ក្មេងស្រីកម្សត់ ដើរជើងទទេទៅរៀន នៅស្ថានីយ៍រថភ្លើងរាល់យប់ ព្រោះនៅផ្ទះគ្មានភ្លើងអគ្គិសនី

2017-12-07 08:01:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ការអប់រំគឺជារបស់មួយដែលមិនអាចបាត់បង់ ឬត្រូវគេលួចយកទៅឆ្ងាយបាន។ ប៉ុន្តែដើម្បីទទួលបានការអប់រំល្អ ក៏មិនមែនជារឿងងាយស្រួលដែរ។

នៅតាមបណ្ដាប្រទេសជាច្រើនជុំវិញពិភពលោក ភាពក្រីក្របានក្លាយជាឧបសគ្គធំបំផុតមួយ ចំពោះកុមារជាច្រើនដែលចង់រៀនសូត្រ។ បន្ថែមលើនេះ កុមារដែលរស់នៅក្នុងសហគមន៍ក្រីក្រ កាន់តែមានការលំបាកខ្លាំង ជាពិសេសតំបន់ដាច់ស្រយាលដែលគ្មានអគ្គិសនីគ្រប់គ្រាន់។

ជាក់ស្ដែង ក្មេងស្រីម្នាក់មានឈ្មោះថា Divya ដោយសារតែចង់បានចំណេះដឹង សុខចិត្តដើរជើងទទេទៅរៀន នៅស្ថានីយរថភ្លើងមួយកន្លែង ស្ថិតក្នុងរដ្ឋ Uttar Pradesh ប្រទេសឥណ្ឌា ជារៀងរាល់យប់ ព្រោះតែនៅផ្ទះរបស់នាងគ្មានភ្លើងអគ្គិសនីប្រើប្រាស់។ នាងកាន់កាតាបរបស់នាងដែលផ្ទុកដោយសៀវភៅ និងកូនសៀវភៅ ហើយអង្គុយនៅលើដីនៃស្ថានីយរថភ្លើង រួចផ្ដោតអារម្មណ៍លើការរៀនសូត្រ ដោយមិនខ្វល់ពីអ្នកដទៃសម្លឹងមើលនាងឡើយ។

Divya

បុរសម្នាក់មានឈ្មោះថា Rajesh Kumar Singh ឃើញនាងដូច្នេះក៏បានសម្រេចចិត្តថតរូបនាង ប៉ុន្តែ Divya ហាក់បីដូចជាមិនខ្វល់ឡើយ ហើយបន្តធ្វើកិច្ចការរបស់នាងតទៅទៀត។ នាង Divya បានប្រាប់ថា នាងរស់នៅក្នុងតំបន់ក្រីក្រ ហើយគ្មានភ្លើងអគ្គិសនីប្រើប្រាស់នៅក្នុងផ្ទះឡើយ ដូច្នេះទើបនាងមកស្ថានីយរថភ្លើង ដើម្បីបានភ្លើងប្រើប្រាស់សម្រាប់រៀនសូត្រ។

គួរបញ្ជាក់ថា ស្ថានីយរថភ្លើងនោះស្ថិតនៅក្នុងរដ្ឋ Uttar Pradesh ដែលមានចំនួនប្រជាជនច្រើនបំផុត ហើយក្របំផុតនៅប្រទេសឥណ្ឌា៕