បើមេកើយបញ្ចេញកាយវិការប្លែកៗ ៥យ៉ាងនេះ ដឹងតែឡើងប្រាក់ខែក្រឺតៗហើយ
- 2017-11-20 23:30:00
- ចំនួនមតិ 0 | ចំនួនចែករំលែក 0
បើមេកើយបញ្ចេញកាយវិការប្លែកៗ ៥យ៉ាងនេះ ដឹងតែឡើងប្រាក់ខែក្រឺតៗហើយ
ចន្លោះមិនឃើញ
ជាបុគ្គលិកក្រុមហ៊ុនម្នាក់អ្នកណា មិនចង់បានប្រាក់ខែច្រើន។ ប៉ុន្តែប្រាក់ខែមិនមែនចេះតែឡើងក្រឺតទេបើយើងមិនមានអ្វីពិសេស។ ប្រសិនបើយើងជាបុគ្គលិកឆ្នើមម្នាក់ក្នុងក្រុមហ៊ុន ប្រាកដជាដឹងពីសមត្ថភាពរបស់ខ្លួនឯងជាក់ជាមិនខាន ហើយបើសិនជាថ្នាក់ដឹកនាំរបស់យើង បញ្ចេញកាយវិការ ៥យ៉ាង ដូចខាងក្រោមនេះទៀតដឹងតែត្រៀមសប្បាយចិត្តឲ្យហើយទៅ។
១. នៅសុខៗស្រាប់តែសួរថាប្រាក់ខែប៉ុណ្ណឹងចាយគ្រាន់ទេ?
ករណីនេះមិនងាយនឹងកើតមាន តែបើសិនយើងជាបុគ្គលិកតស៊ូ ស្វិតស្វាញនឹងការងារខ្លាំង មិនដែលត្អូញត្អែរ និងមានគុណសម្បត្តិច្រើន នោះមេកើយរបស់អ្នកនឹងសួរថា ប្រាក់ខែប៉ុណ្ណឹងចាយគ្រាន់ទេ? ដូច្នេះជាសញ្ញាណមួយបញ្ជាក់ថា គាត់នឹងពិចារណាឡើងប្រាក់ខែឲ្យហើយ។ ចំណែកឯចម្លើយដ៏ល្អបំផុតគួរឆ្លើយថា «រឿងប្រាក់ខែប៉ុន្មានក៏ចាយមិនគ្រាន់ដែរ អាស្រ័យលើការចេះសន្សំសំចៃ តែបើប្រាក់ខែច្រើន គឺអាចមានលទ្ធភាពសន្សំបានខ្លះ»។
២. គាត់មកសួរយើងថា ការងារច្រើនអ៊ីចឹងទៅរួចអត់?
បើគាត់សួរបែបនេះ មានន័យថា គាត់ដឹងថាយើងខិតខំធ្វើការងារប៉ុណ្ណា ហើយការងារច្រើនយ៉ាងណា និងបង្ហាញអំពីការយកចិត្តទុកដាក់ខ្វល់ខ្វាយពីយើង។ នេះសបញ្ជាក់កាន់តែច្បាស់ទៀតថា គាត់នឹងអាចដំឡើងប្រាក់ខែឲ្យកាន់តែច្រើនថែមទៀត ឲ្យសក្ដិសមនឹងការខិតខំប្រឹងប្រែងរបស់យើង។
៣. មួយរយៈចុងក្រោយគាត់ឧស្សាហ៍ទម្លាក់ការងារសំខាន់ឲ្យយើងធ្វើ
បន្ទាប់ពីយើងធ្វើការបានល្អ សម្រេចជោគជ័យបានច្រើន និងផ្ដល់ផលប្រយោជន៍ឲ្យក្រុមហ៊ុនបានច្រើន នោះការងារសំខាន់ៗផ្សេងទៀត គាត់នឹងទម្លាក់ឲ្យយើងធ្វើ ព្រោះតែការជឿជាក់។ ដូច្នេះគាត់ប្រាកដជាលៃលកប្រាក់ខែឲ្យសមនឹងទំហំការងារ និងសមត្ថភាពរបស់យើងហើយ មិនមែននៅដដែលទេ។
៤. ប្រជុំជាមួយថ្នាក់ដឹកនាំសំខាន់ៗឥឡូវស្រាប់តែហៅយើងចូលដែរ
ចម្លែកទេ ដែលយើងអាចចូលប្រជុំស្ដាប់ផែនការធំៗរបស់ក្រុមហ៊ុន? នេះកាន់តែច្បាស់ហើយ ដែលក្រុមហ៊ុនប្រាកដជាដំឡើងតំណែង និងប្រាក់ខែឲ្យយើងជាក់ជាមិនខាន មិនមែនយើងបុគ្គលិកធម្មតា សមត្ថភាពធម្មតាៗ មានឱកាសបែបនេះទេ។ ដូច្នេះត្រៀមសប្បាយចិត្តឲ្យហើយទៅ។
៥. ឧស្សាហ៍លើកសរសើរយើងញឹកញាប់
គាត់ឧស្សាហ៍លើកសរសើរចំៗនៅនឹងមុខយើង ពីរឿងលទ្ធផលការងារ និងសួរសុខទុក្ខយើងច្រើនលើសពីធម្មតា ជួនកាលសរសើរនៅមុខអ្នកដទៃទៀតផង។ បើឧស្សាហ៍សរសើរញឹកញាប់ម្ល៉ឹងៗចាំផ្ទៀងផ្ទាត់ប្រាក់ខែ ខែក្រោយសាកមើលប្រាកដជាច្រើនជាងមុនមិនខាន៕
ចុចអានអត្ថបទពាក់ព័ន្ធ៖
បើ Manager មានចរិត ៦យ៉ាងនេះដឹងតែគ្មានកូនចៅណាចង់ធ្វើការជាមួយទេ
៥យ៉ាងមិនអាចជៀសផុតនៅកន្លែងធ្វើការ បើមិនចេះទ្រាំមុខជាប្ដូរការងាររហូត