ខ្លាំងអស់ស្ទះ! Ronaldo បានពាន២ទៀតហើយ

2014-11-11 16:16:02
ចំនួនមតិ 0 | ចំនួនចែករំលែក 0

ចន្លោះមិនឃើញ

Cristiano Ronaldo ទទួលបានពានរង្វាន់ពីរទៀតហើយគឺពានទីមួយឈ្មោះថា ពាន Pichichi ក្នុងនាមជាកីឡាកររកគ្រាប់បាល់បានច្រើនជាងគេនៅអេស្ប៉ាញរដូវកាលមុន និងពានមួយទៀតគឺជាពាន Di Stefano ក្នុងនាមជាកីឡាករល្អបំផុតនៅ La Liga រដូវកាលមុនដូចគ្នា។

ពានរង្វាន់ Pichichi នេះ ខាងកាសែតអេស្ប៉ាញ Marca តែងតែផ្ដល់ឱ្យទៅកីឡាករណាដែលអាចស៊ុតចូលច្រើនជាងគេក្នុងមួយរដូវកាល ហើយរដូវកាលមុននេះ គឺមានតែ CR7 នេះហើយដែលអាចស៊ុតចូលច្រើនជាងគេ ពោលគឺ៣១គ្រាប់។ ចំណែកពានរង្វាន់ Di Stefano វិញ គឺជាពានរង្វាន់កីឡាករល្អបំផុតនៅ La Liga ហើយម្យ៉ាងទៀតការដាក់ឈ្មោះពាននេះថា Di Stefano នេះគឺមកពីគេចង់រំលឹកដល់វីរបុរសបាល់ទាត់ខ្លាំងជាងគេនៅអេស្ប៉ាញលោក Alfredo Di Stefano ដែលបានលាចាកលោកនេះកាលពីខែកក្កដា ឆ្នាំ២០១៤ ក្នុងវ័យ៨៨ឆ្នាំ។

លោក Alfredo Di Stefano កាលនៅលេងបាល់ទាត់

បន្ទាប់ពីទទួលបានពានរង្វាន់កីឡាករល្អបំផុតនៅ La Liga រដូវកាល ២០១៣-២០១៤ នេះរួចមក Ronaldo បាននិយាយពីអារម្មណ៍ផ្ទាល់ខ្លួនរបស់គេថា៖ “ខ្ញុំពិតជាសប្បាយចិត្តណាស់ក្នុងការទទួលបានពាននេះ ប៉ុន្តែវាជារឿងអាក្រក់បំផុតដែលខ្ញុំមិនបានទទួលពាននេះពីលោក Di Stefano។ គាត់ជាមនុស្សម្នាក់ដែលខ្ញុំគោរពស្រលាញ់ ទោះជាគាត់មិននៅលើលោកនេះក្ដី ប៉ុន្តែក្នុងបេះដូងខ្ញុំគឺមានគាត់រហូត”។

ដោយឡែកលោក Florentino Perez ដែលជាម្ចាស់ក្លិប Real Madrid បានក៏បាននិយាយដែរថា៖ “វាពិតជាស័ក្ដិសមណាស់ដែល Ronaldo ទទួលបានពានល្អបំផុតនៅ La Liga នេះ។ ខ្ញុំបានមើលគ្រប់ការប្រកួតរបស់គេ ហើយគេពិតជាមានបច្ចេកទេសខ្លាំងណាស់ក្នុងការលេងបាល់ទាត់។ កាលពីលោក Di Stefano នៅលេងបាល់ កាលនោះខ្ញុំនៅក្មេងនៅឡើយទេ ប៉ុន្តែខ្ញុំនៅចាំបានថាគាត់ក៏ខ្លាំងដូច CR7 នេះដែរ។ ពួកគេជាខ្សែប្រយុទ្ធមុតស្រួចដូចគ្នា”។

ពានរង្វាន់ទាំងពីរនេះ បើគិតតែ៥ឆ្នាំចុងក្រោយ គឺមានកីឡាករតែពីរនាក់ទេដែលអាចទទួលយកបានគឺ Lionel Mess និង Cristiano Ronaldo នេះឯង។ ទន្ទឹមនឹងនេះដែរ រដូវកាលថ្មីនៅ La Liga ខ្សែប្រយុទ្ធ CR7 រកបាន១៨គ្រាប់ទៀតហើយត្រឹមតែ១១ប្រកួតមកនេះ៕

ចុចអាន៖ Ronaldo ទទួលបានពានពី Facebook

ប្រែសម្រួល៖ មុន្នី រម្យ ប្រភព៖ dailymail