iPhone 8 Plus សាកថ្មសុខៗហើបអេក្រង់រៀបនឹងផ្ទុះ ល្បីផ្អើលតៃវ៉ាន់

2017-09-30 02:40:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្អែកតាមសារព័ត៌មានតៃវ៉ាន់ឲ្យដឹងថាស្ត្រីម្នាក់មានត្រកូល Wu មកពីទីក្រុង Taichung ភាគខាងលិចកោះតៃវ៉ាន់បានទិញ iPhone 8 Plus មកប្រើប្រាស់កាលពីថ្ងៃសៅរ៍សប្ដាហ៍មុន។ iPhone នេះដែររស់បានត្រឹមថ្ងៃអង្គារពេលថ្ងៃត្រង់តែប៉ុណ្ណោះ ព្រោះតែបានផ្ទុះពេលកំពុងសាកថ្ម។

រូបភាព ពី iPhone 8 Plus ដែលផ្ទុះនេះត្រូវបានគេចែកចាយតៗគ្នាជាច្រើនលើបណ្ដាញទំនាក់ទំនងសង្គម។ រូបភាពបានបង្ហាញថា iPhone 8 Plus មិនមានស្លាកស្នាមឆេះចេញភ្លើងអ្វីនោះទេ ប៉ុន្តែបង្ហាញថាអេក្រង់ទូរសព្ទបានប៉ោងចេញក្រៅដែលអាចបណ្ដាលមកពីកម្ដៅភាយចេញពីថ្ម។

តាមការចុះផ្សាយឲ្យដឹងដែរថាស្ត្រីឈ្មោះ Wu ព្យាយាមសាកបញ្ចូលថ្មនៅពេលថ្មសល់ ៧០%។ ៣ នាទីក្រោយទូរសព្ទក៏ហើបអេក្រង់ដូចបង្ហាញក្នុងរូបភាព។ ឃើញហេតុការណ៍ដូចនេះស្ត្រីរូបនេះស្ទុះទៅដកឌុយសាកចេញពីទូរសព្ទភ្លែត ដោយបារម្ភថាអាចឆេះចេញជាផ្កាភ្លើង។ គាត់បន្ថែមថា បានសាកទូរសព្ទដោយប្រើឆ្នាំងសាកមានក្នុងប្រអប់ស្រាប់។

បញ្ជាក់ថា iPhone ដែលផ្ទុះនេះត្រូវបានបញ្ជូនទៅកាន់ក្រុមហ៊ុន Apple ដើម្បីធ្វើការស៊ើបអង្កេតរកមូលហេតុនាំឲ្យផ្ទុះបែបនេះ។ ត្បិតថាមិនទាន់ដឹងមូលហេតុ ប៉ុន្តែមហាជនមួយចំនួនបានដាក់បន្ទុកលើថ្ម ដែលផ្គត់ផ្គង់ដោយ Samsung SDI, Amprex Technology Limited, LG Chem។ ពីរក្រុមហ៊ុនក្នុងចំណោម ៣ ក្រុមហ៊ុន ជាអ្នកផ្គត់ផ្គង់ថ្មឲ្យ Galaxy Note 7 ដែលមានបញ្ហាផ្ទុះថ្មកាលពីឆ្នាំមុន។ យ៉ាងណាៗនេះគ្រាន់តែជាការយល់ឃើញមួយដែលមិនបានឆ្លងកាត់ការវិភាគច្បាស់លាស់តែប៉ុណ្ណោះ៕

ប្រភព៖ Shanghaiist ប្រែសម្រួល៖ សុខហេង