ចំណុច​ខ្លះ​ៗ​ពី​​​គុណភាព​​​លេង​របស់​កម្ពុជា​​​​​យប់​មិញ​

  • 2017-11-10 04:02:05
  • ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុម​បាល់ទាត់​ជម្រើស​ជាតិ​កម្ពុជា​បរាជ័យ​​​ដោយ​ថ្វី​ជើង​ក្រុម​ភ្ញៀវ​មីយ៉ាន់ម៉ា​ដោយ​លទ្ធផល​ ២-១ ក្នុង​ជំនួប​មិត្តភាព​នៅ​ពហុ​កីឡដ្ឋាន​ជាតិ​​ដែល​មាន​អ្នក​គាំទ្រ​ទស្សនា​ប្រមាណ​៤​ម៉ឺន បើ​ទោះ​ជា​មាន​ឱកាស​ច្រើន​ក៏​ដោយ។ បើ​និយាយ​ពី​​គុណភាព​លេង​នៅ​លើ​​ទី​លាន​របស់​ក្រុម​កម្ពុជា​មាន​លក្ខណៈ​គួរ​ឲ្យ​កត់​សំគាល់​មួយ​ចំនួន។

ការ​លេង​វគ្គ​ទី​១​​

  • បម្រើ​កណ្តាល៖ ទម្រង់​លេង​របស់​កម្ពុជា​​រយៈ​ពេល​៤៥​នាទី​ដំបូង​​បង្ហាញ​ឲ្យ​កង្វះ​ខាត​គុណ​ភាព​របស់​កីឡាករ​ខ្លះ​​ដែល​សហការ​គ្នា​មិន​បាន​ល្អ​ឡើយ។ តំបន់​បម្រើ​កណ្តាល​​បង្កើត​ឱកាស​ទៅ​​តំបន់​ស្លាប​ខាង​ឆ្វេង​ និង​ខាង​ស្តាំ​មិន​បាន​ល្អ។ ជា​រឿង​ៗ​ត្រូវ​បាន​ខ្សែ​ការពារ​របស់​ដៃ​គូ​បិទ​ជិត​ និង​ដាក់​សម្ពាធ​ដណ្តើម​យក​បាល់​​ទៅ​បាត់។ ចំណុច​នេះ​ទាម​ទារ​ឲ្យ​លោក​គ្រូ​ ប្រាក់ សុវណ្ណារ៉ា​ដក​ចេញ​បម្រើ​ការពារ​កណ្តាល​ អ៊ុក សុធី ដោយ​ដាក់​ជំនួស​វិញ​ ហ៊ួយ​ ផល្លីន​នៅ​នាទី​៣៤។

  • តំបន់​ការពារ៖ នៅ​ដើម​វគ្គ​ទី​១​ ​ក៏​មិន​សូវ​ខ្វះ​ចន្លោះ​ប៉ុន្មាន​ដែរ​ពោល​គឺ​ធ្វើ​បាន​ល្អ​ហើយ​ ប៉ុន្តែ​ពេល​ខ្លះ​ហាក់​ដូច​ជា​ភាំង​ៗ​ ឬ​ប្រចាំ​គ្នា។ អ្វី​ដែល​គួរ​ឲ្យ​កត់​សំគាល់​​គឺ​​បាល់​ខ្ពស់​លើក​​ចូល​ប្រអប់​គ្រោះ​ថ្នាក់ ខ្សែ​ការពារ​កម្ពុជា​ហាក់​ដូច​ឈរ​ប្រចាំ​គ្នា​នៅ​នាទី​១៥​ដែល​ធ្វើ​ឲ្យ​កីឡាករ​មីយ៉ាន់ម៉ា​ Zaw Min Tun តែត​ចូល​ទី​កម្ពុជា​យ៉ាង​ស្រួល​ដោយ​គ្មាន​​ខ្សែ​ការពារ​កម្ពុជា​ណា​ទៅ​រំខាន​ឡើយ។

  • បម្រើ​ស្លាប៖ បើ​និយាយ​ពី​ខ្សែ​បម្រើ​ស្លាប​វិញ​ហាក់​បង្ហាញ​ឲ្យ​ឃើញ​កង្វះ​គុណភាព​​បច្ចេកទេស​ ស្មារតី​កីឡាករ​ម្នាក់​ៗ​ និង​​ការ​បញ្ជូន​បាល់​ដៃ​គូ​ឲ្យ​បាន​លឿន​ៗ។ ​អ្នក​លេង​ស្លាប​​ពេល​ទទួល​បាល់​ភ្លាម​មិន​បញ្ជូន​ភ្លាម​ទេ​ព្យាយាម​ញាក់​បាល់​អូស​ចូល​ ឬ​ទប់​បាល់​សិន​ ​ទម្រាំ​តែ​បោះ​បាល់​ឲ្យ​ដៃ​គូ​គឺ​ខ្សែ​ការពារ​គេ​បិទ​ជិត​ និង​ដាក់​សម្ពាធ​យក​បាល់​បាត់។ កីឡាករ​ខ្លះ​ហាក់​ដូច​ជា​មិន​ចង់​បោះ​បាល់​ឲ្យ​​មិត្ត​រួម​ក្រុម​សោះ​ដោយ​ព្យាយាម​លេង​​ម្នាក់​ឯង​ និង​ស៊ុត​យក​តែ​ម្តង។

