Nissan នឹងតេស្តរថយន្តអគ្គិសនីបើកបរដោយខ្លួនឯងនៅឆ្នាំក្រោយ

2017-12-05 12:22:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនរថយន្តជប៉ុន Nissan Motor Co និងក្រុមហ៊ុនផលិតហ្គេម DeNA Co និយាយនៅថ្ងៃអង្គារនេះថា ពួកគេនឹងចាប់ផ្តើមតេស្តរថយន្តអគ្គិសនីបើកបរដោយខ្លួនឯងនៅប្រទេសជប៉ុនឆ្នាំក្រោយ។

ក្រុមហ៊ុន Nissan និង DeNA នឹងកំណត់រយៈពេលសាកល្បងរថយន្ត Leafពីរសប្តាហ៍ក្នុងក្រុង យ៉ូកូហាម៉ានៅខែមិនាដែលអ្នកចូលរួមទាំងអស់អាចប្រើប្រាស់កម្មវិធី App របស់ DeNA បញ្ជារថយន្ត Leaf ដើម្បីឱ្យធ្វើដំណើរទៅកាន់គោលដៅដែលបានរៀបចំមុននិងធ្វើការបង់ថ្លៃសេវាតែម្តង ។ ក្រុមហ៊ុនទាំងពីរដែលបានធ្វើតេស្តប្រព័ន្ធ Easy Ride ឬ បើកបរងាយស្រួលចាប់តាំងពីចាប់ដៃគ្នានៅដើមឆ្នាំ ២០១៧ នេះហើយនិយាយថា ការធ្វើតេស្តនេះនឹងក្លាយជាជំហានដំបូងឆ្ពោះទៅរកគោលដៅរបស់ពួកគេនៃដំណើរការសេវាកម្មពេញលេញពោលគឺជាសេវាកម្មបើកបរដោយខ្លួនឯងក្នុងប្រទេសជប៉ុនមុនទសវត្សរ៍ ២០២០។

ក្រុមហ៊ុនរថយន្តលើសកលលោកកំពុងសម្លឹងមើលលើសពីការផលិត និងលក់រថយន្តក្នុងឧស្សាហកម្មដែលត្រូវបានផ្លាស់ប្តូរយ៉ាងឆាប់រហ័សដោយសេវាកម្មថ្មីៗ និងចំនួនកើនឡើងរួមមានក្រុមហ៊ុន General Motors Co (GM) កំពុងអនុវត្តជំនាញរបស់ពួកគេក្នុងមុខងារបើកបរស្វ័យប្រវត្តិសម្រាប់ទីផ្សាររថយន្តទ្រង់ទ្រាយធំដើម្បីអភិវឌ្ឍសេវាកម្មចល័ត។

ទន្ទឹមគ្នានេះដែរទីផ្សារ “បង់ថ្លៃសេវាសម្រាប់ការជិះមួយលើក” កំពុងក្លាយជាសមរភូមិក្តៅមួយរវាងក្រុមហ៊ុនរថយន្តទូទាំងពិភពលោក ។ ដោយឡែកក្រុមហ៊ុនបច្ចេកវិទ្យាមេរបស់ Google គឺ Alphabet Inc ក្រុមហ៊ុនសេវាកម្មដឹកជញ្ជូន Uber Technologies Inc និងក្រុមហ៊ុនអាជីវកម្មបង្កើតថ្មីថ្មោង start-ups កំពុងរកវិធីសាស្ត្ររកលុយតាមសេវាកម្មជិះបង់ថ្លៃ។

យ៉ាងណាមិញក្រុមហ៊ុន Nissan និង DeNA នឹងជួបគូប្រជែងក្នុងទឹកដីរបស់ខ្លួនគឺ ZMP Inc ជាក្រុមហ៊ុនផលិតរ៉ូប៊ូតដែលបច្ចុប្បន្នកំពុងធ្វើការជាមួយក្រុមហ៊ុនផលិតតាក់ស៊ីតូក្យូដើម្បីផលិតសេវាកម្មតាក់ស៊ីស្វ័យប្រវត្តិដោយក្រុមហ៊ុនសង្ឃឹមថានឹងដំណើរការព្រមទាំងប្រតិបត្តិការក្នុងព្រឹត្តិការណ៍អូឡាំពិកក្រុងតូក្យូឆ្នាំ ២០២០ ផងដែរ៕

ប្រភព៖ gadgetsnow ប្រែសម្រួល៖ សិរីបុទ្រ