ទំនប់ត្រពាំងបឹងជាកន្លែងកម្សាន្តថ្មីសម្រាប់អ្នកខេត្តកំពត

2017-10-17 02:49:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ទំនប់ត្រពាំងបឹងក្នុងស្រុកឈូក ខេត្តកំពត កំពុងក្លាយជាកន្លែងលំហែកាយថ្មីមួយទៀតរបស់អ្នកស្រុកនេះបន្ទាប់ពីទំនប់នេះបានជួសជុលឡើងវិញកាលពីខែកញ្ញា ឆ្នាំ២០១៧ កន្លងទៅ ដែលបានរងការខូចខាតតាំងពីឆ្នាំ១៩៩២។

ទំនប់នេះមានផ្ទៃក្រឡាប្រហែលជាមួយគីឡូម៉ែត្រការ៉េ មានទឹកច្រើនហើយថ្លា និងមានខ្យល់អាកាសត្រជាក់ផង។ ចំំណុចទាំងនេះបានទាក់ទាញប្រជាពលរដ្ឋនៅជុំវិញតំបន់នោះមកលេងកម្សាន្តជាហូរហែ។

(ប្រជាពលរដ្ឋកំពុងធ្វើដំណើរកម្សាន្តនៅទំនប់ត្រពាំងបឹង)

កញ្ញា ឡាង សៀវម៉ី ជាសិស្សវិទ្យាល័យហ៊ុនសែនឈូក បានរៀបរាប់ថា តាំងពីទំនប់នេះកសាងរួចមក កញ្ញា បានមកលេងនៅទំនប់នេះជាច្រើនលើកមកហើយ។ កញ្ញាថា កញ្ញា មកលេងទំនប់នេះជាមួយគ្រួសារ និងពេលខ្លះមកជាមួយមិត្តភក្តិនាពេលពេលល្ងាចៗ ។ កញ្ញាបន្តថាៈ «ទីនេះមានភាពទាក់ទាញដោយសារមានទឹកច្រើន មានខ្យល់អាកាសបរិសុទ្ធ និងមានគេលក់នំចំណី...ទីនេះគឺមកអង្គុយលេង ជជែកកម្សាន្ត និងថតរូបលេងជាមួយមិត្តភក្តិ»។

(ពលរដ្ឋទៅកម្សាន្តកំពុងថតរូបនៅទំនប់ត្រពាំងបឹង)

ងាកទៅយុវជនបឿង ភារី ដែលមានទីលំនៅ ក្បែរទំនប់នេះដែរ បានលើកឡើងថា លោកឧស្សាហ៍មកលេងទំបន់នេះជាញឹកញាប់ជាមួយមិត្តភក្តិ ព្រោះថាទំនប់នេះមានមនុស្សច្រើនអ៊ូអរ ជាពិសេសមានខ្យល់បរិសុទ្ធ។ លោកបន្តថាៈ «កន្លែងមិនទាន់មានអ្វីលេងច្រើនមែន តែមនុស្សមកលេងច្រើន គេជិះម៉ូតូដើរលេង ហូបអីៗ និយាយគ្នាលេង ...ខ្យល់អាកាសល្អ”។

រីឯអ្នកស្រី ហ៊ឹម ស្រីតូច ជាម្ចាស់ទាទឹក បាននិយាយថា អ្នកស្រីទើបតែបានដាក់ទាទឹកចំនួនពីរគ្រឿងនិងថាមានភ្ញៀវច្រើនមកជិះលេង។ នៅថ្ងៃខាងមុខ អ្នកស្រីថានឹងបន្ថែមទាទឹកបន្ថែមទៀតដើម្បីបំពេញតម្រូវការអ្នកមកកម្សានុ្តនៅទំនប់នេះ។

អ្នកស្រីបន្ថែមថាៈ « រាល់ថ្ងៃមនុស្សមកលេងច្រើន តែអត់មានអីលេង...ខ្ញុំមានគម្រោងធ្វើកញ្ចុះអង្គុយលេង មានលក់ម្ហូបបាយអីចឹងទៅ កុំឲ្យភ្ញៀវមកពីឆ្ងាយៗអី គាត់មកលេងហើយអត់មានអីលក់ ណាមួយវាជួយទាក់ទាញភ្ញៀវ កុំឲ្យមានមនុស្សតែមួយឆាវហើយបាត់ទៅវិញចឹង»។

អត្ថបទដោយ៖ គីមសាយ