ដើម្បីវប្បធម៌ជាតិ ហង់ ភូមិរ៉ា បង្ហាត់របាំដោយមិនយកប្រាក់កម្រៃ

2017-10-24 04:26:19
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បករល្ខោនខោលលោក ហង់ ភូមិរ៉ា បានបង្កើតថ្នាក់បង្ហាត់សិល្បៈមួយឈ្មោះថា "ក្រុមយុវជនល្ខោនខោលជំនាន់ថ្មី" ដើម្បីផ្ដល់ឱ្យកាសឱ្យកូនខ្មែរបានទៅរៀនរបាំផ្នែកល្ខោនខោល និងរបាំផ្សេងៗដោយឥតគិតថ្លៃ។

ស្ថាបនិក "ក្រុមយុវជនល្ខោនខោលជំនាន់ថ្មី" លោក ហង់ ភូមិរ៉ា បានប្រាប់ Sabay ថា ការបង្កើតក្រុមនេះក្នុងគោលបំណងបង្រៀនដល់កូនខ្មែរដែលចង់រៀនរបាំបុរាណ។ ការបង្រៀននេះផ្ដោតសំខាន់លើល្ខោនខោល តែបើមានក្មេងស្រីចង់រៀនរបាំបុរាណក៏លោកបង្រៀនដែរ។ លោកបញ្ជាក់ថាការបង្រៀននេះមិនយកថវិកាឡើយ ព្រោះលោកយល់ឃើញថាមានកូនខ្មែរជាច្រើនមកពីតាមខេត្តដែលចង់រៀនតែមិនមានប្រាក់បងថ្ងៃសាលា ដូច្នេះឱ្យតែកូនខ្មែរណាចង់រៀនអាចមករៀនបាននៅបរិវេណសាលាភូមិន្ទវិចិត្រសិល្បៈ។

“ខ្ញុំគិតថាបើខ្ញុំមិនធ្វើ អ្នកណាធ្វើ ខ្ញុំធ្វើនេះមិនចង់បានអីទេ គ្រាន់តែចង់ឱ្យកូនខ្មែរមានកន្លែងរៀនបន្ថែម មានអ្នកបង្ហាត់។ បងបង្ហាត់ចាប់ពីអាយុ១១ឆ្នាំទៅដល់២៧ឆ្នាំ តែអ្នកខ្លះដែលគាត់ស្រលាញ់ ហើយគាត់មានអាយុ២០ក្រាស់ ឬ ៣០ឆ្នាំជាងក៏ដោយក៏បងទទួលដែរ កន្លងមកយើងធ្លាប់ទទួលអ្នកដែលមានអាយុប៉ុណ្ណឹងដែរ ត្បិតតែគាត់អាយុច្រើនតែគាត់ខំប្រឹងប្រែងរៀនណាស់ ហើយគាត់ចាប់បានច្រើន និយាយរួមទាំងក្មេងទាំងចាស់ខំរៀនទាំងអស់”។

សិល្បករល្បីល្បាយផ្នែកល្ខោនខោលរូបនេះ បានបើកថ្នាក់បង្រៀនល្ខោនខោលនិងរបាំនេះបានរយៈពេល១ឆ្នាំ ដោយទទួលបានសិស្សជិត១០០នាក់ ក្នុង៣ជំនាន់។ សិស្សក្នុងជំនាន់ទី១និងទី២ បានចេញទៅសម្ដែងក្នុងកម្មវិធីជាច្រើនរួចមកហើយមានទាំងតូចនិងធំ ចំណែកជំនាន់ទី៣កំពុងពង្រឹងសមត្ថភាពបន្ថែមដើម្បីបានចេញទៅសម្ដែងដែរ។

លោកក៏បានស្នើសុំដល់ក្រសួងដែលពាក់ពាន់ សូមជួយផ្ដល់ជាកន្លែងសមរម្យណាមួយដើម្បីលោកបានបង្ហាត់ពេញលេញ ព្រោះការបង្រៀនតាំងពីដើមមកគឺសុំទីតាំងសាលាភូមិន្ទវិចិត្រសិល្បៈបង្រៀនតែថ្ងៃអាទិត្យតែប៉ុណ្ណោះ។ លោកថា បើសិនជាមានកន្លែងបង្ហាត់ត្រឹមត្រូវលោកអាចបង្ហាត់បានច្រើនថ្ងៃក្នុងមួយសប្ដាហ៍។

អត្ថបទ៖ ប៉ូ សាគុន