នាវាកូរ៉េខាងជើងដោតទង់ជាតិកម្ពុជា ត្រូវអេហ្សីបឃាត់ទុក មានដឹករ៉ុកកែតជាង ៣ម៉ឺនគ្រាប់

2017-10-02 08:55:17
ចំនួនមតិ 0 | ចំនួនចែករំលែក 0

ចន្លោះមិនឃើញ

នាវាដ៏ធំមួយរបស់ប្រទេសកូរ៉េខាងជើង ដែលដោតទង់ជាតិកម្ពុជា ត្រូវបានអាជ្ញាធរអេហ្សីបឃាត់ទុកនៅព្រែកជីកស៊ុយអេ ដោយរកឃើញគ្រប់រ៉ុកកែតបង្កប់ជាង ៣ម៉ឺនគ្រាប់។ នេះបើតាមសារព័ត៌មាន Washington Post ចុះផ្សាយប៉ុន្មានម៉ោងមុន។

នាវា Jie Shun

ប្រភពខាងលើបានបញ្ជាក់ថា កាលពីខែសីហាកន្លងទៅ សារសម្ងាត់មួយបានបញ្ជូនពីក្រុង Washington ទៅកាន់ទីក្រុងកៃរ៉ូ ប្រទេសអេហ្សីប ដោយអះអាងថាមាននាវាសម្ងាត់មួយកំពុងបើកឆ្ពោះទៅកាន់ព្រែកជីកស៊ុយអេ។ នាវានោះមានឈ្មោះ Jie Shun ដោតទង់ជាតិរបស់ប្រទេសកម្ពុជា តែមានប្រភពដើមនៅប្រទេសកូរ៉េខាងជើង។

ដោយទទួលបានសារសម្ងាត់ មន្ត្រីគយរដ្ឋាកររបស់ប្រទេសអេហ្សីប បានរង់ចំានាវានោះចូលដែនទឹករបស់ខ្លួន រួចក៏ឃាត់ទុកដើម្បីឆែកឆេរតែម្ដង។ អាជ្ញាធរអេហ្សីបបានប្រទះឃើញរ៉ុកកែតជាង ៣ម៉ឺនគ្រាប់ លាក់ទុកក្រោមកេះរ៉ែដែក។ តាមរបាយការណ៍របស់អង្គការសហប្រជាជាតិដែលបង្ហាញក្រោយមក បានឲ្យដឹងថា នោះជាការរឹបអូសអាវុធធំបំផុតមួយក្នុងប្រវត្តិសាស្ត្រ ប្រឆាំងនឹងកូរ៉េខាងជើង។

រ៉ុកកែតដែលប្រទះឃើញ

តើអាវុធនោះ ដឹកទៅលក់ឲ្យនរណា? រឿងរ៉ាវលម្អិត ជុំវិញការជួញដូរអាវុធដ៏ធំនេះ អាចត្រូវចំណាយពេលជាច្រើនខែដើម្បីស្វែងរកការពិត។ ប៉ុន្តែអ្នកដែលទិញអាវុធទាំងនោះ ត្រូវគេដឹងថាជាជនជាតិអេហ្សីបផ្ទាល់តែម្ដង ដោយមិនទាន់ដឹងគោលបំណងច្បាស់ថាយកទៅធ្វើអ្វីនៅឡើយនោះទេ។ ពេលនេះ អាជ្ញាធរកំពុងបើកការស៊ើបអង្កេត ដោយអេហ្សីបបានអះអាងថានឹងចូលរួមសហការជាមួយអង្គការសហប្រជាជាតិ ដើម្បីបំផ្លាញអាវុធខុសច្បាប់ទាំងអស់។

បច្ចុប្បន្ន ប្រទេសកូរ៉េខាងជើងកំពុងរងសម្ពាធពីសហគមន៍អន្តរជាតិ ព្រមទាំងទណ្ឌកម្មផ្នែកសេដ្ឋកិច្ចនានា។ យ៉ាងណាក្ដី គេឃើញថារបបដឹកនាំរបស់ គីម ជុងអ៊ុន នៅតែអាចបន្តដំណើរទៅមុខបាន ដោយការជួញដូរអាវុធទៅកាន់ប្រទេសជិតខាងមួយចំនួន ដែលជាប្រភពចំណូលមួយសម្រាប់ជាតិ៕

ប្រភព៖ Washingtonpost ប្រែសម្រួល៖ គង់ វិសាល