អ្នកវិទ្យាសាស្ត្រឥណ្ឌា រកឃើញគ្រោងឆ្អឹងសត្វសមុទ្រអាយុ ១៥២លានឆ្នាំ គួរឲ្យភ្ញាក់ផ្អើល

2017-11-01 08:03:25
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកវិទ្យាសាស្ត្រមួយក្រុម បានរកឃើញផូស៊ីលសត្វសមុទ្រដ៏ធំមួយ អាយុកាលជាង ១៥២លានឆ្នាំ ជាពពួកសត្វ ichthyosaur នៅប្រទេសឥណ្ឌា ធ្វើឲ្យគ្រប់គ្នាភ្ញាក់ផ្អើលយ៉ាងខ្លាំង។

គ្រោងឆ្អឹងប្រភេទសត្វល្មូននេះ មានប្រវែង ៥,៥ម៉ែត្រ ត្រូវបានគេរកឃើញលាយឡំក្នុងថ្មតាំងពីសម័យ Mesozoic នៅភាគខាងលិចរដ្ឋ Gujarat។ ក្រុមអ្នកជំនាញប្រើរយៈពេលជីកគាស់កកាយជាង ២ខែ ទើបឃើញរូបរាងបែបនេះ។ ក្នុងកំណាយ ឆ្អឹងផ្នែកក្បាល ព្រុយ និងកន្ទុយបានបាត់។

យោងទៅតាមការពិនិត្យស្រាវជ្រាវលើធ្មេញរបស់ល្មូននេះ គេសន្និដ្ឋានបានថា វាទំនងជាស៊ីពពួកសត្វមានស្នូក ដូចជាខ្យង។ ការរកឃើញខាងលើ នឹងអាចជួយឲ្យគេយល់ពីផូស៊ីលកាន់តែច្បាស់ ពីជីវិតរស់នៅរបស់ល្មូនសម័យនោះ។

លោក Prasad អ្នកជំនាញម្នាក់និយាយថា សត្វ ichthyosaurs មានរូបរាងស្រដៀងសត្វផ្សោត និងត្រីបាឡែនបច្ចុប្បន្ន និងធ្លាប់មានជីវិតរស់នៅលើផែនដីចន្លោះពី ៩០ ទៅ ២៥០លានឆ្នាំមុន។

ក្នុងសេចក្ដីថ្លែងការណ៍ អ្នកជំនាញខាងលើបញ្ជាក់ថា គ្រោងឆ្អឹងល្មូនសមុទ្រនឹងអាចឲ្យគេសិក្សាពីទំនាក់ទំនងផ្លូវទឹករវាងប្រទេសឥណ្ឌា និងអាហ្វ្រិកខាងត្បូងកាល ១៥០លានឆ្នាំមុន បានកាន់តែច្រើនថែមទៀត៕