  • តំបន់​ប្រយុទ្ធ៖ សម្រាប់​វគ្គ​ទី​១​នេះ​ ខ្សែ​ប្រយុទ្ធ​កម្ពុជា​ក៏​មាន​ឱកាស​លេង​នៅ​តំបន់​គ្រោះ​ថ្នាក់​របស់​មីយ៉ាន់ម៉ា​ជា​ច្រើន​លើក​ដែរ។ ជាក់​ស្តែង​នៅ​នាទី​ទី​៣២​ ចាន់ វឌ្ឍនាកា​ស៊ុត​បាល់​ខុស។ ក្រៅ​ពី​នោះ​​កម្ពុជា​ទទួល​បាន​បាល់​លើក​ពី​ជ្រុង​​ជា​ច្រើន ប៉ុន្តែ​ធ្វើ​មិន​បាន​សម្រេច។ ​

ការ​លេង​វគ្គ​ទី​២

  • ចូល​វគ្គ​ទី​២​ ទម្រង់​លេង​របស់​ក្រុម​ជម្រើស​ជាតិ​កម្ពុជា​បាន​ប្រែប្រួល​ និង​មាន​លក្ខណៈ​ល្អ​ប្រសើរ​ជាង​វគ្គ​ទី​១។ ​ការ​លេង​យល់​គ្នា​ និង​វាយ​សម្រុក​ជា​បន្ត​បន្ទាប់​ពី​​​បង្កើត​ឲ្យ​កម្ពុជា​ទម្លាយ​សំណាញ់​ទី​របស់​មីយ៉ាន់ម៉ា​ ដោយ ប្រាក់ មុន្នីឧត្តម នៅ​នាទី​៥០ បន្ទាប់​ពី​ទទួល​បាល់​ពី​កែវ សុខផេង។

  • លោក​ ប្រាក់ សុវណ្ណារ៉ា​​​បាន​​ផ្លាស់​ប្តូរ​កីឡាករ​​ជា​ច្រើន​​ក្នុង​នោះ​ខ្សែ​ការពារ​ សុខ​ សុវណ្ណ​ ចេញ​ជំនួស​ដោយ​ នុប តុលា និង​ឆេង ម៉េង ចេញ​ជំនួស​ដោយ​ នេន សុធារ័ត្ន។ ខ្សែ​បម្រើ​ស្លាប​ឆ្វេង កែវ សុខផេង ចេញ​ជំនួស​ដោយ ទិត្យ ឌីណា និង​ ប្រាក់ មុន្នីឧត្តម​ចេញ​ជំនួស​ដោយ​ ឈិន ឈឿន ព្រម​ទាំង​ សុះ ស៊ូហាណា ចេញ​ជំនួយ​វិញ​ដោយ​តាំង​ សុភ័ក្រ។

  • ទោះ​ជា​ទម្រង់​លេង​របស់​កម្ពុជា​កាន់​តែ​ប្រសើរ​ និង​មាន​ឱកាស​សម្រុក​គ្នា​ទៅ​វិញ​ទៅ​មក។ ទី​បំផុត​នៅ​នាទី​​៧១​តារា​ឆ្នើម​របស់​មីយ៉ាន់ម៉ា​ Aung Thu ​រក​គ្រាប់​បាល់​ជ័យជម្នះ។ បន្ទាប់​ពី​មីយ៉ាន់ម៉ា​នាំ​មុខ​ ២-១ កម្ពុជា​លេង​​វាយ​សម្រុក​កាន់​តែ​ល្អ​ ជា​ពិសេស​ខ្សែ​បម្រើ​ ទិត្យ ឌីណា តាំង សុភ័ក្រ និង គួច សុកុម្ភៈ​បាន​​បង្កើត​ឱកាស​​ល្អ​ៗ​ជា​ច្រើន​​លើក​ដើម្បី​​ឲ្យ​ខ្សែ​ប្រយុទ្ធ​ ចាន់ វឌ្ឍនាកា​ស៊ុត​ ដែល​ធ្វើ​មិន​បាន​សម្រេច ខណៈ​បម្រើ​ការពារ សារ៉េត គ្រីយ៉ា លេង​បាន​យ៉ាង​ល្អ។ និយាយ​រួម​វគ្គ​ទី​ពីរ​ ក្រុម​កម្ពុជា​លេង​​ដោយ​ការ​យល់​ចិត្ត​គ្នា​ បញ្ជូន​បាល់​ឲ្យ​គ្នា​ និង​​ទម្រង់​លេង​លឿនៗ ប៉ុន្តែ​គ្មាន​សំណាង៕

អត្ថបទ៖ ជាន ចាន់រ៉ា

អត្ថបទពេញនិយម
អត្ថបទថ្មី