បរទេសកាន់តែច្រើនឡើង ជឿលើ អណ្ដូងទឹកផុស ឬរូងនាគភ្នំគូលែន អាចព្យាបាលជំងឺ

2017-12-01 03:10:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រព័ន្ធផ្សព្វផ្សាយ អ្នកណែនាំភ្ញៀវ និង អ្នកធ្លាប់បន់បានជោគជ័យ ចេះតែផ្សព្វផ្សាយតៗគ្នា ធ្វើឲ្យភ្ញៀវទេសចរក្នុងស្រុក និង បរទេសកាន់តែមានជំនឿលើអណ្ដូងទឹកផុស ឬ រូងនាគភ្នំគូលែន ដែលផឹកទឹក ឬ លាបទៅ អាចព្យាបាលជំងឺ។ នេះបើតាមការអះអាងរបស់លោក ហោ ជា ឆ្មាំការពារនៅភ្នំគូលែន។

អណ្ដូងទឹកផុស ឬរូងនាគភ្នំគូលែន

អ្នកស្រុករមែងហៅ អណ្ដូងទឹកផុស អណ្ដូងទឹក ៧ពណ៌ ឬ រូងនាគភ្នំគូលែន ដែលមានទឹកមិនដាច់នៅជ្រលងលិង្គ ១ ០០០ លើភ្នំគូលែន ខេត្តសៀមរាប ដែលគ្រប់គ្នារមែងមកបន់ស្រន់បានសម្រេចដូចសេចក្ដីប្រាថ្នា។ ជាពិសេស អ្នកឈឺចង្កេះ ខ្នង និង បញ្ហាសន្លាក់ផ្សេងៗ ដែលព្យាបាលនៅពេទ្យយូរហើយមិនជាសះ បែរជាមកផឹកទឹក និងលាបលើកន្លែងឈឺ ធ្វើឲ្យធូរស្បើយ ម៉្លោះហើយ ក៏មានការផ្សព្វផ្សាយតៗគ្នា ល្បីថា អណ្ដូងនេះស័ក្ដិសិទ្ធិ។

លោក ហោ ជា បានប្រាប់ក្រុមការងារ «ផ្លូវទៅស្រុក ២» ថា អណ្ដូងនេះមិនមែនទើបមាននោះទេ គឺមានតាំងពីយូរលង់ណាស់មកហើយ ហើយមានទឹកខួបប្រាំងខួបវស្សា ប៉ុន្តែទឹកផុសមានចាប់ពីខែកញ្ញា ដល់ខែមិនា ប៉ុណ្ណោះ។

លោក ហោ ជា

ដើមឡើយជំនឿមានតែប្រជាជនខ្មែរ ជាពិសេសអ្នកស្រុកប៉ុណ្ណោះ ប៉ុន្ដែ ដោយមានការផ្សព្វផ្សាយដូចជា អ្នកណែនាំភ្ញៀវទេសចរ និង កាសែតបរទេសចុះមកយកព័ត៌មាន ទើបធ្វើឲ្យបរទេស មានជំនឿលើរឿងហ្នឹងដែរ ប៉ុន្តែ ភ្ញៀវបរទេសជឿខ្លាំងគឺភ្ញៀវនៅអាស៊ី ក្រោយមកអឺរ៉ុប។

ភ្ញៀវទេសចរ ទៅបន់ស្រន់នៅអណ្ដូងទឹកផុស

អណ្ដូងទឹកផុស ឬ រូងនាគភ្នំគូលែននេះ ស្ថិតនៅផ្នែកខាងលើនៃជ្រលងលិង្គ ១ ០០០ លើភ្នំគូលែន។ ភ្នំគូលែនស្ថិតនៅក្នុងស្រុកស្វាយលើ និងស្រុកវ៉ារិន ចម្ងាយ ៦០គីឡូម៉ែត្រពីក្រុងសៀមរាប និងប្រហែល ២៥គីឡូម៉ែត្រពីប្រាសាទបន្ទាយស្រី។ ភ្នំនេះមានឈ្មោះដើមថា មហិន្រ្ទបព៌ត ជាកន្លែងដែលព្រះបាទជ័យវរ្ម័នទី២ ប្រារព្ធធ្វើពិធីទេវរាជ និងប្រកាសឯករាជ្យពីប្រទេសជ្វាក្នុងឆ្នាំ៨០២ ដែលជាពេលដែលសម័យអង្គរកើតឡើង៕

សូមទស្សនាវីដេអូ