៥យ៉ាងមិនអាចជៀសផុតនៅកន្លែងធ្វើការ បើមិនចេះទ្រាំមុខជាប្ដូរការងាររហូត
- 2017-10-09 03:39:53
- ចំនួនមតិ 0 | ចំនួនចែករំលែក 0
៥យ៉ាងមិនអាចជៀសផុតនៅកន្លែងធ្វើការ បើមិនចេះទ្រាំមុខជាប្ដូរការងាររហូត
ចន្លោះមិនឃើញ
នៅលើលោកនេះ គ្មានអ្វីដែលអាចបំពេញចិត្តខ្លួនឯងគ្រប់បែបយ៉ាងបានទេ ទាមទារឱ្យចេះសម្របខ្លួន ចេះបត់បែនគ្រប់កាលៈទេសៈ ទើបអាចឆ្លងកាត់រឿងជាច្រើនក្នុងជីវិតពីមួយជំហានទៅមួយជំហាន។ មិនខុសអីពីអ្នកធ្វើការក្នុងអង្គភាពមួយ មិនមែនចេះតែជួបរឿងត្រូវចិត្តរហូតនោះទេ បើមិនចេះអត់ធ្មត់ មិនចេះទ្រាំ ប្រាកដជាត្រូវផ្លាស់ប្ដូរការងារតែរហូតហើយ។ ខាងក្រោមនេះជារឿងមិនអាចជៀសផុតនៅកន្លែងការងារ ត្រូវរៀនសម្របខ្លួន ទើបអាចបំពេញការងារកន្លែងណាមួយ បានយូរអង្វែង៖
១. មិនងាយនឹងទទួលពាក្យសរសើរទោះខំយ៉ាងណាក៏ដោយ
ជាធម្មតា បុគ្គលិកម្នាក់ៗតែងចង់ទទួលបានពាក្យសរសើរលើកទឹកចិត្តពីមេកើយរបស់ខ្លួន ពេលបំពេញការងារអ្វីមួយបានល្អបំផុត។ ប៉ុន្តែក្នុងផ្នត់គំនិត ភាពជាអ្នកដឹកនាំក្នុងក្រុមហ៊ុនមួយ ពាក្យសរសើររាល់ថ្ងៃពេកទៅកាន់បុគ្គលិកអាចជារឿងល្អ តែក៏អាចជារឿងមិនសូវល្អដែរ។ ពេលខ្លះការសរសើរញឹកញាប់ពេកអាចឱ្យបុគ្គលិកនោះភ្លេចពីចំណុចខ្វះខាតរបស់ខ្លួន អាចមានភាពអំនួតជ្រុលលើខ្លួនឯង ហើយក៏ជាភាពលំអៀងសម្រាប់បុគ្គលិកដទៃ។ ដូចនេះក្នុងនាមជាអ្នកធ្វើការមួយរូប យើងប្រាកដជាដឹងខ្លួនឯងហើយ ថាធ្វើការល្អ ឫមិនល្អ ហើយក៏មិនត្រូវឆាប់អន់ចិត្តដែរនូវពេលមិនសូវទទួលបានពាក្យសរសើរលើកទឹកចិត្ត។
២. ពេលខ្លះមានអារម្មណ៍បាក់ទឹកចិត្តម្ដងម្កាលចង់លាឈប់
គ្មានអ្វីដែលល្អប្រសើររហូតទេ ហើយក៏គ្មានអ្វីទៀងទាត់ត្រូវចិត្តរហូតនោះដែរ។ ជាក់ស្ដែងក្នុងរង្វង់ការងារតែងជួបឧបសគ្គពិបាកឆ្លងកាត់ ការស្ដីបន្ទោសពីមេកើយ ការអន់ចិត្ត តូចចិត្ត។ល។ ដូច្នេះហើយទាមទារឱ្យអ្នកធ្វើការទាំងឡាយ តាំងចិត្តឱ្យរឹងមាំ មានភាពជាអ្នកដឹកនាំក្នុងខ្លួន មិនមែនឱ្យតែជួបបញ្ហាអ្វីតែងតែឆាប់បាក់ទឹកចិត្តចង់លាឈប់នោះទេ។ ប្រសិនបើធ្វើចំណុចនេះមិនបានទេ ទោះទៅដល់ក្រុមហ៊ុនណាក៏នៅតែដដែលៗគ្មានអ្វីរីកចម្រើនឡើយ។
