ប្រធានាធិបតីរុស្ស៊ី ប្រកាសកម្ទេចអាវុធគីមីជាប្រវត្តិសាស្ត្រ និងរិះគន់ ដូណាល់ ត្រាំ

2017-09-28 02:18:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីរុស្ស៊ី វ្ល៉ាឌិមៀ ពូទីន បានប្រកាសថា រុស្ស៊ីនឹងបំផ្លាញអាវុធគីមីនៅថ្ងៃទី ២៧កញ្ញានេះ (ត្រូវនឹងថ្ងៃទី ២៨កញ្ញា នៅកម្ពុជា) ដែលជាព្រឹត្តិការណ៍ប្រវត្តិសាស្ត្រ និងបានរិះគន់ប្រធានាធិបតីអាមេរិក ដូណាល់ ត្រាំ មិនធ្វើតាមច្បាប់អន្តរជាតិ។

បុរសខ្លាំងរុស្ស៊ីរូបនេះ បានប្រកាសតាមកញ្ចក់ទូរទស្សន៍ថា អ្វីៗគ្រប់យ៉ាងដែលរុស្ស៊ីបន្សល់ទុកតាំងពីសម័យសូវៀតហើយវាមានសមត្ថភាពគ្រប់គ្រាន់ក្នុងការបំផ្លាញជីវិតរស់នៅលើផែនដី នឹងត្រូវកម្ទេចចោលគ្មានឲ្យសល់។ ការបំផ្លាញនឹងធ្វើឡើងនៅក្នុងរោងចក្រមួយនៅជិតភូមិ Kizner សង្កាត់ Urals ទីក្រុងក្រឹមឡាំង។

បន្ទាប់ពីថ្លែងបែបនេះ លោកក៏បានចំអកក្រុងវ៉ាស៊ីនតោនថា "សហរដ្ឋអាមេរិក មិនបានអនុវត្តតាមកាតព្វកិច្ចអន្តរជាតិឲ្យបានពេញលេញទេ។ នេះគឺជាព្រឹត្តិការណ៍ប្រវត្តិសាស្ត្រពិតប្រាកដ និងជាការបោះជំហានដ៏ធំក្នុងការបង្កើតពិភពលោកឲ្យទាន់សម័យ មានសមភាព និងសុវត្ថិភាព"។

លោកបន្តថា ក្រុងវ៉ាស៊ីនតោន បានពន្យារគម្រោងរបស់ខ្លួនការបំផ្លាញអាវុធគីមីដោយលើកឡើងថា មិនមានមូលនិធិគ្រប់គ្រាន់។ ទោះយ៉ាងណា ពូទីន សង្ឃឹមទុកថា អាមេរិកនឹងគោរពតាមកាតព្វកិច្ចខ្លួន ដែលជាផ្នែកមួយនៃកិច្ចព្រមព្រៀងអន្តរជាតិដូចប្រទេសផ្សេងៗទៀតធ្វើដែរ៕