ចង់រកស៊ីមានបាន និង សុខសប្បាយ ទៅដល់កោះកុង កុំភ្លេចបន់នៅ ព្រះអង្គគោកធ្លក

2017-10-17 04:09:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្ញៀវទេសចរជាតិ និង អន្តរជាតិ ជាពិសេសភ្ញៀវថៃ ប្រសិនបានមកដល់ទឹកដីខេត្តកោះកុង តែងតែមិនរំលងទីសក្ការមួយកន្លែងល្បីស័ក្ដិសិទ្ធិ គឺនៅប្រាសាទព្រះអង្គគោកធ្លក ស្ថិតនៅស្រុកមណ្ឌលសីមា ក្បែរច្រកអន្តរជាតិចាំយាម។

ផ្លូវឡើងទៅប្រាសាទ ព្រះអង្គគោកធ្លក ស្ថិតនៅក្នុងស្រុកមណ្ឌលសីមា ខេត្តកោះកុង

លោក ឃួន ឆេងហួន អ្នកថែរក្សាប្រាសាទ ព្រះអង្គគោកធ្លក បាននិយាយថា ប្រាសាទមួយនេះបានកសាងនៅអំឡុងឆ្នាំ ២០០៦ ហើយយករចនាបថបាយ័ន នៅខេត្តសៀមរាប។ អ្នកស្រុកក្ដី ភ្ញៀវទេសចរជាតិ និង អន្តរជាតិក្ដី រមែងមកបន់ស្រន់នៅទីនេះ ព្រោះពួកគេជឿលើបារមីព្រះអង្គ។ ក្រៅពីមកបន់ស្រន់ លោក ឃួន ឆេងហួន ចេះស្រោចទឹក និង មើលផ្លូវក្នុង ដូច្នេះ ទើបមានមនុស្សមកប្រាសាទមួយនេះមិនដាច់។

លោក ឃួន ឆេងហួន អ្នកថែរក្សាប្រាសាទ ព្រះអង្គគោកធ្លក កំពុងផ្ដល់បទសម្ភាសន៍ ជាមួយ Sabay

លោក ឆេងហួន វ័យ ៦៤ ឆ្នាំ រស់នៅឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ដែលបានទៅថែរក្សាប្រាសាទព្រះអង្គគោកធ្លក តាំងពីឆ្នាំ ២០០៦ នោះ បាននិយាយថា ភ្ញៀវទេសចរថៃ ដែលបានមកដល់ស្រុកមណ្ឌលសីមា រមែងឈប់សុំចត ចុះមកបួងសួងនៅប្រាសាទព្រះអង្គគោកធ្លក ហើយអ្នកស្រុកវិញ តែងមកស្រោចទឹក និង អ្នកមកពីឆ្ងាយតែងមកបន់ស្រន់ ពេលត្រឡប់ទៅវិញឲ្យការធ្វើដំណើរបានសេចក្ដីសុខ និង រកស៊ីមានបាន ដែលការបួងសួងតែងបានសម្រេច ម៉្លោះហើយមានអ្នកមកជាហូរហែ។

អ្នកស្រុកម្នាក់ដែលសុំមិនបញ្ចេញឈ្មោះ បានប្រាប់ក្រុមការងារ Sabay ថា ហេតុតែថៃជឿលើព្រះអង្គគោកធ្លក ព្រោះតាំងពីកសាងប្រាសាទព្រះអង្គគោកធ្លក បែរទៅខាងលិច ជិតច្រកចាំយាម ព្រំដែនកម្ពុជា-ថៃ មក ធ្វើឲ្យប្រទេសថៃ កើតមានរឿងរ៉ាវឥតឈប់ ។ មួយទៀត ភ្ញៀវទេសចរថៃ បានមកបន់ស្រន់រកស៊ីមានបាន និង សុំសេចក្ដីសុខនៅព្រះអង្គ តែងតែបានសម្រេច ទើបធ្វើឲ្យថៃមួយចំនួនជឿព្រះអង្គ ខ្លាំងជាងខ្មែរទៅទៀត។

អ្នកភូមិមកស្រោចទឹក រំដោះគ្រោះ និង លើករាសី

ទាក់ទិននឹងបញ្ហានេះ លោក ឆេងហួន អ្នកថែរក្សាព្រះអង្គគោកធ្លក បាននិយាយថា លោកមិនបានដឹងអំពីរឿងនេះទេ ប៉ុន្តែ ពិតជាមានថៃមកបួងសួងនៅប្រាសាទមួយនេះមែន តែក៏មិនច្រើនណាស់ណាដែរ។

ប្រាសាទព្រះអង្គគោកធ្លក នៅស្រុកមណ្ឌលសីមា ខេត្តកោះកុង គឺយកតាមលំនាំព្រះអង្គគោកធ្លក នៅក្នុងរចនាបថបាយ័ន ស្ថិតនៅខាងលិចប្រាសាទបាយ័នបច្ចុប្បន្ន ។ ព្រះអង្គគោកធ្លកកសាងចុងសតវត្ស ទី១២ និង ដើមសតវត្សទី ១៣ (គស ១១៨២-១២២០) ដោយរាជ្យស្ដេចជ័យវរ្ម័នទី ៧ ដើម្បីឧទ្ទិសថ្វាយ ពុទ្ធសាសនា (មហាយាន)។

អំពីតួអង្គគោកធ្លក៖

ផ្អែកតាមឯកសាររូបពុទ្ធបដិមាករ គឺជារូបតំណាងឲ្យព្រះសមណគោតម បរមគ្រូនៃយើង។ ចំពោះព្រះនាមព្រះអង្គគោកធ្លកនេះ គឺ បុព្វបុរសយើងដាក់ភ្ជាប់ឈ្មោះប្រទេសខ្មែរ កាលពីសម័យហ្វូណន ឬនគរភ្នំ និង នគរគោកធ្លក ពីព្រោះបដិមាករពុទ្ធរូបអង្គនេះ មានបារមី ខ្លាំងពូកែណាស់ ហើយមានការគោរពបូជា បួងសួង សុំសេចក្ដីសុខចម្រើន បានបំណងប្រាថ្នា៕

សូមទស្សនាវីដេអូ