៣. ពេលខ្លះហាក់សម្របខ្លួនសឹងមិនទាន់ចំពោះការផ្លាស់ប្ដូរ
ក្នុងពេលដែលកំពុងពេញចិត្តនឹងតំណែងដែលខ្លួនឯងកំពុងធ្វើ ឫពេញចិត្តនឹងបរិយាកាសការងារនោះហើយ ស្រាប់តែនៅសុខៗក្រុមហ៊ុនផ្លាស់ប្ដូររចនាសម្ព័ន្ធភ្លាមៗ ទាំងយើងមិនបានត្រៀមខ្លួន។ ដូច្នេះសូមកុំទាន់ភ្ញាក់ផ្អើល ឫប្រតិកម្ម ចំពោះការផ្លាស់ប្ដូរ ជួនកាលអាចមកពីថ្នាក់ដឹកនាំឃើញពីសមត្ថភាពរបស់យើងថាសក្ដិសមនៅកន្លែងណាមួយ ឫមួយមកពីក្រុមហ៊ុនចង់ឱ្យមានការផ្លាស់ប្ដូរដើម្បីភាពរីកចម្រើន។ ដូចនេះយើងត្រូវតែចេះបត់បែនគ្រប់កាលៈទេសៈ នោះទើបសក្ដិសមជាបុគ្គលិកពោរពេញដោយសមត្ថភាពម្នាក់។
៤. ថ្នាក់ដឹកនាំចេះតែបន្ថែមការងារដោយគ្មានសួរមួយម៉ាត់
ត្រង់ចំណុចនេះ គឺសំដៅទៅលើសម្ពាធការងារ ដែលគ្មាននរណាអាចជៀសផុត ក្នុងនាមជាបុគ្គលិកម្នាក់។ ដូច្នេះសូមកុំភ្ញាក់ផ្អើលនឹងការបន្ថែមការងារ កុំទាន់ប្រកែកពេលទទួលការងារថ្មីៗបន្ថែមទៀតពីថ្នាក់លើ។ ចំណុចនេះអាចមកពីថ្នាក់ដឹកនាំចង់សាកល្បងសមត្ថភាព ថាយើងអាចធ្វើបានកម្រិតណា ស្រួលមិនស្រួល យើងអាចនឹងឡើងតំណែង ឡើងប្រាក់ខែទៀតផង។
៥. អាចប៉ះទង្គិចជាមួយមិត្តរួមការងារ
ជាបុគ្គលិកម្នាក់ទោះខំព្យាយាមធ្វើខ្លួនល្អប៉ុណ្ណាក៏ដោយ ក៏នៅតែជៀសមិនផុត ដោយការប៉ះទង្គិចពាក្យសម្ដី ការអាក់អន់ស្រពន់ចិត្តជាមួយមនុស្សជុំវិញខ្លួន។ បែបនេះហើយទើបត្រូវរៀនធ្វើចិត្តឱ្យនឹងន ត្រូវចេះសម្របខ្លួនគ្រប់ប្រភេទមនុស្ស កុំចង់ចាញ់ចង់ឈ្នះជាមួយអ្នកណា សំខាន់ត្រូវខំបំពេញការងារឱ្យអស់ពីសមត្ថភាព៕
ចុចអានអត្ថបទពាក់ព័ន្ធ៖
មកដឹងជំនាញទាំង៧ នៅកម្ពុជាល្បីរៀនចប់ប្រាក់ខែ អាចដល់ខ្ទង់ពាន់ដុល្លារ
កុំភ្លេចកាន់ CV ទៅកោះពេជ្រ ការងារ២ម៉ឺនកន្លែងកំពុងរង់ចាំនិស្សិតគ្រប់ជំនាញ