ពិសេសណាស់! មានភ្ញៀវក្រៅប្រព័ន្ធព្រះអាទិត្យមកលេង

2017-11-21 04:43:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមតារាវិទូបានបញ្ជាក់ថាវត្ថុមួយដែលបានហោះកាត់ភពផែនដីនាពេលថ្មីៗនេះគឺមានប្រភពពីខាងក្រៅប្រព័ន្ធព្រះអាទិត្យ ជាវត្ថុក្រៅប្រព័ន្ធព្រះអាទិត្យដំបូងគេ ដែលមនុស្សលោកបានប្រទះឃើញ។

ការតាមដានបន្តបន្ទាប់លើវត្ថុនេះ បានរកឃើញថាវាជាអាចម៍ផ្កាយដែលងងឹត និងមានពណ៌រាងក្រហម ស្រដៀងនឹងវត្ថុដទៃទៀតដែលនៅក្រៅប្រព័ន្ធព្រះអាទិត្យដែរ។ វាមិនមានឧស្ម័ន ឬ ធូលីនៅព័ទ្ធជុំវិញ ដូចជាផ្កាយដុះកន្ទុយនោះទេ ហើយវាមានរាងវែងស្ដើង ប្រៀបដូចជាប៊ិចចម្លែកមួយ។ គេប៉ាន់ស្មានថាអាចម៍ផ្កាយនេះមានប្រវែងប្រមាណ ៤០០ ម៉ែត្រ វែងជាងប្រវែងអាចម៍ផ្កាយទូទៅក្នុងប្រព័ន្ធព្រះអាទិត្យ។

តារាវិទូបានគិតថាអាចម៍ផ្កាយដែលមានរហស្សនាម ʻOumuamua នេះ បានធ្វើដំណើររយៈពេលរាប់លានឆ្នាំមុនមកដល់ប្រព័ន្ធព្រះអាទិត្យ។ វាទំនងជាធ្វើដំណើរមកពីទិសដៅនៃកញ្ចុំផ្កាយ Lyra ប៉ុន្តែប្រភពជាក់លាក់របស់វា គេនៅមិនទាន់ដឹងនៅឡើយទេ។

ចម្លើយជាច្រើនទៀតនឹងមាននៅក្នុងពេលឆាប់ៗនេះ ដោយសារតែកែវយឹតអវកាសរបស់ NASA កំពុងអង្កេត ʻOumuamua នៅក្នុងសប្ដាហ៍នេះ។ បញ្ជាក់ថាអាចម៍ផ្កាយនេះត្រូវបានប្រទះឃើញដំបូងនៅថ្ងៃទី ១៩ ខែតុលា ដោយក្រុមតារាវិទូដែលធ្វើការលើកែវយឹត Pan STARRS នៅហ៉ាវៃ។

បច្ចុប្បន្ននេះ ʻOumuamua ស្ថិតនៅចម្ងាយប្រមាណ ២០០ គីឡូម៉ែត្រពីផែនដី ដោយធ្វើដំណើរក្នុងល្បឿនប្រមាណ ១៣៧ ៩០០ គ.ម/ម៉។ វាបានធ្វើដំណើរផុតគន្លងភពអង្គារនៅថ្ងៃទី ១ ខែវិច្ឆិកា ហើយនឹងទៅដល់ភពព្រហស្បតិ៍នៅឆ្នាំ ២០១៨៕

ប្រភព៖ The Verge ប្រែសម្រួល៖ សុខហេង