់ ពិបាកដង្ហើ់ម សូមទៅរកមជ្ឈមណ្ឌលសុខភាពនៅជិតផ្ទះបំផុតជាបន្ទាន់៕

អត្ថបទ៖ ស៊ិន សាវ៉េត