វ៉ែន ហុងជីវុង យកឈ្នះ ទេស ជីវ៉ា បង្កឱ្យមានការភ្ញាក់ផ្អើលយ៉ាងខ្លាំង

2017-10-29 03:53:51
ចំនួនមតិ 0 | ចំនួនចែករំលែក 0

ចន្លោះមិនឃើញ

វ៉ែន ហុងជីវុង បានឡើងទៅវគ្គ៨ក្រុមចុងក្រោយហើយ បន្ទាប់ពីបានយកឈ្នះលើកីឡាករជើងខ្លាំង ទេស ជីវ៉ា ដោយពិន្ទុកាលពីយប់មិញនេះ ក្នុងការប្រកួតព្រឹត្តិការណ៍ TV5 Knock Out Series K-Cement ដែលជាប្រដាល់ដណ្ដើមជើងឯករដូវកាលថ្មីរបស់ប៉ុស្ដិ៍លេខ៥។

ក្នុងការប្រកួតម្សិលមិញនេះ ទេស ជីវ៉ា ហាក់មានប្រៀបជាង ជីវុង បន្តិច ប៉ុន្តែការវាយចូលរបស់គេដូចជាមិនទាន់ត្រូវខ្លាំង និងមានបច្ចេកទេសល្អនោះទេ ដែលធ្វើឱ្យពិន្ទុមិនបានច្រើនដូច ជីវុង ដែលវាយចូលតិចតែត្រូវច្រើន។ ឆ្លងកាត់ការប្រកួត៣ទឹកពេញ កីឡាករទាំងពីរនាក់នេះ វាយគ្នាទៅវិញទៅមក ហើយជាចុងក្រោយ ជីវុង ក៏ឈ្នះពិន្ទុលើ ជីវ៉ា ឡើងទៅវគ្គ៨ក្រុមចុងក្រោយតែម្ដងទៅ។

គូនេះដែរ លោក សេង កដិកា អ្នករៀបចំការប្រកួតបាននិយាយដែរថាពិតជាធ្វើឱ្យអ្នកគាំទ្រចម្លែកចិត្តបន្តិចហើយ ត្បិតអី ទេស ជីវ៉ា ជាកីឡាករដែលអ្នកគាំទ្រគិតថានឹងឈ្នះការប្រកួតនេះ។ ដល់ពេលប្រកួតមែនទែន បែរជាចាញ់គេទៅវិញ។ យ៉ាងណាមិញ លោកក៏មើលឃើញដែរ ថា វ៉ែន ហុងជីវុង មានបច្ចេកទេសល្អទើបបានជាគេវាយចូលហើយបានពិន្ទុពេញៗតែម្ដង។

ការប្រកួតកាលពីម្សិលមិញនេះដែរ អ៊ុំ វណ្ណេត ក៏បានឡើងទៅវគ្គ៨នាក់ចុងក្រោយដែរ ក្រោយពីរូបគេបានយកឈ្នះកីឡាករ ភុន សោភ័ណ្ឌ ដោយសន្លប់នៅទឹកទី២៕

អត្ថបទ៖ មុន្នីរម្យ